ជាតិ
សក្តានុពលវិស័យទេសចរណ៍ខេត្តសៀមរាប ក្រោមក្រសែភ្នែកអ្នកវិនិយោគ
× សៀមរាប៖ លោក ឡាយ គឹមសួរ ប្រធានសមាគមសហគ្រិនវ័យក្មេងសាលាខេត្តសៀមរាប លើកឡើងថា វិស័យទេសចរណ៍ក្នុងខេត្តសៀមរាបនៅតែល្អ នៅតែមានសក្កានុពល ដ្បិតពេលនេះកំពុងមានបញ្ហាក្ដី។ ក្នុងបទសម្ភាសជាមួយសារព័ត៌មានថ្មីៗ លោក ឡាយ គឹមសួរ បាននិយាយថា សៀមរាបនៅតែល្អសម្រាប់លោក បើទោះបីជាបច្ចុប្បន្ន ខេត្តសៀមរាបកំពុងមានបញ្ហាធ្លាក់ចុះចំនួនទេសចរក៏ដោយ។ សម្រាប់ការធ្លាក់ចុះចំនួនភ្ញៀវទេសចរ វាជាបញ្ហារបស់សាកលលោក ហើយវានឹងល្អប្រសើរវិញនាពេលខាងមុខ។
ជាអ្នកខេត្តកំពង់ចាមនិងបានមករស់នៅ និងធ្វើការក្នុងខេត្តសៀមរាបរយៈពេល៩ឆ្នាំមកនេះ លោក គឹមសួរ ដែលហៅខេត្តសៀមរាបថា ជាដុំពេជ្រដែលនៅមិនទាន់ច្នៃនោះ បានចាត់ទុកខេត្តនេះ ថាមានសក្កានុពល មានឱកាសច្រើនសម្រាប់អ្នកវិនិយោគ។ ក្រៅពីវិស័យទេសចរណ៍ លោក គឹមសួរ មើលឃើញដែរថា វិស័យកសិកម្មចំណីអាហារ,បច្ចេកវិទ្យា និងវិស័យអចលនទ្រព្យ ក៏សម្រាប់ការរកស៊ីដែរ។
គួរបញ្ជាក់ដែរថា នៅថ្ងៃទី២៣ កញ្ញា សមាគមសហគ្រិនវ័យក្មេងខេត្តសៀមរាប បានដាក់ឱ្យដំណើរការ សៀវភៅមគ្គុទ្ទេសក៍វិនិយោគក្រុងសៀមរាប។ សៀវភៅនេះជាទុនមួយសំខាន់ សម្រាប់ការវិនិយោគលើវិស័យផ្សេងៗ ដែលអ្នកវិនិយោគគួរដឹង មុនចាប់ផ្តើមអាជីវកម្មក្នុងខេត្តសៀមរាប៕
Tag:
ឡាយ គឹមសួរ
ទេសចរណ៍
© រក្សាសិទ្ធិដោយ thmeythmey.com