អន្តរជាតិ
អូបាម៉ានិងភរិយានឹងទៅសិង្ហបុរី ចែករំលែកទស្សនវិស័យនិងពិសោធន៍ជីវិត លោក អូបាម៉ា (ស្តាំ) និងភរិយាលោក គឺលោកស្រី មីហ្សែល (AFP)
× លោក បារ៉ាក់ អូបាម៉ា និងភរិយា មីឈែល នឹងធ្វើដំណើរទៅកាន់សិង្ហបុរី នាខែធ្នូ ឆ្នាំ២០១៩ ដើម្បីផ្តល់សុន្ទរកថាសាធារណៈពីរដាច់ដោយឡែកពីគ្នា។ កម្មវិធីនេះ រៀបចំឡើងដោយក្រុមហ៊ុនបង្កើតព្រឹត្តិការណ៍សម្រាប់ជំរុញការធ្វើជំនួញ ឈ្មោះថា The Growth Faculty ។
ប្រធានាធិបតីអាមេរិកទី៤៤ លោក បារ៉ាក់ អូបាម៉ា នឹងទៅថ្លែងសុន្ទរកថានៅថ្ងៃទី ១៦ ធ្នូ នៅឯមជ្ឈមណ្ឌលសន្និបាត Singapore Expo ។ សម្រាប់ប្រធានបទ លោកនឹងនិយាយពីការដឹកនាំលោកក្នុងអាណត្តិ៨ឆ្នាំជាប្រធានាធិបតី និងការយល់ឃើញផ្ទាល់លោកចំពោះភាពជាអ្នកដឹកនាំក្នុងពិភពលោក។
ចំណែក ភរិយាលោក គឺ អតីតស្ត្រីទី១អាមេរិក លោកស្រី មីឈែល អូបាម៉ា ក៏នឹងផ្ដល់សុន្ទរកថានៅទីតាំងដូចគ្នានេះដែរ តែនៅថ្ងៃទី ១៤ ធ្នូ ។ សម្រាប់ប្រធានបទវិញ លោកស្រី នឹងចែករំលែកបទពិសោធដែលដកស្រង់ចេញពីសៀវភៅដ៏ល្បីល្បាញរូបស្រី ចំណងជើងថា «Becoming» ដែលបោះពុម្ពផ្សាយកាលពីឆ្នាំមុន។
ក្រុមហ៊ុន The Growth Faculty បានប្រកាសពីព្រឹត្តិការណ៍នេះ នៅថ្ងៃពុធ ទី៩ តុលា លើវេបសាយផ្លូវការខ្លួន ដោយកត់សម្គាល់ថា នេះជាព្រឹត្តិការណ៍ជំនួញសាធារណៈដំបូងបង្អស់របស់លោក អូបាម៉ា ក្នុងប្រទេសសិង្ហបុរី។ ក្រុមហ៊ុននេះបញ្ជាក់ទៀតថា ព្រឹត្តិការណ៍ធំៗទាំងនេះ ផ្តល់ឱកាសសម្រាប់សហគមន៍ជំនួញអាស៊ីអាគ្នេយ៍ និងប្រជាជនទូទៅរៀនសូត្រពីប្តីប្រពន្ធមួយគូនេះ ដែលទើបតែអបអរខួបអាពាហ៍ពិពាហ៍២៧ឆ្នាំពួកគេ កាលពីថ្មីៗនេះ។ យោងតាមវេបសាយរបស់ The Growth Faculty សំបុត្រចូលរួមសម្រាប់ព្រឹត្តិការណ៍នេះ មានតម្លៃចាប់ពី៣០០ដុល្លារ ដល់ជាង១០០០ដុល្លារ។
ស្វាមីភរិយាជនជាតិអាមេរិក-អាហ្វ្រិកដ៏មានឥទ្ធិពលមួយគូនេះ មានភាពល្បីល្បាញខ្លាំងក្នុងប្រទេសសិង្ហបុរី។ អ្នកទាំងពីរបានជាប់ឈ្មោះជាស្ត្រី និងបុរសដែលគួរឲ្យគោរពសរសើរបំផុត ក្នុងការស្ទង់មតិរបស់វេបសាយចក្រភពអង់គ្លេសមួយ ឈ្មោះថា YouGov កាលពីខែកក្កដា ។
សូមបញ្ជាក់ថា កាលពីឆ្នាំ ២០១៨ លោក អូបាម៉ា ដែលបានកាន់តំណែងជាប្រធានាធិបតិចាប់ពីឆ្នាំ២០០៩ ដល់ ២០១៧ ក៏ធ្លាប់ធ្វើដំណើរទៅកាន់ប្រទេសសិង្ហបុរីផងដែរ។ កាលនោះ លោក បានជួបពិសាអាហារពេលល្ងាចជាមួយនាយករដ្ឋមន្ត្រី លី សៀនឡុង និងជួបក្រុមយុវជនវ័យក្មេងមកពីបណ្តាប្រទេសក្នុងតំបន់អាស៊ីអាគ្នេយ៍ ៕
Tag:
សិង្ហបុរី
អូបាម៉ា
មីហ្សែល
© រក្សាសិទ្ធិដោយ thmeythmey.com