អន្តរជាតិ
សង្គ្រាមពាណិជ្ជកម្ម៖ ចិន មិនរំពឹងខ្ពស់លើការចរចាជាមួយអាមេរិក បន្ទាប់ពីការចុះបញ្ជីខ្មៅ
×
ដោយ៖ ឈួន ឈីវអ៊ីង
ចិនមានការភ្ញាក់ផ្អើល និងអាក់អន់ចិត្តផងដែរចំពោះការចុះឈ្មោះក្រុមហ៊ុនចិនចំនួន២៨ក្នុងបញ្ជីខ្មៅពាណិជ្ជកម្មដោយអាមេរិកពាក់ព័ន្ធបញ្ហាស៊ីនជាំង។ បញ្ហានេះ ក៏ជះឥទ្ធិពលដល់ការចរចាបញ្ចប់ជម្លោះពាណិជ្ជកម្ម ដោយចិនបានទម្លាក់ក្តីរំពឹងលើកិច្ចពិភាក្សាពាណិជ្ជកម្មក្នុងសប្តាហ៍នេះ។ នេះបើតាមការលើកឡើងរបស់មន្ត្រីរដ្ឋាភិបាលចិន ខណៈលោកប្រធានាធិបតី ដូណាល់ ត្រាំ វិញ បានបង្ហាញពីគំនិតសុទិដ្ឋិនិយមថ្មី។
មន្ត្រីទទួលបន្ទុកការចរចារបស់រដ្ឋអាមេរិក និងចិន នឹងបន្តជួបគ្នានៅទីក្រុងវ៉ាស៊ីនតោននាជំនួបពីរថ្ងៃដែលចាប់ផ្ដើមពីថ្ងៃទី១០ ខែតុលា ដើម្បីបញ្ចប់សង្គ្រាមពាណិជ្ជកម្មដែលមានរយៈពេល ១៥ ខែ។ បញ្ហានេះកំពុងធ្វើឱ្យសេដ្ឋកិច្ចពិភពលោកធ្លាក់ចុះនិងគំរាមកំហែងប្រព័ន្ធពាណិជ្ជកម្មសាកល ។
ឧបនាយករដ្ឋមន្ត្រីចិនលោក លីវ ហឺ និងអ្នកតំណាងពាណិជ្ជកម្មសហរដ្ឋអាមេរិកលោក Robert Lighthizer និងរដ្ឋមន្ត្រីរតនាគារ លោក Steven Mnuchin នឹងដឹកនាំកិច្ចចរចាដែលមិនសូវមានក្ដីរំពឹងថា នឹងទទួលបានលទ្ធផលផ្លែផ្កា។ បើគ្មានវឌ្ឍនភាពគួរឱ្យកត់សម្គាល់ទេលោក ត្រាំ នឹងដំឡើងអត្រាពន្ធលើទំនិញចិនដែលមានតម្លៃ ២៥០ពាន់លានដុល្លារពី២៥ភាគរយទៅ៣០ភាគរយនៅថ្ងៃអង្គារសប្តាហ៍ក្រោយ។
ផ្អែកលើស្ថានការណ៍បច្ចុប្បន្ន មានលទ្ធភាពកិច្ចពិភាក្សារវាងសេដ្ឋកិច្ចធំបំផុតទាំងពីររបស់ពិភពលោក ក្នុងសប្តាហ៍នេះអាចនឹងបញ្ចប់ដោយភាពជាប់គាំង។ មន្ត្រីរដ្ឋាភិបាលចិនប្រាប់ទីភ្នាក់ងារព័ត៌មាន Reuters និយាយថា នៅពេលកិច្ចពិភាក្សាថ្នាក់ក្រោមរវាងសហរដ្ឋអាមេរិក និងមន្ត្រីចិនមានគោលបំណងបង្កើតបរិយាកាសល្អសម្រាប់កិច្ចប្រជុំនាពេលខាងមុខ ការចុះបញ្ជីខ្មៅរបស់ក្រុមហ៊ុនចិនចំនួន ២៨ បានបង្កើតបរិយាកាសអវិជ្ជមានជំនួសវិញ។
រដ្ឋបាលក្រុងវ៉ាស៊ីនតោន បានដាក់ក្រុមហ៊ុនចិនក្នុងបញ្ជីខ្មៅពាណិជ្ជកម្ម ដោយអះអាងថា ពួកគេជាប់ពាក់ព័ន្ធករណីធ្វើទុក្ខបុកម្នេញជនភាគតិចវីហ្គ័រ និងជនជាតិភាគតិចឯទៀតនៅខេត្តស៊ីនជាំងភាគលិច។
ឯរឿងពាណិជ្ជកម្មវិញ រដ្ឋអាមេរិកទាមទារឱ្យចិនផ្លាស់ប្តូរជាមូលដ្ឋានរបៀបដែលខ្លួនដឹកនាំសេដ្ឋកិច្ចទៅរកគំរូនៃទីផ្សារមូលធនសេរីតាមបែបលោកខាងលិច បញ្ឈប់នយោបាយឧបត្ថម្ភធនដល់ក្រុមហ៊ុនរដ្ឋដែលនាំឲ្យមានការប្រកួតប្រជែងមិនស្មោះត្រង់ បើកទីផ្សារឲ្យទូលាយ និងលែងលួចកម្មសិទ្ធិបញ្ញាជាដើម។ ប៉ុន្តែភាគីទាំងពីរ សុទ្ធតែមានមានទស្សនៈខុសគ្នាពីប្រធានបទទាំងនោះ។ មន្ត្រីចិនអះអាងថា ចិនមិនបានលួចយកកម្មសិទ្ធិបញ្ញាទេ ពោលគឺក្រុមហ៊ុនលោកខាងលិចបានលះបង់វាដោយស្ម័គ្រចិត្តហើយប្រមូលផលប្រយោជន៍។
មុនការចរចា លោក ត្រាំ ក៏ស្រាប់តែបង្ហាញជំហរសុទិដ្ឋិនិយម ហើយថា មានឱកាសល្អដែលភាគីទាំងពីរអាចឈានដល់កិច្ចព្រមព្រៀង។ ដូចរាល់ដង លោក ត្រាំ និយាយដោយមោទកភាពថា ចិនចង់បានកិច្ចព្រមព្រៀងជាងអាមេរិកទៅទៀត៕
© រក្សាសិទ្ធិដោយ thmeythmey.com