ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
អចលនទ្រព្យ
អត្ថបទពាណិជ្ជកម្ម
អត្ថបទណែនាំ៖តើធ្វើដូចម្តេច ទើបទិញផ្ទះបានត្រឹមត្រូវ ដែលអាចជៀសវាងហានិភ័យ?
01, Oct 2019 ,
10:26 am
រូបភាព
×
ដោយ:
ថ្មីៗ
បច្ចុប្បន្ន ការផ្គត់ផ្គង់ផ្នែកលំនៅដ្ឋានហាក់កំពុងមានភាពរីកចម្រើនខ្លាំង ទាំងគម្រោងទីក្រុងរណប គម្រោងបុរី និងគម្រោងលំនៅដ្ឋានតូចៗ ដែលមិនមានឈ្មោះនៅលើទីផ្សារអចលនទ្រព្យ។ អ្នកអភិវឌ្ឍក្នុងវិស័យអចលនទ្រព្យជាច្រើន បានចាប់ផ្តើមសំឡឹង និងងាកមកអភិវឌ្ឍគម្រោងលំនៅដ្ឋាន ដោយសារតែវិស័យនេះកំពុងត្រូវប៉ាន់ និងកាក់កប។
មានការអះអាងជាច្រើនអំពីការផ្គត់ផ្គង់ផ្នែកលំនៅដ្ឋាន ដោយអ្នកជំនាញខ្លះអះអាងថា ការផ្គត់ផ្គង់នៅមានកម្រិងតិចតួចនៅឡើយ មិនគ្រប់គ្រាន់សម្រាប់តម្រូវការទិញ ឬតម្រូវការទីផ្សារ ប៉ុន្តែក៏មានការមើលឃើញថា ការផ្គត់ផ្គង់ផ្នែកលំនៅដ្ឋាន ហាក់បីដូចជាកំពុងលើសពីតម្រូវការ (oversupply) ដោយសារតែមើលឃើញថា គម្រោងលំនៅដ្ឋានជាច្រើន កំពុងមានបញ្ហាលើការលក់មិនដាច់។
ទោះជាយ៉ាងណាអំណះអំណាងខាងលើ សុទ្ធតែមានសច្ចភាពពិតប្រាកដ ដោយមានហេតុផលត្រឹមត្រូវ ប៉ុន្តែអ្វីដែលជាចំណុចគួរឲ្យកត់សម្គាល់នោះ គឺគម្រោងលំនៅដ្ឋានតូចៗ ដែលមិនមានឈ្មោះ មិនមានប្រវត្តិអភិវឌ្ឍពីមុនមក ជាគម្រោងលំនៅដ្ឋានដែលមានតម្លៃថោកៗ ត្រឹមក្រោម ៥០,០០០ ដុល្លារ គឺពិតជាជួបបញ្ហាមួយចំនួន លើដំណើរការនៃការលក់(លក់មិនសូវដាច់) គម្រោងគាំងជាដើម ដោយសារតែគម្រោង(ខ្លះ)ទាំងនោះ មិនមានច្បាប់ទម្លាប់ត្រឹមត្រូវ អតិថិជនមិនទុកចិត្តលើការអភិវឌ្ឍ មិនទុកចិត្តលើគុណភាពសំណង់ តម្លៃផ្ទះ និងលក្ខខណ្ឌបង់ប្រាក់មិនអាចទទួលយកបានពីអតិថិជន និងការអភិវឌ្ឍគម្រោងហាក់មិនមានផែនការច្បាស់លាស់ជាដើម។
