ភ្ជុំបិណ្ឌ៖ សៀមរាបមានកំណើនភ្ញៀវជាតិ តែភ្ញៀវបរទេសថយចុះជាង៣៧ភាគរយ

ជាតិ

ភ្ជុំបិណ្ឌ៖ សៀមរាបមានកំណើនភ្ញៀវជាតិ តែភ្ញៀវបរទេសថយចុះជាង៣៧ភាគរយ

30, Sep 2019 , 4:29 pm

រូបភាព

ដោយ: អុីសា រ៉ហានី (Isa Rohany)

ភ្នំពេញ៖ ខេត្តសៀមរាប នៅតែទទួលបានភ្ញៀវទេសចរច្រើនជាងគេ នៅក្នុងឱកាសបុណ្យភ្ជុំបិណ្ឌនេះ បើទោះជាកំណើនភ្ញៀវអន្តរជាតិថយចុះក៏ដោយ។

លោក ង៉ូវ សេងកាក់ ប្រធានមន្ទីរទេសចរណ៍ខេត្តសៀមរាប បានបញ្ជាក់ថា បុណ្យភ្ជុំបិណ្ឌនេះ កំណើនភ្ញៀវទេសចរទស្សនាខេត្តសៀមរាបសរុបប្រមាណ ២៤៤,០៧៥នាក់ កើនឡើងចំនួន៥.០១ភាគរយ បើធៀបរយៈពេលដូចគ្នាឆ្នាំ២០១៨ ចំនួន ២៣២, ៤២២។ បើតាមលោក សេងកាក់ ភ្ញៀវទេសចរអន្តរជាតិមកទស្សនាខេត្តសៀមរាប មានចំនួន ១៤,០៧៥ នាក់ ថយចុះចំនួន៣៧.២៣ភាគរយ ធៀបនឹងឆ្នាំ២០១៨ មានភ្ញៀវទេសចរអន្តរជាតិចំនួន ២២,៤២២នាក់។ រីឯចំនួនភ្ញៀវទេសចរជាតិ ដែលបានមកទស្សនាខេត្តសៀមរាបវិញ មានចំនួន២៣ម៉ឺននាក់ កើនឡើង ៩.៥២ភាគរយ បើធៀបនឹងឆ្នាំ២០១៨ មានចំនួនត្រឹមតែ២១ម៉ឺននាក់ប៉ុណ្ណោះ។

គួរបញ្ជាក់ថា រយៈពេល៨ខែ ឆ្នាំ២០១៩ មានភ្ញៀវទេសចរបរទេសចំនួន ១,៥៥១,៨៣៦នាក់ បានទិញប័ណ្ណចូលទស្សនារមណីយដ្ឋានអង្គរ។ ចំណូលពីការលក់សំបុត្រ មានចំនួន ៦៩,៤៦៤,២១៧ ដុល្លារ ថយចុះ១១.៨២ភាគរយ បើធៀបនឹងរយៈពេលដូចគ្នា កាលពីឆ្នាំ២០១៨។ នេះបើតាមសេចក្ដីប្រកាសព័ត៌មានរបស់គ្រឹះស្ថានអង្គរ ចេញផ្សាយថ្ងៃទី ១ ខែកញ្ញាកន្លងមក៕