ជាតិ
នយោបាយជាតិ
ប្រមុខការទូតកម្ពុជា៖ យើង បង្ហាញពិភពលោកថា វិធីដណ្តើមអំណាចរបស់បក្សប្រឆាំង មិនមែនប្រជាធិបតេយ្យឡើយ លោក ប្រាក់ សុខុន ថ្លែងក្នុងមហាសន្និបាតអង្គការសហប្រជាជាតិលើកទី៧៤ កាលពីថ្ងៃទី២៨ ខែកញ្ញា ឆ្នាំ២០១៩
× រដ្ឋាភិបាលកម្ពុជា ចង់ប្រាប់ពិភពលោកឲ្យបានដឹងថា យុទ្ធសាស្ត្រស្វែងរកចំណាចរបស់ក្រុមអ្នកប្រឆាំង មិនមែនធ្វើតាមគន្លងប្រជាធិបតេយ្យឡើយ។ លោក ប្រាក់ សុខុន រដ្ឋមន្ត្រីក្រសួងការបរទេសកម្ពុជា ឆ្លើយដូច្នេះ ទៅកាន់អ្នកសារព័ត៌មាន VOA ដែលឆ្លៀតសួរលោក ក្នុងឱកាសដែលោក ដឹកនាំគណៈប្រតិភូ ទៅចូលរួមមហាសន្និបាតអង្គការសហប្រជាជាតិលើកទី៧៤ នៅទីក្រុងញូយ៉ក សហរដ្ឋអាមេរិក កាលពីសប្តាហ៍មុន។
លោក ប្រាក់ សុខុន ថ្លែងថា រដ្ឋាភិបាលកម្ពុជា មិនបាននឹកគិតពីការចរចាជាមួយក្រុមប្រឆាំងនោះទេ។ ប៉ុន្តែ លោក សង្កត់ធ្ងន់ថា អ្វីដែលរដ្ឋាភិបាល ចង់បង្ហាញនោះ គឺទង្វើខុសច្បាប់របស់ក្រុមប្រឆាំង។
ប្រមុខការទូតកម្ពុជា បញ្ជាក់បែបនេះថា៖«យើង អត់ទាន់និយាយពីរឿងចរចាឬមិនចរចាទេ ឥឡូវ និយាយពីច្បាប់។ ខ្ញុំលើកឡើងហ្នឹង គឺពាក់ព័ន្ធទៅនឹងច្បាប់ គឺខុសអ៊ីចឹង បង្ហាញពិភពលោកឲ្យឃើញថា គណបក្សប្រឆាំងនៅស្រុកខ្មែរ វិធី ដែល [ពួកគេប្រើ] មិនមែនជាពិធីប្រជាធិបតេយ្យពិតនោះទេ ដើម្បីដណ្តើមអំណាច»។
លោក សម រង្ស៊ី និង បក្សពួកមួយចំនួន បានរងការចោទប្រកាន់ពីរដ្ឋាភិបាលនិងតុលាការកម្ពុជា ថា គម្រោងវិលត្រឡប់មកកម្ពុជារបស់ពួកគេ នៅថ្ងៃទី៩ ខែវិច្ឆិកា ឆ្នាំ២០១៩ គឺដើម្បីធ្វើរដ្ឋប្រហារ។ តុលាការ អះអាងពីក្រមព្រហ្មទណ្ឌថា បទល្មើសនេះ អាចឲ្យពួកគេ ជាប់ពន្ធនាគារពី១៥ឆ្នាំ ទៅ ៣០ឆ្នាំ។
យ៉ាងណា លោក សម រង្ស៊ី ព្យាយាមបកស្រាយថា ដំណើរធ្វើមាតុភូមិនិវិត្តរបស់លោក មិនមែនដើម្បីធ្វើរដ្ឋប្រហារនោះទេ តែដើម្បីបំផុសឲ្យកើតមានអំណាចប្រជាពលរដ្ឋ ពោលគឺ ឲ្យប្រជាពលរដ្ឋ ងើបតស៊ូដើម្បីទាមទារសិទ្ធិសេរីភាព។
ខណៈលោក សម រង្ស៊ី កាន់តែប្រកាសពីការវិលត្រឡប់របស់លោក សកម្មជននិងមន្ត្រីនៃអតីតគណបក្សប្រឆាំង ដែលកំពុងរស់នៅក្នុងស្រុក បានរងការចោទប្រកាន់ពីបទរួមគំនិតក្បត់ជាតិជាហូរហែ ដោយអ្នកខ្លះ ត្រូវបានឃុំខ្លួន ហើយអ្នកខ្លះ បានគេចខ្លួន។ តុលាការ លើកអង្គហេតុថា ពួកគេ ត្រូវចោទប្រកាន់និងចាប់ខ្លួន ដោយសារពួកគេ ប្រកាសត្រៀមចាំទទួលលោក សម រង្ស៊ី និងគាំទ្រលោក សម រង្ស៊ី ដែលមានចេតនាធ្វើរដ្ឋប្រហារ។
អ្នកនាំពាក្យក្រសួងយុត្តិធម៌ បានអំពាវនាវឲ្យអ្នកពាក់ព័ន្ធក្នុងគម្រោងធ្វើរដ្ឋប្រហារ ឆាប់ចេញមកសារភាពកំហុស ឲ្យបានមុនតុលាការចោទប្រកាន់ ដើម្បីទទួលបានការលើកលែងទោស៕
Tag:
ប្រាក់ សុខុន
សម រង្ស៊ី
© រក្សាសិទ្ធិដោយ thmeythmey.com