អន្តរជាតិ
ជំនួបចរចាអាមេរិក-កូរ៉េខាងជើងនៅតែបន្ត ទោះក្រុមប្រឹក្សាសន្តិសុខនឹងបើកកិច្ចប្រជុំនៅសប្តាហ៍ក្រោយ រូបភាព (AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃទី៣ ខែតុលា បានអះអាងថា កិច្ចចរចារំសាយអាវុធនុយក្លេអ៊ែរកូរ៉េខាងជើងនៅតែបន្ត បើទោះបីជាទីក្រុងព្យុងយ៉ាងបានសាកល្បងមីស៊ីលប៉ាលីស្ទិកក៏ដោយ។ ការលើកឡើងលោក ត្រាំ ធ្វើមុនជំនួបចរចារវាងមន្ត្រីអាមេរិក និងកូរ៉េខាងជើងនៅស៊ុយអែតនាថ្ងៃទី៥ ខែតុលាខាងមុខ។ ចំណែកឯក្រុមប្រឹក្សាសន្តិសុខអង្គការសហប្រជាជាតិវិញ នឹងបើកកិច្ចប្រជុំបិទទ្វារបន្ទាន់មួយដើម្បីជជែកពីការសាកល្បងមីស៊ីលកូរ៉េខាងជើង។
បន្ទាប់ពីទីក្រុងព្យុងយ៉ាងបានប្រកាសថា ខ្លួនទទួលជោគជ័យយ៉ាងធំធេងលើការបាញ់មីស៊ីលប៉ាលីស្ទិកចេញពីនាវាមុជទឹក (SLBM) ប្រភេទថ្មី Pukguksong3 វាបានបង្កឲ្យមានការបារម្ភយ៉ាងខ្លាំងដល់សហគមន៍អន្តរជាតិ។ ប៉ុន្តែប្រធានាធិបតី ដូណាល់ ត្រាំ ថា ជំនួបចរចាអាមេរិក និងកូរ៉េខាងជើងនៅតែកើតមាន។
កិច្ចប្រជុំរំសាយកម្មវិធីនុយក្លេអ៊ែរកូរ៉េខាងជើងនៅតែបន្ត
«ពួកគេ [កូរ៉េខាងជើង] ចង់ចរចា ហើយយើងនឹងចរចាជាមួយពួកគេ»។ នេះជាការអះអាងរបស់លោក ត្រាំ បន្ទាប់ពីកូរ៉េខាងជើងបានសាកល្បងមីស៊ីលប៉ាលីស្ទិកប្រភេទថ្មី។ ប៉ុន្តែការលើកឡើងរបស់ប្រធានាធិបតីអាមេរិករូបនេះ ហាក់ដូចជាមិនបារម្ភអំពីសន្តិសុខពិភពលោកបន្តិចសោះ។ ពិតណាស់ វាមិនចម្លែកទេសម្រាប់លោក ត្រាំ ព្រោះកាលពីការសាកល្បងមីស៊ីលមុនៗ ប្រធានាធិបតីរូបនេះក៏បានបញ្ជាក់ដែរថា មិនមានបញ្ហាអ្វីទេលើការសាកល្បងមីស៊ីលចំងាយខ្លីបែបនេះ។
បើតាមអ្នកនាំពាក្យយោធាអាមេរិក Pat Ryder ការសាកល្បងមីស៊ីលរបស់កូរ៉េខាងជើងនាថ្ងៃទី២ ខែតុលា អាចជាមីស៊ីលប៉ាលីស្ទិកចំងាយខ្លី ឬមធ្យមតែប៉ុណ្ណោះ។ សម្រាប់ការសាកល្បងនេះទៀតសោត វាមិនមានអ្វីចង្អុលបង្ហាញទាល់តែសោះថា បាញ់ចេញពីនាវាមុជទឹក ប៉ុន្តែអាចជាការបាញ់ចេញពីជើងទម្រនៅលើទឹក។
ជំនួបចរចានៅទីក្រុងស្តុកខុល ប្រទេសស៊ុយអែត
ដូចជាអ្វីដែលគេបានរំពឹងទុក កិច្ចប្រជុំរវាងមន្ត្រីអាមេរិក និងកូរ៉េខាងត្បូងបានលេចរូបរាងឡើងនៅទីក្រុងស្តុកខុល ប្រទេសស៊ុយអែត។ បើតាមទីភ្នាក់ងារព័ត៌មានកូរ៉េខាងត្បូង Yonhap លោក Kim Myong-gil និងអ្នកតំណាងកូរ៉េខាងជើងផ្សេងទៀតបានទៅដល់ប្រទេសស៊ុយអែតហើយ នាម៉ោង៥ និង៤០ នាទីព្រឹកថ្ងៃទី៤ ខែតុលា។ ចំណែកខាងភាគីអាមេរិក លោក Stephen Biegun ត្រូវបានគេរំពឹងថា នឹងទៅដល់ឆាប់ៗនេះដែរ។ ភាគីទាំងពីរនឹងមានជំនួបជាមួយគ្នាមួយនៅថ្ងៃទី៤ ខែតុលា មុននឹងកិច្ចចរចាផ្លូវការនៅថ្ងៃទី៥ ខែតុលាមកដល់។