ហេតុដូច្នេះហើយ អតិថិជន (អ្នកទិញផ្ទះ) ត្រូវតែគិតឲ្យបានច្បាស់លាស់ជាមុន មុនពេលសម្រេចចិត្តទិញផ្ទះពីគម្រោងលំនៅដ្ឋានណាមួយ ជៀសវាងបញ្ហានៅពេលខាងមុខ ដូចបានលើកឡើងខាងលើ។ ជាការពិតណាស់ ដើម្បីទិញផ្ទះឲ្យបានត្រឹមត្រូវ មានរូបមន្ត និងការណែនាំផ្សេងៗគ្នា ហើយការណែនាំទាំងអស់នោះ សុទ្ធតែត្រឹមត្រូវដូចៗគ្នា គ្រាន់តែការប្រើប្រាស់តាមកាលៈទេសៈ និងបរិបទប៉ុណ្ណោះ។
ចំណុចខាងក្រោមនេះ គឺជាការណែនាំខ្លះៗ ក្នុងការទិញផ្ទះឲ្យបានត្រឹមត្រូវ សម្រាប់លោក-អ្នកដែលចង់ទិញផ្ទះ សម្រាប់ការស្នាក់នៅធម្មតា សម្រាប់ប្រកបអាជីវកម្ម ឬការវិនិយោគ (លក់យកចំណេញ) ៖
១) ជ្រើសរើសទីតាំង ឬតំបន់ណាមួយដែលលោក-អ្នកពេញចិត្ត៖
ជាទីតាំងដែលមានសក្តានុពលសេដ្ឋកិច្ច និងអចលនទ្រព្យ (ទីតាំង ឬតំបន់ដែលកំពុងអភិវឌ្ឍ ឬមានសញ្ញាណអភិវឌ្ឍល្អក្នុងពេលអនាគត)។ ទីតាំងគម្រោង ឬតំបន់ដែលគម្រោងកំពុងអភិវឌ្ឍនេះ គឺជារឿងទីមួយដែលលោក-អ្នកត្រូវជ្រើសរើសមុនគេ មុនពេលសម្រេចចិត្តទិញផ្ទះ ទោះក្នុងគោលបំណងណាមួយក៏ដោយ។
លោក-អ្នកត្រូវជ្រើសរើសទីតាំងណាមួយ ដែលកំពុងអភិវឌ្ឍខ្លាំង ឬមានគម្រោងអភិវឌ្ឍនាពេលអនាគតដ៏ខ្លី តំបន់ដែលដីអាចឡើងថ្លៃ តំបន់ឧស្សាហកម្ម(រោងចក្រ) ឬតំបន់ពាណិជ្ជកម្ម ហើយទាក់ទាញការអភិវឌ្ឍខ្លាំងជាដើម។
ប្រសិនបើលោកអ្នកមិនអាចជ្រើសរើសទីតាំងល្អ និងមានសក្តានុពលល្អដោយខ្លួនឯងបាន លោកអ្នកគួរពឹងពាក់អ្នកជំនាញផ្នែកអចលនទ្រព្យណាម្នាក់ ដើម្បីផ្តល់ការប្រឹក្សាយោបល់ជូនអ្នក។
២) ភាពស្របច្បាប់នៃការអភិវឌ្ឍគម្រោង៖
តើគម្រោងនោះ មានច្បាប់ទម្លាប់ត្រឹមត្រូវហើយ ឬនៅ? មុនពេលលោក-អ្នកទិញផ្ទះពីគម្រោងណាមួយ លោក-អ្នកត្រូវស៊ើបសួររកច្បាប់ទម្លាប់ពីម្ចាស់គម្រោង ឬអ្នកលក់ជាមុនសិន។ បើមានមន្ទិលសង្ស័យលើគម្រោងនោះ លោក-អ្នកត្រូវស្រាវជ្រាវឲ្យច្បាស់លាស់ ពីគម្រោងនោះដោយខ្លួនឯង ឬជួលអ្នកជំនាញផ្នែកស្រាវជ្រាវគម្រោង ឬអ្នកស្រាវជ្រាវណាមួយក៏ដោយ ដែលលោកអ្នកទុកចិត្តឲ្យសិក្សា និងស្រាវជ្រាវពីច្បាប់ទម្លាប់នៃការអភិវឌ្ឍគម្រោងនោះ មានដូចជា៖ តើគម្រោងនោះ បានធ្វើការចុះបញ្ជីក្រុមហ៊ុនហើយឬនៅ? មានប័ណ្ណប៉ាតង់ទេ? មានអាជ្ញាប័ណ្ណអភិវឌ្ឍលំនៅដ្ឋានទេ? មានច្បាប់សាងសង់ទេ? ជាដើម។
