អន្តរជាតិ
កូរ៉េខាងជើង គំរាមអាមេរិកនិងអឺរ៉ុបដែលកោះប្រជុំបន្ទាន់រឿងបាញ់មីស៊ីលរបស់ខ្លួន
×
ដោយ៖ ងួន សុភាវត្តី
ឯកអគ្គរដ្ឋទូតកូរ៉េខាងជើងប្រចាំអង្គការសហប្រជាជាតិ នៅថ្ងៃទី៧ខែតុលា បានគំរាមសហរដ្ឋអាមេរិក អង់គ្លេស បារាំង និងអាល្លឺម៉ង់ ដែលបានកោះប្រជុំក្រុមប្រឹក្សាសន្តិសុខពាក់ព័ន្ធការសាកល្បងមីស៊ីលរបស់ខ្លួននាពេលថ្មីៗនេះ។ តំណាងកូរ៉េខាងជើងអះអាងថា ការធ្វើបែបនេះ គឺនឹងជំរុញឲ្យកូរ៉េខាងជើងពង្រឹងការការពារអធិបតេយ្យភាពរបស់ខ្លួនកាន់តែខ្លាំងថែមទៀត។
សមាជិកទាំង១៥ នៃក្រុមប្រឹក្សាអង្គការសហប្រជាជាតិ នឹងត្រូវបើកកិច្ចប្រជុំបិទទ្វារមួយនៅថ្ងៃទី៨ខែតុលា ដោយជជែកពីការបាញ់មីស៊ីលរបស់កូរ៉េខាងជើង។ កិច្ចប្រជុំត្រូវបានស្នើឡើងដោយអាល្លឺម៉ង់ និងគាំទ្រដោយអង់គ្លេស និងបារាំង បន្ទាប់ពីកូរ៉េខាងជើងបានបាញ់សាកល្បងមីស៊ីលបាលីស្ទិកចេញពីនាវាមុជទឹក (SLBM) ប្រភេទថ្មី Pukguksong3 កាលពីអាទិត្យមុន។
បើតាមទីភ្នាក់ងារព័ត៌មាន Reuters លោកឯកអគ្គរដ្ឋទូតកូរ៉េខាងជើង គីម សុង ប្រាប់អ្នកសារព័ត៌មានថា៖ «យើងដឹងច្បាស់ថា សហរដ្ឋអាមេរិកស្ថិតនៅពីក្រោយការស្នើរបស់អាល្លឺម៉ង់ អង់គ្លេស និងបារាំងនេះ។ អាមេរិកនិងសម្ព័ន្ធមិត្តត្រូវដឹងថា បើលើកឡើងពីបញ្ហាស្តីពីការការពារខ្លួនរបស់យើងក្នុងអង្គការសហប្រជាជាតិក្នុងពេលនេះ វានឹងជំរុញឲ្យយើងពង្រឹងការការពារអធិបតេយ្យភាពថែមទៀត»។
យ៉ាងណាមិញ លោក គីម សុង អះអាងថា ការពង្រឹងការការពារខ្លួននេះ មិនសំដៅលើការសាកល្បងមីស៊ីលកាន់តែច្រើនឡើយ។ ប៉ុន្តែលោកបានព្រមានថា៖ «សូមរង់ចាំមើលដោយប្រុងប្រយត្ន័ ថាយើងនឹងធ្វើអ្វីនៅពេលខាងមុខ»។
ងាកទៅរឿងកិច្ចប្រជុំបិទទ្វារក្រុមប្រឹក្សាសន្តិសុខវិញ អង់គ្លេស បារាំង និងអាល្លឺម៉ង់ យល់ថា ការបាញ់សាកល្បងមីស៊ីលរបស់កូរ៉េខាងជើង ជាការបំពានលើសេចក្តីសម្រេចរបស់អង្គការសហប្រជាជាតិដែលហាមកូរ៉េខាងជើងពីការបាញ់មីស៊ីលបាលីស្ទិក។
ជំនួបនៅបុរីញូវយ៉ក ក៏ធ្វើឡើងក្រោយ ជំនួបរវាងអាមេរិកនិងកូរ៉េខាងជើងនៅស៊ុយអែតត្រូវបានផ្អាក បន្ទាប់ពីកូរ៉េខាងជើងបានដើរចេញពីកិច្ចជំនួបនេះទាំងមិនទាន់បានផ្លែផ្កាអ្វីមួយនៅឡើយ។ កូរ៉េខាងជើងបានស្តីបន្ទោសអាមេរិកពីការមិនលើកយកដំណោះស្រាយថ្មីមកនិយាយ ហើយបន្តគំរាមអាមេរិកថានឹងបញ្ចប់ការចរចាននៅត្រឹមចុងឆ្នាំនេះផងដែរ៕
© រក្សាសិទ្ធិដោយ thmeythmey.com