អន្តរជាតិ
ស្ត្រីអង់គ្លេសវ័យ៧០ឆ្នាំដើរប្រមូលសំរាមតាមបណ្តាឆ្នេរ ហើយសន្យាបន្តធ្វើទាល់តែដើរលែងរួច
× ជាសកម្មជនបរិស្ថាន លោកយាយ Pat Smith ជនជាតិអង់គ្លេសវ័យ៧០ឆ្នាំ បានចាប់ផ្តើមដើរប្រមូលសំរាមតាមឆ្នេរសមុទ្រ បន្ទាប់ពីបានទស្សនាបទយកការណ៍មួយស្តីពីសំរាមប្លាស្ទិក។
ជាមួយនឹងថង់សំរាមតាមខ្លទន លោកយាយ Pat Smith បានចាប់ផ្តើមប្រតិបត្តិការប្រមូលសំរាមនៅបណ្តេឆ្នេរសមុទ្រក្នុងតំបន់ Cornwall ប្រទេសអង់គ្លេស ចាប់តាំងពីថ្ងៃទី១ ខែមករា ឆ្នាំ២០១៨មក។ បន្តរយៈពេលពេញមួយឆ្នាំ លោកយាយបានសំរាមឆ្នេរដល់ទៅចំនួន៥២ទីតាំង។
ប្រតិបត្តិការដែលគេដាក់ឈ្មោះឲ្យថា «Action Nan» បានកើតឡើងបន្ទាប់ពីលោកយាយ Smith បានមើលបទយកការណ៍មួយស្តីពីសំរាមប្លាស្ទិក ដែលធ្វើឲ្យគាត់ព្រួយបារម្ភយ៉ាងខ្លាំងចំពោះអនាគតភពផែនដី ជាពិសេសតំបន់សមុទ្រ។
យោងតាមការផ្សាយរបស់ LINFO.RE ស្ត្រីវ័យចំណាស់រូបនេះ ក៏បានក្រើនរំលឹកផងដែរដល់បណ្តាសហគ្រាសដល់ទៅជាង៦០០នៅក្បែរតំបន់សមុទ្រ ឲ្យពួកគេបញ្ឈប់ការប្រើប្រាស់ថង់ប្លាស្ទិក ដែលមិនមានការចាំបាច់។
លោកយាយ Smith ចង់ឲ្យតំបន់ Cornwall ដែលគាត់រស់នៅ ផ្តល់ភាពគំរូលើកិច្ចការពារបរិស្ថាន។ គាត់បានមានប្រសាសន៍ថា៖ «ខ្ញុំពិតជាមានការភ្ញាក់ផ្អើលខ្លាំងណាស់ ដែលមនុស្សជាច្រើន ព្យាយាមផ្តាច់ខ្លួនចេញពីបញ្ហា ដោយមិនមានការព្រួយបារម្ភទាល់តែសោះចំពោះអនាគត»។
ទោះបីជាយ៉ាងណាក៏ដោយ លោកយាយបានអះអាងគាត់មិនបញ្ឈប់យុទ្ធនាការខ្លួនក្នុងការដើរប្រមូលសំរាមប្លាស្ទិកនោះឡើយ ពីព្រោះគាត់ព្រួយបារម្ភជាពិសេសចំនួនអនាគតចៅៗរបស់ខ្លួន។ «ខ្ញុំនឹងមិនឈប់ឡើយ ដរាបណាជើងខ្ញុំនៅដើររួច និងដៃនៅតែអាចរើសសំរាមនៅលើដី»។ សកម្មជនបរិស្ថាន វ័យ៧០ឆ្នាំ បានអះអាងយ៉ាងដូច្នេះ៕
Tag:
បរិស្ថាន
សំរាម
ប្លាស្ទិក
© រក្សាសិទ្ធិដោយ thmeythmey.com