លោក-អ្នក អាចស៊ើបសួររឿងទាំងអស់នេះបានពីមន្ត្រី ឬអាជ្ញាធរមូលដ្ឋាន(ថ្នាក់ភូមិ ឃុំ-សង្កាត់ ស្រុក-ខណ្ឌ) រហូតដល់សុរិយោដីស្រុក-ខណ្ឌ ខេត្ត-ក្រុង និងនៅក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ សាលាខេត្ត-ក្រុងជាដើម និងអាជ្ញាធរ ឬស្ថាប័នពាក់ព័ន្ធមួយចំនួនទៀត ពាក់ព័ន្ធនឹងការអភិវឌ្ឍលំនៅដ្ឋាននេះ។
ចំណាំ៖ ជាគោលការណ៍ ប្រសិនបើគម្រោងលំនៅដ្ឋានដែលលោកអ្នកចង់ទិញនោះ ជាគម្រោងស្របច្បាប់ គេតែងដាក់តាំង(ភ្ជួរ) នៅក្នុងការិយាល័យលក់ នូវច្បាប់ទម្លាប់ទាំងអស់នោះ ឲ្យអតិថិជនមើលឃើញជាសាធារណៈ មានដូចជា៖វិញ្ញាបនបត្របញ្ជាក់ការចុះឈ្មោះក្នុងបញ្ជីពាណិជ្ជកម្ម ប័ណ្ណប៉ាតង់ លិខិតអនុញ្ញាតសាងសង់ លិខិតអនុញ្ញាតបើកការដ្ឋានសាងសង់ អាជ្ញាប័ណ្ណអភិវឌ្ឍអចលនទ្រព្យ វិញ្ញាបនបត្រសម្គាល់ម្ចាស់អចលនវត្ថុជាដើម។
៣) ប័ណ្ណកម្មសិទ្ធិដីធ្លី៖
ជាការពិតណាស់ រឿងមួយដែលលោក-អ្នកត្រូវតែចង់ចាំ គឺថារាល់ការអភិវឌ្ឍគម្រោងលំនៅដ្ឋានដែលស្របច្បាប់ ត្រូវតែធ្វើឡើងលើទីតាំងដីមួយកន្លែង ដែលមានប្លង់រឹង ជាដាច់ខាត ដែលអាចជា(វិញ្ញាបនបត្រសម្គាល់ម្ចាស់អចលនទ្រព្យ ឬប័ណ្ណសម្គាល់សិទ្ធិកាន់កាប់អចលនទ្រព្យ)។ ប្រសិនបើដីទាំងមូល ដែលយកមកអភិវឌ្ឍជាគម្រោងនោះ មិនមានប្លង់រឹង គឺគេមិនអាចស្នើសុំច្បាប់សាងសង់លំនៅដ្ឋាន ដើម្បីដាក់លក់ជូនអតិថិជនបានទេ។
ប័ណ្ឌបំបែកក្បាលដី
លោក-អ្នកគួរតែទិញផ្ទះ ពីគម្រោងលំនៅដ្ឋានណាមួយដែលមានប្លង់រឹង ហើយបានបំបែកក្បាលដីរួចជាស្រេច សម្រាប់ទុកកាត់ឈ្មោះជូនអតថិជន (អ្នកទិញ) នៅពេលដែលអតិថិជនបង់លុយគ្រប់លក្ខខណ្ឌ។ មូលហេតុសំខាន់មួយទៀត ប្រសិនបើដីរបស់គេមានប្លង់រឹង តែគេមិនកាត់ឈ្មោះប្លង់រឹងឲ្យអ្នកទិញ គឺកាត់ឈ្មោះត្រឹម ឃុំ-សង្កាត់ ឬស្រុក-ខណ្ឌ លោក-អ្នកមិនគួរទិញផ្ទះពីគម្រោងនោះទេ ដោយហេតុផលថា ដីរបស់គម្រោងទាំងមូលនោះ ប្រហែលជាត្រូវជាប់ធនាគារបាត់ទៅហើយ ឬជាប្លង់ក្លែងក្លាយជាដើម។
