នាយករដ្ឋមន្ត្រី ព្រមានចំពោះអ្នកដែលចូលរួមយុទ្ធនាការ«ម្រាមដៃ៩» ជាមួយលោក សម រង្ស៊ី

ជាតិ

នាយករដ្ឋមន្ត្រី ព្រមានចំពោះអ្នកដែលចូលរួមយុទ្ធនាការ«ម្រាមដៃ៩» ជាមួយលោក សម រង្ស៊ី

02, Oct 2019 , 10:39 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ពលរដ្ឋណា ដែលចូលរួមសកម្មភាពនៃយុទ្ធនាការ«ម្រាមដៃ៩» តាមការអំពាវនាវរបស់លោក សម រង្ស៊ី មេដឹកនាំអតីតគណបក្សសង្គ្រោះជាតិ នឹងត្រូវប្រឈមមុខផ្លូវច្បាប់។ នេះជាការព្រមានរបស់សម្ដេចនាយករដ្ឋមន្ត្រី ហ៊ុន សែន ថ្លែងនៅក្នុងពិធីចែកសញ្ញាបត្រនិស្សិតប៊ែលធី នៅព្រឹកថ្ងៃទី២ តុលា។

សម្ដេច ហ៊ុន សែន បានចាត់ទុកយុទ្ធនាការ«ម្រាមដៃ៩» របស់លោក សម រង្ស៊ី នេះ គឺជាការផ្ដួលរំលំរដ្ឋាភិបាល ដែលមិនអាចលើកលែងបាន។ សម្រាប់លោកនាយករដ្ឋមន្ត្រី យុទ្ធនាការនេះ មិនមែនជាសិទ្ធិបញ្ចេញមតិទេ ប៉ុន្តែវាជារដ្ឋប្រហារទៅវិញ។

មិនត្រឹមតែប៉ុណ្ណឹងទេ ប្រមុខរដ្ឋាភិបាល ក៏បានហាមពលរដ្ឋ ចូលរួមសកម្មភាពនៃយុទ្ធនាការ«ម្រាមដៃ៩» តាមការអំពាវនាវរបស់លោក សម រង្ស៊ី មេដឹកនាំអតីតគណបក្សសង្គ្រោះជាតិផងដែរ។ «ខ្ញុំសូមផ្ដែផ្ដាំ អ្នកណាក៏ដោយ ឱ្យតែធ្វើយុទ្ធនាការ នឹងត្រូវជាប់បទចោទតាមក្រមព្រហ្មទណ្ឌតាមច្បាប់ថ្មី ។ អ៊ីចឹងកុំឱ្យសោះណា (ធ្វើ)យុទ្ធនាការម្រាម៩ ។ បើចង់ធ្វើយុទ្ធនាការម្រាម៩ កាត់ម្រាម១ក្រវាត់ចោលទៅ»។ នេះជាការបញ្ជាក់របស់សម្ដេច ហ៊ុន សែន ដែលបានបន្ថែមថា អ្នកដែលចូលរួមសកម្មភាពយុទ្ធនាការ«ម្រាមដៃ៩» នឹងប្រឈមមុខបទចោទ«ឧបឃាត»។

