FIFA
កីឡាអន្តរជាតិ
អន្តរជាតិ
FIFA ពិន័យឥណ្ឌូណេស៊ី ៤៥០០០ដុល្លារ ជុំវិញហិង្សាលើអ្នកគាំទ្រម៉ាឡេស៊ី
× សហព័ន្ធកីឡាបាល់ទាត់អន្តរជាតិ (FIFA) នៅថ្ងៃទី៩ ខែតុលារនេះ សម្រេចពិន័យសហព័ន្ធកីឡាបាល់ទាត់ឥណ្ឌូណេស៊ី (PSSI) ជាទឹកប្រាក់ ៤៥០០០ដុល្លារអាមេរិក ជុំវិញអំពើហិង្សាដែលបង្កដោយក្រុមអ្នកគាំទ្រឥណ្ឌូណេស៊ីក្នុងជំនួបរវាងជម្រើសជាតិឥណ្ឌូណេស៊ីទល់ម៉ាឡេស៊ី ក្នុងវគ្គជម្រុះ World Cup 2020។ PSSI ទទួលយកការពិន័យ ហើយអះអាងថានឹងមិនមានបញ្ហាបែបនេះកើតឡើងនៅប្រទេសឥណ្ឌូណេស៊ីទៀតឡើយ។
ក្នុងជ័យជម្នះរបស់ក្រុមភ្ញៀវម៉ាឡេស៊ី ៣-២ លើក្រុមម្ចាស់ផ្ទះឥណ្ឌូណេស៊ី នាកីឡដ្ឋាន Gelora Bung Karno ក្នុងក្រុងហ្សាការតា កាលថ្ងៃទី៥ កញ្ញា ការប្រកួត ទទួលការរំខានយ៉ាងធ្ងន់ធ្ងរពីសំណាក់ក្រុមអ្នកគាំទ្រម្ចាស់ផ្ទះ រហូតបង្កឲ្យមានអ្នករបួស និងបង្ខំឲ្យពន្យារពេលប្រកួតផង។
រដ្ឋមន្ត្រីយុវជន និងកីឡាម៉ាឡេស៊ី លោក Syed Saddiq ក៏ស្ថិតក្នុងហេតុការណ៍ច្របូកច្របល់នោះដែរ ហើយលោកត្រូវបានជម្លៀសចេញពីការប្រកួតដោយសារអំពើហិង្សានោះ។ ភាគីឥណ្ឌូណេស៊ីបានសុំទោសជាផ្លូវការទៅកាន់រដ្ឋមន្ត្រីវ័យ២៦ឆ្នាំនេះរួចហើយ។
ជាមួយឥរិយាបទមិនសមរម្យ តាមរយៈហិង្សារបស់អ្នកគាំទ្រឥណ្ឌូណេស៊ីនេះ FIFA បាន ពិន័យ PSSI ជាទឹកប្រាក់ចំនួន ៤៥០០០ដុល្លារផងដែរដើម្បីជាការព្រមាន។ PSSI ទទួលយកការពិន័យនេះ ដោយគ្មានតវ៉ាមួយម៉ាត់ឡើយ។
«PSSI គោរពនីតិវិធីច្បាប់និងការសម្រេចរបស់ FIFA»។ នេះជាការអះអាងរបស់ប្រធាន PSSI អ្នកស្រី Ratu Tisha Destria នៅថ្ងៃទី៩ តុលានេះ។ អ្នកស្រីបញ្ជាក់បន្ថែមថា ការផ្លាស់ប្តូរកំពុងតែធ្វើឡើងហើយ ដូច្នេះ«អំពើហិង្សា»បែបនេះ នឹងមិនកើតឡើងទៀតឡើយ។
ឥណ្ឌូណេស៊ី នឹងត្រូវធ្វើដំណើរទៅជួបអេមីរ៉ាតអារ៉ាប់រួមសម្រាប់ជំនួបលើកទី៣ ពូល G នៅថ្ងៃទី១០ ខែតុលា បន្ទាប់ពីបរាជ័យពីរប្រកួតរួចមកហើយ ក្នុងនោះចាញ់ម៉ាឡេស៊ី ៣-២ និងថៃ ៣-០។
សម្រាប់ជំនួបជាមួយវៀតណាមនៅថ្ងៃទី១៥ ខែតុលា ដែលគ្រោងធ្វើនៅក្នុងក្រុងហ្សាការតា ត្រូវបានផ្លាស់ទៅកោះបាលីវិញដើម្បីចៀសវាងបញ្ហាដូចប៉ះជាមួយម៉ាឡេស៊ីទៀត៕
Tag:
World Cup
ឥណ្ឌូណេស៊ី
FIFA
© រក្សាសិទ្ធិដោយ thmeythmey.com