ជាតិ
សេដ្ឋកិច្ច
រដ្ឋាភិបាលនៅតែបន្តយកថ្លៃទិដ្ឋាការពីទេសចរ
× ភ្នំពេញ៖ រដ្ឋាភិបាលមិនសម្រេចតាមការស្នើសុំរបស់អ្នករកស៊ីឯកជនដែលចង់ឲ្យលើកលែងទិដ្ឋាការដល់ទេសចរអន្តរជាតិក្រៅពីអាស៊ាន នោះឡើយ។ នេះបើតាមការលើកឡើងរបស់ប្រមុខរដ្ឋាភិបាលសម្ដេច ហ៊ុន សែន ក្នុងពិធីប្រគល់សញ្ញាបត្រនិស្សិតសាកលវិទ្យាប៊ែលធីអន្តរជាតិ នៅថ្ងៃទី២ខែតុលានេះ។
ប្រសាសន៍សម្ដេច ហ៊ុន សែន ៖
«អ្នកខ្លះសំណូមពរឲ្យដក កុំយកទិដ្ឋាការ តែទេសចរ គេមិនរើសអើងរឿងបញ្ហា៣០ដុល្លារនោះទេ។ យើងទៅប្រទេសគេរាប់រយដុល្លារ។ យើងអត់ទាន់មានអ្វីជំនួសទេ ក្រែងលើត្រីរ៉ស់ក៏រួច ទន្សាយក៏រួច»។ សម្ដេច ហ៊ុន សែន ថ្លែងបែបនេះក្នុងពិធីប្រគល់សញ្ញាបត្រខាងលើ។
ការលើកឡើងរបស់សម្ដេចនៅពេលនេះ គឺឆ្លើយតបនឹងការស្នើកន្លងមករបស់អ្នករកស៊ីមួយចំនួនក្នុងវិស័យទេសចរណ៍ ដែលចង់ឲ្យរដ្ឋាភិបាលអនុគ្រោះទិដ្ឋាការដើម្បីទាក់ទាញទេសចរណ៍អន្តរជាតិ។
នាពេលថ្មីៗកន្លងមកនេះ រដ្ឋមន្ត្រីក្រសួងទេសចរណ៍ លោក ថោង ខុន ក៏បានពន្យល់ពីមូលហេតុដែលរដ្ឋាភិបាលមិនទាន់អាចឈានដល់ការលើកលែងទិដ្ឋាការនេះដែរ។ លោកប្រាប់ថា លុះណាកម្ពុជាមានការតភ្ជាប់ជើងហោះហើរទូលំទូលាយទៅបណ្ដាប្រទេសទាំងនោះ មានផលិតផលទេសចរណ៍សម្បូរបែប ទើបរដ្ឋាភិបាលពិចារណារឿងលើកលែងទិដ្ឋាការនេះ។ បើមិនដូច្នោះទេ លោក ថោង ខុន បញ្ជាក់ថា ការលើកលែងទិដ្ឋាការនៅពេលនេះ នឹងធ្វើបាត់បង់ចំណូលជាតិ ហើយលំហូរទេសចរក៏មិនកើនខ្លាំងដែរ ដូចពាក្យថាត្រីរ៉ស់ក៏រួច ទន្សាយក៏រួច៕
Tag:
ហ៊ុន សែន
ទិដ្ឋាការ
© រក្សាសិទ្ធិដោយ thmeythmey.com