មូលនិធិ​កេរដំណែល​ខ្មែរ បង្កើត​កម្មវិធី​ទូរទស្សន៍​អន​ឡាញ​ដែល​ផ្តោតលើ​សក្តានុពល​វប្បធម៌ និង​ទេសចរណ៍​នៅ​កម្ពុជា​
ជាតិ
មូលនិធិ​កេរដំណែល​ខ្មែរ បង្កើត​កម្មវិធី​ទូរទស្សន៍​អន​ឡាញ​ដែល​ផ្តោតលើ​សក្តានុពល​វប្បធម៌ និង​ទេសចរណ៍​នៅ​កម្ពុជា​
04, Oct 2019 , 7:59 am        
រូបភាព
​ភ្នំពេញ​៖ ក្រុមការងារ​មូលនិធិ​កេរដំណែល​ខ្មែរ និង​ដៃគូ​សហការ​របស់ខ្លួន បាន​ផ្តួចផ្តើម​បង្កើត​កម្មវិធី​ទូរទស្សន៍​អន​ឡាញ «៥​នាទី ស្វែងយល់​អំពី​បេតិកភណ្ឌ​វប្បធម៌ និង​ទេសចរណ៍​នៅ​កម្ពុជា (5’ CAMBODIA - CULTURAL HERITAGE AND TRAVEL) ក្នុង​បំណង​ផ្សព្វផ្សាយ និង​ផ្ដល់ព័ត៌មាន​ដល់​អ្នកទស្សនា អំពី​អត្តសញ្ញាណ​ជាតិ ទាំង​រូបិយ និង​អ​រូបិយ រួមទាំង​ការបណ្តុះ​គំនិត​ដល់​ពលរដ្ឋ ឲ្យ​ចេះ​ស្រឡាញ់ និង​រួមគ្នា​ជួយ​លើកស្ទួយ ថែរក្សា​នូវ​តម្លៃ​នៃ​បេតិកភណ្ឌ​វប្បធម៌​របស់​ជាតិ​។ ដើម្បី​ទ្រទ្រង់​ការចាប់ផ្ដើម​ដំណើរ​ការផលិត មូលនិធិ​កេរដំណែល​ខ្មែរ បានប្រកាស​ស្វែងរក​សប្បុរសជន​ជួយឧបត្ថម្ភ​កម្មវិធីរ​បស់​ខ្លួន​។​



«៥​នាទី ស្វែងយល់​អំពី​បេតិកភណ្ឌ​វប្បធម៌ និង​ទេសចរណ៍​នៅ​កម្ពុជា​» នឹង​ផ្ដល់ព័ត៌មាន​ជូន​ដល់​ទស្សនិកជន ឲ្យ​បាន​ស្វែងយល់​អំពី​បេតិកភណ្ឌ​វប្បធម៌ ប្រពៃណី ជំនឿ ទំនៀមទម្លាប់ របស់​ប្រជាជន​កម្ពុជា ម្ហូបអាហារ សិល្បៈ ស្ថាបត្យកម្ម ប្រាង្គ​ប្រាសាទ វត្ត​អារាម បរិស្ថាន សត្វព្រៃ ទេសភាព​តាម​ដង​ទន្លេ ស្ទឹង បឹងបួរ ព្រែក ព្រមទាំង​ទីកន្លែង​ទេសចរណ៍ អេកូ​ធម្មជាតិ សំខាន់ៗ​នៅ កម្ពុជា​។ វីដេអូ ៥​នាទី​នេះ នឹង​ចាក់ផ្សាយ​តាម​បណ្តាញ​សង្គម​នានា និង​លើ​ផេ​ក​ហ្វេ​ស​ប៊ុ​ក​ផ្លូវការ​របស់​មូលនិធិ​កេរដំណែល​ខ្មែរ​។​

​កម្មវិធី​ទូរទស្សន៍​អន​ឡាញ «៥​នាទី ស្វែងយល់​អំពី​បេតិកភណ្ឌ​វប្បធម៌ និង​ទេសចរណ៍​នៅ​កម្ពុជា (5’ CAMBODIA - CULTURAL HERITAGE AND TRAVEL) ក៏​បង្ហាញ​អំពី​តំបន់​ទេសចរណ៍​ថ្មីៗ ព្រមទាំង​សក្តានុពល​នៃ​តំបន់​អេកូ​ទេសចរណ៍ បរិស្ថាន និង​សត្វព្រៃ ក៏ដូចជា​ការ​ផ្តល់នូវ​គន្លឹះ​សំខាន់ៗ​មួយចំនួន ដល់​អ្នកវិនិយោគទុន​ទាំង​ក្នុង និង​ក្រៅប្រទេស ដែលមាន​បំណង​ចង់​មក​ទស្សនា និង​អភិវឌ្ឍ​នៅតាម​តំបន់​ទេសចរណ៍​ទាំងនោះ​។ បន្ថែម​លើ​នេះ ទស្សនិកជន អាច​ស្វែងរក​ព័ត៌មាន​គ្រប់បែបយ៉ាង ដែល​ទាក់ទង​នឹង​ការងារ​ស្រាវជ្រាវ​ផ្នែក​បេតិកភណ្ឌ​វប្បធម៌ ទេសចរណ៍ សាសនា បរិស្ថាន បុរាណវិទ្យា ស្ថាបត្យកម្ម ប្រវត្តិសាស្ត្រ សិលា​ចារិក តាមរយៈ​កម្មវិធី​នេះ​ផងដែរ​។

​មូលនិធិ​កេរដំណែល​ខ្មែរ ត្រូវការ​ការជួយឧបត្ថម្ភ ដើម្បី​ចាប់ផ្តើម​ដំណើរ​ការផលិត​កម្មវិធី​ដ៏​មាន​សារសំខាន់​នេះ និង​ដើម្បី​រួមចំណែក​លើកស្ទួយ​ដល់​ការស្រាវជ្រាវ និង​ផ្សព្វផ្សាយ​លើ​វិស័យ បេតិកភណ្ឌ​វប្បធម៌ និង​ទេសចរណ៍​របស់​កម្ពុជា​។ សម្រាប់​ព័ត៌មាន​បន្ថែម និង​ការចូលរួម​វិភាគទាន​ឧបត្ថម្ភ​ដល់​កម្មវិធី​សូម​ទាក់ទង​អ៊ី​ម៉ែ​ល​៖ [email protected]

Tag:
 ចំណេះដឹង​
 ​សប្បុរសធម៌
© រក្សាសិទ្ធិដោយ thmeythmey.com