ភ្ជុំបិណ្ឌ៖ ពលរដ្ឋជាង២ម៉ឺននាក់ធ្វើដំណើរតាមរថយន្តក្រុងសាធារណៈ

ជាតិ

បុណ្យភ្ជុំបិណ្ឌ

សង្គមជាតិ

ភ្ជុំបិណ្ឌ៖ ពលរដ្ឋជាង២ម៉ឺននាក់ធ្វើដំណើរតាមរថយន្តក្រុងសាធារណៈ

01, Oct 2019 , 10:39 pm

រូបភាព

ពលរដ្ឋដែលធ្វើដំណើរទៅតាមបណ្តាខេត្ត ដោយរថយន្តក្រុងសាធារណៈ នៅថ្ងៃទី២៧ ខែកញ្ញា ឆ្នាំ២០១៩ រូបភាពពីរដ្ឋាករស្វយ័តដឹកជញ្ជូនសាធារណៈរថយន្តក្រុង

ដោយ:

ភ្នំពេញ៖ គិតចាប់ពីថ្ងៃទី២៦-២៩ ខែកញ្ញា មានពលរដ្ឋជាង២ម៉ឺននាក់ បានធ្វើដំណើរទៅតាមរាជធានីខេត្តក្រុង ដោយរថយន្តក្រុងសាធារណៈចំនួន១២០គ្រឿង របស់រដ្ឋាករស្វយ័តដឹកជញ្ជូនសាធារណៈរថយន្តក្រុង។ នេះបើតាមការបញ្ជាក់ពីលោក អ៊ាន សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង។

លោក អ៊ាន សុខឃីម អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង បានបញ្ជាក់ប្រាប់អ្នកសារព័ត៌មានថ្មីៗតាមទូរសព្ទថា ចំនួនពលរដ្ឋដែលធ្វើដំណើរដោយរថយន្តក្រុងសាធារណៈ ទៅតាមបណ្តាខេត្ត និងត្រឡប់មកភ្នំពេញវិញក្នុងរយៈពេល៤ថ្ងៃនៃបុណ្យភ្ជុំបិណ្ឌនេះ មានសរុបចំនួន២៣៦៣៥នាក់។ ចំណែកអ្នកធ្វើដំណើរតាមកាណូតមានចំនួន៦៣៤នាក់។

អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុងរូបនេះបានអះអាងថា ចំនួនពលរដ្ឋដែលធ្វើដំណើរដោយរថយន្តក្រុងសាធារណៈច្រើនជាងគេគឺ ខេត្តបាត់ដំបង និងខេត្តបន្ទាយមានជ័យ។ ជាក់ស្តែងនៅថ្ងៃដំបូងនៃដំណើរការជិះរថយន្តក្រុងដោយឥតគិតថ្លៃ រដ្ឋាករស្វយ័តបានបន្ថែមរថយន្តក្រុងចំនួន៥៤គ្រឿង សម្រាប់ផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ដោយថយន្តក្រុងកំណត់មានត្រឹមតែ៤៥គ្រឿង។

បើតាមលោក អ៊ាន សុខឃីម បុគ្គលិកដែលបម្រើការងារជាអ្នកបើកបររថយន្តក្រុងសាធារណៈនៅថ្ងៃបុណ្យភ្ជុំបិណ្ឌមានសរុបចំនួន២៣៤នាក់។ រូបលោកបានបញ្ជាក់ថា ក្នុងមួយគ្រឿងមានបុគ្គលិកចំនួន២នាក់ ម្នាក់ជាអ្នកបើកបរ និងម្នាក់ទៀតជាប្រូឡាន។

សូមបញ្ជាក់ថា ក្នុងឱកាសពិធីបុណ្យភ្ជុំបិណ្ឌកន្លងនេះ រដ្ឋបាលរាជធានីភ្នំពេញ បានរៀបចំរថយន្តក្រុងសាធារណៈចំនួន ១២០គ្រឿង សម្រាប់ដឹកជញ្ជូនប្រជាពលរដ្ឋពីរាជធានីភ្នំពេញ ទៅតាមបណ្ដាខេត្តនានា ដោយឥតគិតថ្លៃ រយៈពេល៥ថ្ងៃ ពីថ្ងៃទី២៦-៣០ ខែកញ្ញា៕