កាលពីថ្ងៃទី២៦ កញ្ញា អយ្យការអមសាលាដំបូងរាជធានីភ្នំពេញ បានចោទប្រកាន់លោក សម រង្ស៉ី និងបក្ខពួក៨នាក់ផ្សេងទៀត ពីបទ «ឧបឃាត» ពាក់ព័ន្ធការប៉ុនប៉ងធ្វើរដ្ឋប្រហារ ផ្ដួលរំលំរាជរដ្ឋាភិបាល ក្រោមឧបាយកលជាផែនការនៃការវិលត្រឡប់ចូលប្រទេសកម្ពុជា ។ តុលាការសង្កត់ធ្ងន់ថា ផែនការដែលមានក្នុងអង្គហេតុខាងលើ គឺជាឧក្រិដ្ឋកម្មប៉ះពាល់ធ្ងន់ធ្ងរ ដល់សន្តិសុខ នៃរដ្ឋ ។ ចំណែកអ្នកពាក់ព័ន្ធនឹងការគាំទ្រ ឬចូលរួមអនុវត្តផែនការប៉ុនប៉ងធ្វើរដ្ឋប្រហារខាងលើនេះ នឹងត្រូវប្រឈមមុខ នឹងការចោទប្រកាន់បញ្ជូនទៅតុលាការកាត់ទោស តាមច្បាប់ពី «បទរួមគំនិតក្បត់» ដែលអាចមានទោសពី ៥ឆ្នាំ ទៅ២០ឆ្នាំ តាមមាត្រា៤៥៣ នៃក្រមព្រហ្មទណ្ឌ លើកលែងអ្នកពាក់ព័ន្ធទាំងនោះ បានចូលមកសារភាព បានទាន់ពេលវេលា ដែលអាចនឹងត្រូវលើកលែងអោយរួចពីទោសតាមបញ្ញត្តិពិសេស នៃមាត្រា៤៥៤ នៃក្រមព្រហ្មទណ្ឌ។

ក្រៅពីលោក សម រង្ស៉ី មនុស្ស៨ទៀត ដែលតុលាការចោទប្រកាន់នេះ រួមមានលោក អេង ឆៃអ៊ាង,លោកស្រី មូរ សុខហួរ, លោក អ៊ូ ច័ន្ទឬទ្ធិ, លោក ហូរ វ៉ាន់, លោក ឡុង រឺ, លោក ម៉ែន សុថាវរិន្ទ្រ, លោក នុត រំដួល និងភរិយាលោក សម រង្ស៊ី គឺលោកស្រី ជូឡុង សូមួរ៉ា ព្រមទាំងគូកន ពីបទឧបឃាត ដោយយោងតាមមាត្រា៤៥១ នៃក្រមព្រហ្មទណ្ឌ នៃព្រះរាជាណាចក្រកម្ពុជា ដែលអាចមានទោសពី ១៥ឆ្នាំ ទៅ៣០ឆ្នាំ។

មេដឹកនាំអតីតគណបក្សប្រឆាំងលោក សម រង្ស៊ី បានប្រកាសចូលប្រទេសកម្ពុជាវិញ នៅថ្ងៃទី៩ វិច្ឆិកា ដោយអមជាមួយការអំពាវនាវឱ្យគាំទ្រខ្លួន រង់ចាំទទួលលោកទៀតផង។ តបនឹងការអំពាវនាវរបស់មេដឹកនាំនៃអតីតបក្សប្រឆាំងនេះ លោកនាយករដ្ឋមន្ត្រី ហ៊ុន សែន ក៏បានប្រកាសឱ្យពលរដ្ឋរៀបចំពិធីទទួលទានអំបុកសាមគ្គី ទូទាំងប្រទេស ក្រោមហេតុផលការពារជាតិ សាសនា ព្រះមហាក្សត្រ។ សម្ដេច ហ៊ុន សែន ធ្លាប់ទទួលបានជោគជ័យម្ដងហើយ លើការអំពាវនាវឱ្យពលរដ្ឋរៀបចំទិវាបរិភោគនំបញ្ចុកសាមគ្គី កាលពីថ្ងៃទី៩ មិថុនា នៅគ្រាដែលលោក សម រង្ស៊ី ប្រកាសបរិភោគនំបញ្ចុកនេះ ក្រោមហេតុផលថែរក្សាវប្បធម៌ប្រពៃណី ម្ហូបអាហារខ្មែរ ក៏ដូចជាការរួបរួមគ្នា និងសាមគ្គីគ្នា៕

អត្ថបទទាក់ទង

តើមួយណាឆ្ងាញ់? នំបញ្ចុក CPP និងនំបញ្ចុកអតីត CNRP នៅថ្ងៃទី៩ មិថុនា