៤) គម្រោងខ្យល់៖
ពាក្យថា«គម្រោងខ្យល់»នៅទីនេះ មានច្រើនរូបភាព មានដូចជា៖គម្រោងខ្លះ អត់មានទាំងរៀបចំឧបករណ៍ និងសម្ភារទីផ្សារ ប្លង់ស្ថាបត្យកម្មនៃសំណង់លំនៅដ្ឋានរបស់ខ្លួន ហើយចេះតែមកលក់ មានតែដីទទេ និងធ្វើជាឈូសឆាយបន្តិចបន្តួច។ គម្រោងខ្លះ ក៏មានធ្វើជាបុកគ្រឹះចោល ឲ្យគេមើលប៉ុណ្ណោះ អត់មានទុន អត់មានផែនការ អត់មានយុទ្ធសាស្ត្រ (ទាំងយុទ្ធសាស្ត្រលក់ យុទ្ធសាស្ត្រគ្រប់គ្រង និងការដឹកនាំ )ជាដើម។
គ្រាន់តែបោះពុម្ពក្រដាសផ្សព្វផ្សាយបន្តិចបន្តួច ក្រុមលក់ ៤-៥នាក់ ក៏តាំងផ្តើមលក់គម្រោងលំនៅដ្ឋានរបស់ខ្លួនលក់ ១ឆ្នាំ ដាច់បាន៥-១០ផ្ទះ ដល់កាលបរិច្ឆេទកំណត់ ត្រូវប្រគល់ផ្ទះឲ្យអតិថិជនតើត្រូវធ្វើដូចម្តេច? លុយមិនគ្រប់គ្រាន់ក្នុងការអភិវឌ្ឍ អាងលើការបញ្ជាទិញរបស់អតិថិជន ចុះបើលក់មិនដាច់តាមការរំពឹងទុក វានឹងមានរឿងអ្វីកើតឡើង? បើមិនទុកចិត្ត កុំទិញផ្ទះពីគម្រោងណាមួយ ដែលមិនច្បាស់លាស់។
គម្រោងខ្លះអភិវឌ្ឍក្នុងរូបភាពចូលហ៊ុនគ្នា ដោយយកដីរបស់អ្នកផ្សេងយកមកអភិវឌ្ឍជាគម្រោង លំនៅដ្ឋាន(ធ្វើផ្ទះល្វែងលក់)។ ប៉ុន្តែដល់ធ្វើមិនបានជោគជ័យ គ្មានលុយបង្វិលជូនម្ចាស់ដី ហើយគម្រោងត្រូវជាប់គាំង។ ក្នុងករណីនេះ តើអតិថិជនដែលបានបញ្ជាទិញរួចហើយ ត្រូវគិតយ៉ាងម៉េច? នេះជា«ហានិភ័យ» ដែលអតិថិជនខ្លះ ផ្ទះក៏មិនបាន លុយក៏យកវិញមិនបាន។ តើត្រូវធ្វើដូចម្តេច? មានតែប្តឹងផ្តល់ ប៉ុន្តែប្ដឹងផ្តល់ហើយ បានអ្វីមកវិញ? ខាតលុយ និងពេលវេលា ថែមទៀត។
៥) តម្លៃផ្ទះ និងលក្ខខណ្ឌបង់ប្រាក់៖
