ជាតិ
សង្គមជាតិ
មន្ត្រី ប.ស.ស ច្រានចោល ដែលថាកម្មករធ្វើឈឺ ដើម្បីបើកលុយថ្លៃព្យាបាល លោក ហេង សុផាន់ណារិទ្ធ ប្រធានការិយាល័យគោលនយោបាយប.ស.ស (រូបពីប.ស.ស)
× លោក ហេង សុផាន់ណារិទ្ធ ប្រធានការិយាល័យគោលនយោបាយនៃបេឡាជាតិរបបសន្តិសុខសង្គម (ប.ស.ស) បានបដិសេធថា គ្មានករណីកម្មករធ្វើពុតជាឈឺ ហើយទៅរួមគំនិតជាមួយវេជ្ជបណ្ឌិត ដើម្បីបើកលុយពីប.ស.ស ឡើយ ដោយសារ ប.ស.ស មានប្រព័ន្ធត្រួតពិនិត្យច្បាស់លាស់ចំពោះអ្នកមានប័ណ្ណ ជាសមាជិក ប.ស.ស។
ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទ នៅថ្ងៃទី៤ ខែតុលា ឆ្នាំ២០១៩ លោក ហេង សុផាន់ណារិទ្ធ ពន្យល់ថា៖«ពេលអ្នកជំងឺ ទៅមូលដ្ឋានសុខាភិបាល ត្រូវបង្ហាញកាត ប.ស.ស ទៅឲ្យភ្នាក់ងារមន្ទីរពេទ្យនៅប្រចាំការក្នុងពេទ្យនីមួយៗ ដើម្បីឲ្យភ្នាក់ងារ ប.ស.ស បញ្ជាក់ជាមួយប្រព័ន្ធ HSPIS ថាអ្នកជំងឺនេះពិតជា សមាជិក ប.ស.ស ឬមិនមែន ហើយសមាជិកនេះ នៅមានសុពលភាព ប្រើប្រាស់សេវា ឬអស់សុពលភាពប្រើប្រាស់សេវា។ បន្ទាប់ពីបញ្ជាក់ក្នុងប្រព័ន្ធរួច ភ្នាក់ងារនឹងចេញលិខិតអនុញ្ញាតឲ្យប្រើប្រាស់សេវានៅក្នុងមន្ទីរពេទ្យដោយមិនគិតថ្លៃ រីឯខាងមន្ទីរពេទ្យវិញពេលព្យាបាល នៅពេលឃើញមានលិខិតបញ្ជាក់ពីភ្នាក់ងារ ប.ស.ស គឺអនុញ្ញាតឲ្យប្រើប្រាស់សេវាដោយមិនគិតថ្លៃ»។
ការច្រានចោលរបស់លោក ហេង សុផាន់ណារិទ្ធ គឺបន្ទាប់ពីលោក ឈាង វុន សមាជិករដ្ឋសភា និងជាប្រធានគណៈកម្មការជំនាញទី៥នៃរដ្ឋសភា បានលើកឡើងនាពេលថ្មីៗនេះថា មានកម្មករខ្លះ រួមគំនិតជាមួយពេទ្យ ដើម្បីបានបើកលុយថ្លៃព្យាបាល ខណៈពួកគេ មិនមានជំងឺអ្វីធ្ងន់ធ្ងរ។
លោក ឈាង វុន ថ្លែងដូច្នេះថា៖«មូលនិធិ ប.ស.ស លោកជំទាវ ឡោក ខេង [តំណាងរាស្ត្រ] បានលើកខ្លាំងមែនទែនពាក់ព័ន្ធនឹងការបាត់ចំណូលនិងការចាយវាយ ដែលមានការកេងបន្លំ។ អ៊ីចឹង តើយើងត្រូវដោយស្រាយម៉េច? កេងបន្លំហ្នឹង មិនមែនតែមន្រី្តរាជការដែលពាក់ព័ន្ធរឿងហ្នឹងទេ កម្មកររបស់យើងមួយចំនួន ក៏ឆ្លៀតឱកាសហ្នឹងដែរ ដូចជា ទៅត្រូវរ៉ូវជាមួយមន្ទីរពេទ្យបង្អែកសុខាភិបាល ឬក៏មណ្ឌលសុខភាព ត្រូវរ៉ូវគ្នាចេញសំបុត្រអ៊ីចឹងទៅ ទៅបើកលុយរបស់រដ្ឋ រួចហើយក៏សម្រាកនៅផ្ទះ តាមពិតអត់ឈឺខ្លាំងអីផង ក៏មានដែរ។ អ៊ីចឹងហើយធ្វើឲ្យរដ្ឋបាត់ថវិកាមួយចំនួនធំ ហើយខាងវិស័ឯកជនជួលកម្មករ ក៏បាត់កម្លាំងពលកម្ម ដែលអត់បានទៅធ្វើការ។ អ៊ីចឹងហើយ យើងបានជជែកគ្នារករូបមន្តដើម្បីដោះស្រាយ...»។
លោក ហេង សុផាន់ណារិទ្ធ បកស្រាយបែបនេះថា៖«គ្មានករណីដូចលោក ឈាង វុន លើកឡើងនោះទេ ដោយសារ ប.ស.ស មានប្រព័ន្ធត្រួតពិនិត្យចំពោះអ្នកមានប័ណ្ណដែលជាសមាជិក ប.ស.ស ច្បាស់លាស់។ លោក ឈាន វុន អាចបកស្រាយច្រឡំ។ ប៉ុន្តែបើករណីកម្មករសុំឈប់សម្រាកដោយសារឈឺ គឺមាន»។
លោក សោម អូន ប្រធានសហព័ន្ឋសហជីពកម្មករកម្ពុជា ប្រាប់សារព័ត៌មានថ្មីៗថា លោកមិនច្បាស់ថាមានឬគ្មាននោះទេ តែលោកសុំឲ្យលោក ឈាង វុន បង្ហាញឯកសារផ្លូវការ ពីករណីកម្មករធ្វើពុតជាឈឺ។
ជាមួយគ្នានេះដែរ លោក អាត់ ធន់ ប្រធានសហភាពការងារកម្ពុជា សន្និដ្ឋានថា ប្រហែលជាគ្មានករណីបែបនេះទេ ហើយលោក ក៏មិនដែលឃើញមានការខាតបង់អ្វីដោយសារកម្មករដែរ។ លោក មានប្រសាសន៍ថា ឃើញតែកម្មករលំបាក ឈឺ និងសុំច្បាប់មិនបាន គ្មានរឿងទៅគប់គិតជាមួយពេទ្យដើម្បីបានលុយឡើយ។
ថ្លែងប្រាប់សារព័ត៌មានថ្មីៗ លោក អាត់ ធន់ ចាត់ទុក ការលើកឡើងរបស់លោក ឈាង វុន ថា ធ្វើឲ្យប៉ះពាល់ដល់អារម្មណ៍កម្មករខ្លាំង ហើយលោក យល់ថា ក្នុងនាមជាតំណាងរាស្ត្រ លោក ឈាង វុន មិនគួរនិយាយបែបនេះទេ៕
© រក្សាសិទ្ធិដោយ thmeythmey.com