អន្តរជាតិ
លោកលី សៀនឡុង៖ បក្សតែមួយឈ្នះកៅអីសភាលើសលុប មិនមែនបានន័យថា គ្មានប្រជាធិបតេយ្យទេ នាយករដ្ឋមន្រ្តីសិង្ហបុរី លី សៀនឡុង ក្នុងកម្មវិធី GPS របស់ទូរទស្សន៍ CNN ។ រូបភាពពីក្រសួងទូរគមនាគមន៍ និងព័ត៌មានសិង្ហបុរី
× នាយករដ្ឋមន្ត្រីសិង្ហបុរី លី សៀនឡុង បាននិយាយការពារប្រព័ន្ធនយោបាយនៅសិង្ហបុរីដែលបក្សកាន់អំណាចសកម្មភាពប្រជាជន (PAP) ដឹកនាំប្រទេសរាប់ទសវត្សរ៍ ហើយឈ្នះកៅអីសភាច្រើនលើសលប់រាល់ការបោះឆ្នោតនោះ។ ក្នុងកិច្ចសម្ភាសជាមួយទូរទស្សន៍អាមេរិក CNN អំឡុងទស្សនកិច្ចនៅបុរីញូវយ៉ក លោក លី បញ្ជាក់ច្បាស់ៗថា ការណ៍ដែលបក្សមួយឈ្នះកៅអីសភាច្រើន គឺជាលទ្ធផលនៃការសម្រេចចិត្តរបស់ប្រជាជន។
ប្រព័ន្ធនយោបាយនៅសិង្ហបុរី ជាប្រធានបទមួយក្នុងកិច្ចសម្ភាសរវាងពិធីករទូរទស្សន៍ CNN លោក Fareed Zakaria និងនាយករដ្ឋមន្ត្រីសិង្ហបុរី លី សៀនឡុង ដែលបង្ហោះលើវេបសាយ CNN នៅថ្ងៃទី៧ ខែតុលា។ លោក Zakaria បានចោទសួរលោក លី ពីអនាគតនៃប្រជាធិបតេយ្យរបស់សិង្ហបុរី ដែលលោកអះអាងថា មានអ្នកខ្លះគិតថា បានលំអៀងទៅរកបក្សកាន់អំណាចសកម្មភាពប្រជាជន (PAP) របស់លោក លី ផ្ទាល់។
តើសិង្ហបុរី នឹងមានប្រព័ន្ធតុល្យភាពបក្សពីរ ឬក៏មានប្រជាធិបតេយ្យដែលបើកចំហជាងនេះក្នុងពេល១០ឆ្នាំខាងមុខឬទេ? តើអ្នកអាចមានប្រជាធិបតេយ្យពិតប្រាកដឬទេ បើបក្សមួយឈ្នះកៅអី៨០ភាគរយក្នុងរយៈពេល៥០ឆ្នាំ ៦០ឆ្នាំ ឬ៧០ឆ្នាំទៅមុខ? នេះជាសំណួររបស់ពិធីករល្បីឈ្មោះប្រចាំទូរទស្សន៍អាមេរិកទៅកាន់លោក លី ក្នុងកម្មវិធី GPS ដែលត្រូវបានថតអំឡុងពេលលោក លី ចូលរួមប្រជុំមហាសន្និបាតអង្គការសហប្រជាជាតិកាលពីចុងខែកញ្ញា។
ឆ្លើយសំណួរបក្សមួយឈ្នះឆ្នោតដោយសំឡេងលើសលប់ នាយករដ្ឋមន្ត្រីទីបីរបស់សិង្ហបុរីឆ្លើយថា ប្រសិនបើនោះជាអ្វីដែលប្រជាជនបានបោះឆ្នោត និងជាឆន្ទៈរបស់ពួកគេ «ហេតុអ្វីវាមិនអាចជាប្រជាធិបតេយ្យពិតប្រាកដនោះ?»។ លោក លី ប្រាប់លោក Zakaria ដោយទឹកមុខញញឹមញញែមទៀត ថា ប្រជាជនជាអ្នកបោះឆ្នោតបែបនោះ ហើយបើពួកគេមិនសប្បាយចិត្តជាមួយលោក នោះលោកក៏មិនអាចអង្គុយដោយសុខស្រួលទល់មុខពិធីករទូរទស្សន៍រូបនេះដែរ។
នៅសិង្ហបុរី បក្សសកម្មភាពប្រជាជន បានដឹកនាំប្រទេសតាំងពីឆ្នាំ១៩៥៩ មក។ ចាប់ពីពេលនោះមក បក្សដែលមានលោក លី ក្វាន់យូ ជាស្ថាបនិកនេះ បានគ្របដណ្ដប់នយោបាយសិង្ហបុរីយ៉ាងខ្លាំង ហើយទទួលបានកៅអីសភាលើសលប់រហូតមក។ ការបោះឆ្នោតឆ្នាំ២០១១ ជាការបោះឆ្នោតមួយដែលបក្ស PAP ធ្លាក់ចុះប្រជាប្រិយភាពបន្តិច ប៉ុន្តែនៅតែកាន់កាប់កៅអីសភាច្រើនដដែល។ បក្សកម្មករ ជាបក្សប្រឆាំងធំជាងគេរបស់សិង្ហបុរី និងអាចឈ្នះសំឡេងក្នុងសភាខ្លះ។
ក្នុងកិច្ចសម្ភាសដដែល លោក លី ក៏ប្រមើលមើលថា សម្រាប់រយៈពេល១០ឆ្នាំ ឬ២០ឆ្នាំទៅមុខ សិង្ហបុរីនឹងបន្តមានប្រព័ន្ធនយោបាយមួយដែលបំពេញការងារមានប្រសិទ្ធភាពដដែល ហើយទទួលបានការគាំទ្រពីសំណាក់ប្រជាជន។ សម្រាប់នាយករដ្ឋមន្ត្រីរូបនេះ វិញ្ញាសាសម្រាប់ប្រព័ន្ធនយោបាយសិង្ហបុរី គឺការបង្កើតអ្នកដឹកនាំដែលល្អ មានសមត្ថភាព និងមានលទ្ធផល មិនមែនតុល្យភាពសំឡេងក្នុងសភារវាងបក្សប្រឆាំង និងរដ្ឋាភិបាលឡើយ៕
Tag:
សិង្ហបុរី
លី សៀនឡុង
© រក្សាសិទ្ធិដោយ thmeythmey.com