តម្លៃផ្ទះ និងលក្ខខណ្ឌបង់ប្រាក់ ក៏ជាប្រការសំខាន់ណាស់ដែរ ដែលអ្នកទិញគួរតែពិនិត្យ និងជ្រើសរើសឲ្យបានត្រឹមត្រូវ។ គម្រោងមួយចំនួន តម្លៃផ្ទះក៏ថ្លៃ លក្ខខណ្ឌបង់ប្រាក់ក៏តឹង បូករួមនឹងការប្រាក់ថ្លៃទៀត មិនសមនឹងទីតាំង។ អ្វីដែលគួរឲ្យកត់សម្គាល់ជាងគេ គឺករណីការប្រាក់ សម្រាប់លោក-អ្នកទិញផ្ទះទុកលក់យកចំណេញ មិនគួរទិញផ្ទះបង់រំលស់ ដោយមានជាប់ការប្រាក់នោះទេ ព្រោះបច្ចុប្បន្ន តម្លៃផ្ទះក្នុងមួយឆ្នាំៗឡើងបានតិចណាស់ ចន្លោះពី ១០-២០%ប៉ុណ្ណោះ។ បើលោក-អ្នកទិញផ្ទះបង់រំលស់ ដោយមានអត្រាការប្រាក់ ១% ក្នុងមួយខែ គឺលោក-អ្នក ត្រូវចំណាយអស់ ១២% ក្នុងមួយឆ្នាំទៅហើយ។
ដូច្នេះ មានន័យថា លោក-អ្នកស្ទើតែអស់ប្រាក់ចំណេញទៅហើយ ហើយផ្ទះបច្ចុប្បន្នទៀតសោត លក់ចេញមិនសូវដាច់ទៀត ប្រហែលជាលោកអ្នកត្រូវខាតបង់ប្រាក់ ក្នុងការបង់ការប្រាក់ ជូនម្ចាស់គម្រោង ហើយក្តីសង្ឃឹមលើប្រាក់ចំណេញ ហាក់នៅឆ្ងាយទៅហើយ។ មួយវិញទៀតប្រសិនបើលោក-អ្នកទិញផ្ទះនៅកន្លែងខ្លះ មិនមានប្រាក់ចំណេញទៀត។ ដូច្នេះ ការទិញផ្ទះ មិនមែនឲ្យតែឮគេថា ទិញចំនេញ ឬល្អ ក៏ទិញភ្លាមនោះមិនកើតទេ គឺត្រូវវិភាគ និងពិនិត្យពិច័យឲ្យបានច្បាស់លាស់។
៦) ព័ត៌មានបំប៉ោង ឬបោកប្រាស់៖
គម្រោងមួយចំនួន ចូលចិត្តប្រើប្រាស់ព័ត៌មានបំប៉ោង ឬបោកប្រាស់អតថិជន តាមរយៈរូបភាពបង្កើតជាគម្រោងផ្សារនៅក្នុងគម្រោងរបស់ខ្លួន មានកន្លែងកម្សាន្ត មានរមណីយដ្ឋាន កន្លែងហាត់ប្រាណ សាលារៀន សួនលំហែកាយជាដើម។ល។ ប៉ុន្តែធាតុពិត ពួកគេដឹងច្បាស់ណាស់ថា មិនអាចដំណើរការផ្សារ ឬគម្រោងនានា ដែលបានអះអាងនោះបានដោយស្រួលឡើយ។ ព្រោះគម្រោងរបស់គេ ជាគម្រោងខ្នាតតូច មិនគ្រប់តម្រូវការនៃការអភិវឌ្ឍជាផ្សារ ឬរមណីយដ្ឋាន ដូចដែលពួកគេបានលើកឡើងនោះទេ។ ណាមួយ ការដំណើរការផ្សារមួយ មិនមែនជារឿងងាយស្រួល ដូចការផ្សព្វផ្សាយនោះទេ គឺត្រូវមានធនធានលុយកាក់ មានអ្នកគ្រប់គ្រង និងដឹកនាំដំណើរការច្បាស់លាស់ ត្រូវមានផែនការ និងយុទ្ធសាស្ត្រ ដោយមានទាំងអ្នកលក់ក្នុងផ្សារ និងអ្នកទិញប្រសព្វគ្នា ទើបអាចដំណើរការទៅរួច។
៧) ហេដ្ឋារចនាសម្ព័ន្ធគម្រោង៖
