អន្តរជាតិ
អាមេរិក៖ ១៨នាក់ស្លាប់ និងមួយពាន់នាក់ទៀតធ្លាក់ខ្លួនឈឺព្រោះបារីអេឡិចត្រូនិក រូបភាព AFP
×
ដោយ៖ ងួន សុភាវត្តី
នៅថ្ងៃទី៣ ខែតុលា មន្ត្រីសុខាភិបាលសហរដ្ឋអាមេរិកបានរាយការណ៍ពីករណីមនុស្សចំនួន១៨នាក់ដែលបានស្លាប់ដោយសារជំងឺសួតដ៏អាថ៌កំបាំងដែលមានទាក់ទងបារីអេឡិចត្រូនិក។ មនុស្សជាង១០០០នាក់ទៀត ក៏បានធ្លាក់ខ្លួនឈឺដោយសារជំងឺសួតដែលទាក់ទងនឹងបារីអេឡិចត្រូនិកនេះដែរ។
ករណីស្លាប់ និងការធ្លាក់ខ្លួនឈឺដោយសារជំងឺទាក់ទងអេឡិចត្រូនិកនៅអាមេរិក បានកើនឡើងគួរឲ្យកត់សម្គាល់។ មជ្ឈមណ្ឌលគ្រប់គ្រង និងបង្ការជំងឺ (CDC) បានរកឃើញនិយាយថា ករណីជាង១០៨០ ត្រូវបានរាយការណ៍ពីរដ្ឋ និងទឹកដីអាមេរិកចំនួន៤៨ ខណៈកាលពីសប្ដាហ៍មុន មនុស្សឈឺដោយសារជំងឺសួតមានតែ៨០៥ករណីប៉ុណ្ណោះ។
រដ្ឋចំនួន១៥ បានរាយការណ៍ករណីបាត់បង់ជីវិតដោយសារជំងឺទាក់ទងបារីអេឡិចត្រូនិកក្នុងនោះនោះ អាឡាបាម៉ា ចចជី កាន់សាស់ មីស៊ូរី វើជីញ៉ា និងអ៊ីលីណយជាដើម។
ក្រុមអ្នកស៊ើបអង្កេតមិនបានភ្ជាប់ករណីជំងឺសួតនេះបណ្តាលទៅនឹងផលិតផលច្បាស់លាស់ណាមួយទេ ប៉ុន្តែបានចង្អុកទៅរកទឹកបន្ថែមក្នុងបារីអេឡិចត្រូនិកដែលផ្ទុកសារធាតុផ្សំរបស់កញ្ឆា tetrahydrocannabinol។
បើយោងតាមទីភ្នាក់ងារព័ត៌មាន Reuters មន្ត្រីរដ្ឋបាលចំណីអាហារនិងឱសថ និយាយថា គំរូជាង ៤៤០ កំពុងត្រូវបានប្រមូលពីរដ្ឋចំនួន១៨ និងបន្តប្រមូលទៀតដើម្បីពិសោធ។ ទន្ទឹមនឹងការកើនឡើងនៃករណីស្លាប់ និងការធ្លាក់ខ្លួនឈឺនេះ មជ្ឈមណ្ឌលគ្រប់គ្រង និងបង្ការជំងឺបានណែនាំប្រជាជនអាមេរិក គួរតែបញ្ឈប់ការប្រើប្រាស់បារីអេឡិចត្រូនិកនេះ។
ដើម្បីទប់ស្កាត់ផលវិបាកបណ្ដាលមកពីការជក់បារីអេឡិចត្រូនិកនេះ អាមេរិកក៏ចេញការហាមប្រាមការប្រើប្រាស់ និងការលក់បារីអេឡិចត្រូនិកដែលមានរស់ជាតិ។ ក្រៅពីអាមេរិក ឥណ្ឌា និងប្រទេសមួយចំនួនទៀតក៏បាននឹងចាប់ផ្តើមហាមឃាត់ការប្រើប្រាស់បារីអេឡិចត្រូនិកនេះផងដែរ។ ថ្មីៗនេះ ម៉ាឡេស៊ី ក៏គ្រោងចេញច្បាប់ហាមឃាត់ចរាចរណ៍បារីមួយប្រភេទនេះដែលពេញនិយមខ្លាំងក្នុងចំណោមយុវជន៕
© រក្សាសិទ្ធិដោយ thmeythmey.com