រដ្ឋមន្ត្រីបរិស្ថានអាស៊ានឯកភាពគ្នា ក្នុងការប្រយុទ្ធប្រឆាំងការប្រើប្រាស់សំណល់ប្លាស្ទិក

ជាតិ

រដ្ឋមន្ត្រីបរិស្ថានអាស៊ានឯកភាពគ្នា ក្នុងការប្រយុទ្ធប្រឆាំងការប្រើប្រាស់សំណល់ប្លាស្ទិក

09, Oct 2019 , 4:00 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ រដ្ឋមន្ត្រីបរិស្ថានអាស៊ានឯកភាពគ្នាក្នុងការប្រយុទ្ធប្រឆាំងការប្រើប្រាស់សំណល់ប្លាស្ទិក។ ការឯកភាពគ្នានេះ ធ្វើឡើងក្រោយពីរដ្ឋមន្ត្រីបរិស្ថានអាស៊ាន បានប្រជុំផ្តោតសំខាន់លើបញ្ហាការបំពុលដោយសំណល់ប្លាស្ទិក និងកិច្ចសហប្រតិបត្តិការជំរុញឱ្យកាន់តែខ្លាំងក្នុងចំណោមប្រទេសជាសមាជិកអាស៊ាន ក្នុងកិច្ចប្រជុំលើកទី១៥ នាថ្ងៃទី៨ តុលា ។

អ្នកនាំពាក្យក្រសួងបរិស្ថាន លោក នេត្រ ភក្ដ្រា បាននិយាយថា បញ្ហាបំពុលដោយប្លាស្ទិក គឺជារបៀបវារៈដ៏សំខាន់ក្នុងកិច្ចប្រជុំថ្ងៃដំបូងរបស់រដ្ឋមន្ត្រីអាស៊ាន។ ថ្លែងក្រោយកិច្ចប្រជុំបិទបញ្ចប់ទៅកាន់ក្រុមអ្នកសារព័ត៌មាន លោក ភក្ដ្រា បន្តថា ការបំពុលបរិស្ថានដោយប្លាស្ទិក និងការបំពុលសំណល់ប្លាស្ទិកនៅក្នុងសមុទ្រ ត្រូវបានជជែកយ៉ាងផុសផុលក្នុងចំណោមប្រទេសអាស៊ាន ក្នុងនោះប្រទេសម៉ាឡេស៊ីស្នើឱ្យអាស៊ានគិតគូរ សហការគ្នា ដើម្បីទប់ស្កាត់ កុំឱ្យមានការនាំចូលសំណល់ប្លាស្ទិកពីប្រទេសក្រៅចូលមកប្រទេសរបស់ខ្លួន។ លោក ភក្រា្ដ ថា បញ្ហានេះធ្លាប់កើតឡើងក្នុងចំណោមប្រទេសអាស៊ានមួយចំនួន ដូចជាម៉ាឡេស៊ី ភីលីពីន ហើយកម្ពុជាក៏បានជួបករណីដូចគ្នានេះកាលពីពេលថ្មីៗនេះផងដែរ ដោយបានផាកពិន័យនិងបង្ខំឱ្យក្រុមហ៊ុននាំចូល នាំចេញទៅប្រទេសដើមវិញ។

បន្ថែមពីនេះ តាមអ្នកនាំពាក្យ អាស៊ានក៏បានជំរុញឱ្យប្រទេសជាសមាជិកត្រូវមានការអប់រំប្រជាជនរបស់ខ្លួនឱ្យមានឥរិយាបថក្នុងការប្រើប្រាស់ប្លាស្ទិក និងគិតគូរខ្ពស់ពីបញ្ហានេះ។ ជាមួយគ្នានោះ ប្រទេសឥណ្ឌូនេស៊ីបានលើកពីយន្តការនៃការហាមឃាត់មិនឱ្យប្រើប្រាស់សំណល់ប្លាស្ទិកតែម្ដង ឬ Single use plastic ដូចជាបំពង់បឺត ដែលជាការបំពុលបរិស្ថានយ៉ាងធ្ងន់ធ្ងរ។ លោក ភក្ដ្រា បញ្ជាក់ថាកម្ពុជាក៏កំពុងរៀបចំអនុក្រឹត្យពីបញ្ហានេះដែរ និងបានលើកទឹកចិត្តឱ្យពលរដ្ឋប្រើប្រាស់វត្ថុធាតុដើមមួយចំនួនជំនួស ដូចជាបំពង់បឺតធ្វើពីក្រដាស និងធ្វើពីឫស្សីជាដើម។ល៕