ជាតិ
សេដ្ឋកិច្ច
ការនាំចេញអង្កររយៈពេល៩ខែ ទៅអឺរ៉ុបធ្លាក់ចុះ៣០ភាគរយ តែកើនទៅចិន៤៤ភាគរយ រូបពីMC Smile Smile
× ភ្នំពេញ៖ ការនាំចេញអង្ករកម្ពុជាទៅទីផ្សារអន្តរជាតិសម្រេចបាន ៣៩,៨ ម៉ឺនតោន ក្នុងរយៈពេល៩ខែដើមឆ្នាំ២០១៩ ដែលកើនតិចតួច ពោលគឺកើន ២,៣ ភាគរយ បើធៀបនឹងរយៈពេលដូចគ្នាក្នុងឆ្នាំ២០១៨។ នេះបើតាមរបាយការណ៍របស់លេខាធិការដ្ឋានច្រកចេញចូលតែមួយសម្រាប់បំពេញបែបបទនាំចេញអង្ករ។
ក្នុងចំណោមការនាំចេញសរុបទាំង៣ត្រីមាសឆ្នាំ២០១៩នេះ ការនាំចេញអង្ករទៅអឺរ៉ុបធ្លាក់ចុះ ៣០ភាគរយ ខណៈតួលេខនាំទៅចិនកើន៤៤ភាគរយ។ ជាមួយគ្នានេះ ការនាំចេញទៅប្រទេសក្នុងតំបន់អាស៊ានកើនជាង២៧ភាគរយផងដែរ។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា(CRF) បានថ្លែងប្រាប់សារព័ត៌មានថ្មីៗ ថា ការនាំចេញអង្ករទៅអឺរ៉ុបធ្លាក់ចុះព្រោះវិធានយកពន្ធ Safeguard របស់សហភាពអឺរ៉ុបមកលើកម្ពុជា។ តែលោកបញ្ជាក់ថា ការធ្លាក់ចុះនាំចេញនៅទីផ្សារអឺរ៉ុបនេះ គឺធ្លាក់ចុះការនាំចេញប្រភេទអង្ករស ឯអង្ករក្រអូបនៅរក្សាទំហំប្រហាក់ប្រហែលមុន។
អគ្គលេខាធិការ CRF រូបនេះ ឲ្យដឹងថា ការនាំចេញសរុបមួយឆ្នាំ២០១៩ ត្រូវបានប៉ាន់ស្មានថានៅតែមានកំណើន តែមិនលើស១០ភាគរយ។ លោក លន់ យ៉េង ថ្លែងដូច្នេះថា៖«ស្ថានភាពនេះមើលទៅនៅមានកំណើនសម្រាប់ក្នុងឆ្នាំនេះ បើធៀបនឹងឆ្នាំមុន អាចមិនច្រើនជាង១០ភាគរយទេ កំណើនហ្នឹង»។
លោក លន់ យ៉េង ប្រាប់ថា មូលហេតុដែលនាំឲ្យវាយតម្លៃថាការនាំចេញអង្ករក្នុងឆ្នាំ២០១៩ នៅតែកើនឡើង ព្រោះកូតានាំទៅចិន ដែលជាអ្នកបញ្ជាទិញធំរបស់កម្ពុជា នៅសល់ច្រើន ពោលគឺ១៤ម៉ឺនតោនទៀត ដែលកម្ពុជានឹងជំរុញការនាំចេញនេះ។ ឆ្នាំ២០១៩នេះ កូតាដែលចិនបើកឲ្យនាំចេញអង្ករកម្ពុជាទៅទីផ្សារខ្លួនគឺ៣០ម៉ឺនតោន ហើយឆ្នាំក្រោយគឺទំហំ៤០ម៉ឺនតោន។
ក្នុងឆ្នាំ២០១៨ កន្លងទៅ កម្ពុជានាំចេញអង្ករជាង ៦២ម៉ឺនតោន ធ្លាក់ចុះ១,៥ភាគរយ។ គួរបញ្ជាក់ផងដែរថា ក្រៅពីនាំចេញអង្ករដែលកត់ត្រាក្នុងច្រកចេញចូលតែមួយខាងលើ កម្ពុជានាំចេញស្រូវអង្ករទៅប្រទេសជិតខាងយ៉ាងច្រើន។ ក្នុងអំឡុងពេល៩ខែឆ្នាំ២០១៩ ស្រូវអង្ករនាំទៅប្រទេសវៀតណាម និងថៃ មានបរិមាណ ១,៧លានតោន។ នេះបើតាមតួលេខរបស់ក្រសួងកសិកម្ម រុក្ខាប្រមាញ់ និងនេសាទ ៕
© រក្សាសិទ្ធិដោយ thmeythmey.com