ជាការពិត កិច្ចចរចានៅទីក្រុងស្តុកខុល គឺជាលើកទីមួយហើយ ចាប់តាំងជំនួបរវាងត្រាំ និងគីម បរាជ័យនៅវៀតណាម ក៏ដូចជាជំនួបនៅតំបន់គ្មានយោធានៅឧបទ្វីបកូរ៉េ។ ជាការរំពឹងទុក ភាគីកូរ៉េខាងជើង និងអាមេរិក នឹងផ្តោតទៅលើការចង់បានជាមូលដ្ឋាន ឬការចង់បានរួមគ្នាជាមុនសិន បន្ទាប់មកទើបឈានទៅដល់កិច្ចចរចារំសាយអាវុធនុយក្លេអ៊ែរ ក៏ដូចជាការលុបចោលទណ្ឌកម្មសេដ្ឋកិច្ចលើកូរ៉េខាងជើង។
បើទោះបីជាអ្វីៗមិនងាយស្រួលក៏ដោយ លោក Kim Myong-gil បានប្រាប់អ្នកសារព័ត៌មានមុនចាកចេញមកពីទីក្រុងប៉េកាំងក្នុងដំណើរទៅស៊ុយអែតថា កូរ៉េខាងជើងនៅតែមានសុទិដ្ឋិនិយមចំពោះលទ្ធផលនៃកិច្ចចរចាមួយនេះ។
កិច្ចប្រជុំបិទទ្វាររបស់ក្រុមប្រឹក្សាសន្តិសុខ
បើមិនមានអ្វីប្រែប្រួលទេ កិច្ចប្រជុំបិទទ្វាររបស់ក្រុមប្រឹក្សាសន្តិសុខអង្គការសហប្រជាជាតិនឹងធ្វើឡើងឆាប់ៗខាងមុខនេះ តាមការស្នើរបស់អង់គ្លេស អាល្លឺម៉ង់ និងបារាំង។ កិច្ចប្រជុំមួយនេះ ធ្វើឡើងគឺក្នុងគោលបំណងដាក់សម្ពាធទៅលើទីក្រុងព្យុងយ៉ាង ដែលបានសាកល្បងមីស៊ីលប៉ាលីស្ទិកម្តងហើយម្តងទៀត។ សកម្មភាពរបស់កូរ៉េខាងជើងបែបនេះ ត្រូវបានគេជឿថាគឺជា ការគំរាមកំហែងសន្តិសុខពិភពលោកយ៉ាងខ្លាំង ជាពិសេសគឺការបំពានសេចក្តីសម្រេចរបស់អង្គការសហប្រជាជាតិកន្លងមក។
«អាមេរិកមិនចង់បានកិច្ចប្រជុំផ្លូវការណាមួយទេ»។ នេះគឺជាមូលហេតុ ដែលក្រុមប្រឹក្សាសន្តិសុខបើកកិច្ចប្រជុំបិទទ្វារ ម្យ៉ាងវិញទៀតក្រុមប្រឹក្សាមួយនេះ ក៏ចង់និយាយពីលក្ខខណ្ឌសំងាត់ផងដែរ។
សូមបញ្ជាក់ថា ប្រទេសអង់គ្លេស អាល្លឺម៉ង់ និងបារាំងធ្លាប់ស្នើឲ្យក្រុមប្រឹក្សាសន្តិសុខបើកកិច្ចប្រជុំម្តងហើយបន្ទាប់ពីកូរ៉េខាងជើងបានសាកល្បងប្រព័ន្ធបាញ់រ៉ុក្កែតចម្រុះ ប៉ុន្តែចុងក្រោយប្រទេសទាំងបីបានត្រឹមអំពាវនាវឲ្យបន្តដាក់ទណ្ឌកម្មសេដ្ឋកិច្ចអន្តរជាតិបន្ថែមទៀតលើកូរ៉េខាងជើង។ ចំណែករុស្សី និងចិនវិញ បានអំពាវនាវឲ្យអង្គការសហប្រជាជាតិដកទណ្ឌកម្មសេដ្ឋកិច្ចចេញពីកូរ៉េខាងជើង ដើម្បីជំរុញឲ្យមានការរំសាយកម្មវិធីនុយក្លេអ៊ែរកាន់តែឆាប់រហ័ស ប៉ុន្តែត្រូវបានអាមេរិកច្រានចោល៕
Tag:
អាមេរិក
កូរ៉េខាងជើង
ដូណាល់ ត្រាំ
ក្រុមប្រឹក្សាសន្តិសុខ
© រក្សាសិទ្ធិដោយ thmeythmey.com