មានគម្រោងមួយចំនួន បានអភិវឌ្ឍហេដ្ឋារចនាសម្ព័ន្ធមិនត្រឹមត្រូវតាមស្តង់ដារបុរី ឬគម្រោងលំនៅដ្ឋានឡើយ ដោយធ្វើផ្លូវត្រឹមតែ ៦ម៉ែត្រ ឬត្រឹម ៨ម៉ែត្រ ប៉ុន្តែមិនទុកចំណីផ្លូវមុខផ្ទះឡើយ គឺមានតែតួផ្លូវ ៨ម៉ែត្រ។ រីឯផ្ទះធ្វើដល់គែមផ្លូវតែម្តង ឬសល់ត្រឹម ១ ម៉ែត្រ ដល់គែមផ្លូវតែម្តង។ ចំណែកការអភិវឌ្ឍក្នុងគម្រោងវិញ យឺតយ៉ាវហួសពីការស្មាន ម្តងលើកទៅថ្ងៃនេះ ម្តងលើកទៅថ្ងៃនោះ ជាដើម។
មួយវិញទៀត ប្រព័ន្ធលូបង្ហូរទឹក ក៏មិនបានរៀបចំត្រឹមត្រូវតាមស្តង់ដារ។ នេះជាហេតុផលមួយ ដែលអ្នកទិញគួរពិនិត្យពិច្ច័យ ឲ្យបានច្បាស់លាស់មុនពេលទិញផ្ទះពីគម្រោងនោះ។
៨) អ្នកអភិវឌ្ឍគម្រោង និងប្រវត្តិនៃការអភិវឌ្ឍអចលនទ្រព្យ៖
ដោយសារតែបទពិសោធន៍កន្លងមក ច្រើនជួបបញ្ហាទៅលើអ្នកអភិវឌ្ឍគម្រោងដែលមិនមានបទពិសោធន៍ មិនធ្លាប់ធ្វើផ្ទះលក់ មិនធ្លាប់រកស៊ីក្នុងវិស័យលំនៅដ្ឋាន ហើយម្យ៉ាងគាត់មិនមានដើមទុនគ្រប់គ្រាន់ និងមិនមានធនធានគ្រប់គ្រាន់ទៀតនោះ ច្រើនតែធ្វើឲ្យគម្រោងរបស់គាត់មានបញ្ហាជានិច្ចកាល។
ដូច្នេះអ្នកទិញ គួរចេះប្រយ័ត្នប្រយែងឲ្យបានល្អ មុននឹងទិញផ្ទះពីម្ចាស់គម្រោងណាមួយដែលមិនមានប្រវត្តិច្បាស់លាស់។
៩) កម្មសិទិ្ធនៃគម្រោង និងអ្នកអភិវឌ្ឍ
ជាការល្អ អ្នកគួរតែទិញផ្ទះពីគម្រោងណាមួយ ដែលមានឈ្មោះម្ចាស់គម្រោងនៅលើប័ណ្ណកម្មសិទ្ធិដីធ្លី ប្រសើរជាជាងទិញផ្ទះពីគម្រោងណាមួយ ដែលម្ចាស់គម្រោងឈ្មោះផ្សេង ឯម្ចាស់ដីឈ្មោះផ្សេងៗ ទោះបីជាពួកគាត់ធ្វើក្នុងនាមចូលហ៊ុនគ្នាក៏ដោយចុះ។ ព្រោះថាការរកស៊ីចូលហ៊ុន ឬសហការគ្នា ម្នាក់មានដី ម្នាក់មានលុយអភិវឌ្ឍ ឬម្នាក់មានជំនាញអភិវឌ្ឍគម្រោងនេះច្រើនជួបបញ្ហា។
បញ្ហាដែលជួបប្រទះកន្លងមកនេះ គឺបញ្ហាទូទាត់លុយមិនសមស្រប តាមការព្រមព្រៀងគ្នា ឬទូទាត់លុយមិនទាន់ ឬអត់មានលុយទូទាត់ជូនម្ចាស់ដីតែម្តង។ ដូច្នេះបើលោក-អ្នកទិញផ្ទះចំគម្រោងបែបនេះ ប្រហែលជាអាចនឹងជួបបញ្ហាច្រើនជាងមិនជួបបញ្ហា ដូចរឿងរ៉ាវដែលកើតឡើងកន្លងមក ហើយរឿងដែលកើតឡើងញឹកញាប់ធ្វើឲ្យគម្រោងមានបញ្ហា គឺរឿងលុយកាក់បង្វិលមិនទាន់ អ្នកអភិវឌ្ឍគម្រោង និងម្ចាស់ដីមានទំនាស់នឹងគ្នា ធ្វើឲ្យគម្រោងមានបញ្ហា អ្នកទទួលរងគ្រោះ គឺអតិថិជនដែលបានបញ្ជាទិញ។
