ជប៉ុនផ្ដល់ជំនួយជាង១លានដុល្លារ សម្រាប់លើកកម្ពស់ការថែទាំសុខភាព និងបោសសម្អាតមីននៅកម្ពុជា

ជាតិ

ជប៉ុនផ្ដល់ជំនួយជាង១លានដុល្លារ សម្រាប់លើកកម្ពស់ការថែទាំសុខភាព និងបោសសម្អាតមីននៅកម្ពុជា

05, Oct 2019 , 6:29 pm

រូបភាព

រូបភាពពី ស្ថានទូតជប៉ុន

ដោយ: ឡាយ សុភាវតី

ភ្នំពេញ៖ ប្រទេសជប៉ុន ផ្ដល់ជំនួយឥតសំណងជាង១លានដុល្លា សម្រាប់អភិវឌ្ឍសហគមន៍តាមរយៈការលើកម្ពស់ការថែទាំសុខភាព និងបោសសម្អាតមីននៅកម្ពុជា។ នេះបើតាមការចេញផ្សាយលើទំព័រហ្វេសរបស់ស្ថានទូតជប៉ុនប្រចាំកម្ពុជា។

ស្ថានទូតជប៉ុនប្រចាំកម្ពុជា បានប្រារព្ធពិធីចុះហត្ថលេខានេះ នៅថ្ងៃទី៤ តុលា ឆ្នាំ២០១៩ ដើម្បីប្រគល់ថវិកាជាង ១លានដុល្លារ ដល់អង្គការចំនួនពីរនៅកម្ពុជា។ ក្នុងនោះថវិកាចំនួន ៨.៤សែនដុល្លារ បានផ្ដល់ឲ្យអង្គការសកម្មភាពកម្ចាត់មីនជប៉ុន (JMAS)។ គម្រោងនេះគឺដើម្បីអនុវត្តគម្រោង ការលើកកម្ពស់ការអភិវឌ្ឍសហគមន៍ រួមជាមួយការបោសសម្អាតមីន ក្នុងខេត្តបន្ទាយមានជ័យ ឆ្នាំទី៣។

ចំណែកឯអង្គការទីពីរ គឺអង្គការមូលនិធិជប៉ុន-ភីអេចស៍ PHJ ដើម្បីអនុវត្តគម្រោង ការពង្រឹងការថែទាំសុខភាពសហគមន៍ និងបណ្តាញគាំទ្រសម្រាប់កុមារ ក្នុងខេត្តកំពង់ចាមឆ្នាំទី១ ។
សូមបញ្ជាក់ថា ជំនួយឥតសំណងគម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅក្នុងប្រទេសកម្ពុជា នៅឆ្នាំ២០០២ ដើម្បីគាំទ្រដល់សកម្មភាព របស់អង្គការក្រៅរដ្ឋាភិបាលជប៉ុនជួយដល់ការកសាងនិងអភិវឌ្ឍន៍នៅកម្ពុជា នៅកម្រិតមូលដ្ឋាន។ ចាប់តាំងពីឆ្នាំ២០០២ រដ្ឋាភិបាលជប៉ុន បានផ្តល់ថវិកាជាង ៣៧លានដុល្លារ សម្រាប់គម្រោងចំនួន ១២០ ដែលភាគច្រើនផ្តោតលើវិស័យអប់រំ សុខាភិបាល កសិកម្ម និងបោសសំអាតមីននៅកម្ពុជា៕