១០) ជ្រើសរើសគម្រោង ១ ក្នុងចំណោម ៥៖
ដើម្បីទិញផ្ទះឲ្យបានត្រឹមត្រូវ លោក-អ្នកត្រូវពិនិត្យមើលគម្រោង យ៉ាងតិច ៥ មកជ្រើសរើស ហើយពិចារណាគម្រោងត្រឹម ៣ ហើយចុងក្រោយជ្រើសរើសយកតែមួយ។
បើលោក-អ្នកអាចធ្វើតាមការណែនាំនេះបាន លោក-អ្នកមិនងាយទិញផ្ទះខុសទេ។ ការដែលធ្វើដូច្នេះ គឺជួយលោក-អ្នកឲ្យធ្វើការសម្រេចចិត្តទិញផ្ទះបានត្រឹមត្រូវ តាមរយៈវិធីប្រៀបធៀប ទីតាំងគម្រោង តម្លៃ និងលក្ខខណ្ឌបង់ប្រាក់ អត្រាការប្រាក់ គុណភាពសំណង់ ម៉ូដផ្ទះ សោភ័ណភាពនៃគម្រោង ច្បាប់ទម្លាប់នៃគម្រោងជាដើម។ នៅពេលពិនិត្យឃើញច្បាស់ថា គម្រោងមួយណាសមរម្យជាងគេ គឺលោក-អ្នក ត្រូវជ្រើសរើសយកគម្រោងមួយនោះ ហើយដើម្បីទិញផ្ទះតាមក្តីសុបិនរបស់លោក-អ្នក បានត្រឹមត្រូវ។
ដូច្នេះ ដើម្បីទិញផ្ទះបានត្រឹមត្រូវ លោក-អ្នកអាចធ្វើតាមការណែនាំខាងលើ នោះប្រាកដណាស់ លោក-អ្នកមិនងាយនឹងបាត់បង់ផលប្រយោជន៍ ឬជួបហានិភ័យណាមួយពីការទិញផ្ទះឡើយ៕
(ប្រភព៖
https://www.realestate.com.kh/km/guides/how-to-buy-the-right-home-in-cambodia/
)
(អត្ថបទពាណិជ្ជកម្ម)
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
© រក្សាសិទ្ធិដោយ thmeythmey.com
Your browser does not support iframes.
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
3 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
4 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
4 ម៉ោង
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
2 ថ្ងៃ
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
6 ថ្ងៃ
អត្ថបទពេញនិយមបន្ថែម