អន្តរជាតិ
រូបភាព AP
×![]()
ដោយ៖ ងួន សុភាវត្តី
កូរ៉េខាងជើង បាននិយាយរិះគន់ពីការកោះប្រជុំបន្ទាន់របស់សមាជិកក្រុមប្រឹក្សាសន្តិសុខអង្គការសហប្រជាជាតិលើការសាកល្បងមីស៊ីលបាលីស្ទិកបាញ់ចេញពីនវាមុជទឹករបស់ខ្លួន។ ទីក្រុងព្យុងយ៉ាងក៏គំរាមថា ខ្លួននឹងការសាកល្បងអាវុធនុយក្លេអ៊ែរនិងមីស៊ីលចម្ងាយឆ្ងាយឡើងវិញ។
តាមរយៈក្រសួងការបរទេសរបស់ខ្លួន កូរ៉េខាងជើង បានប្រតិកម្មធ្ងន់ៗដាក់ប្រទេសអឺរ៉ុបដែលជាសមាជិកក្រុមប្រឹក្សាសន្តិសុខជុំវិញការកោះប្រជុំបន្ទាន់លើការសាកល្បងមីស៊ីលរបស់ខ្លួន។ កិច្ចប្រជុំនៅញូវយ៉កដែលធ្វើឲ្យកូរ៉េខាងជើងប្រតិកម្មនេះ ធ្វើឡើយក្រោយជំនួបនៅស៊ុយអែតបរាជ័យ ដោយកូរ៉េខាងជើងបាននិយាយថា កិច្ចជំនួបនេះបានបញ្ចប់ដោយសារសហរដ្ឋអាមេរិកមិនបានលើកយកនូវដំណោះស្រាយថ្មីៗមកនិយាយ។
ក្នុងសេចក្ដីថ្លែងការណ៍មួយ អ្នកនាំពាក្យក្រសូងការបរទេសកូរ៉េខាងជើង ដោយបាននិយាយថា ការសាកល្បងអាវុធទាំងនេះគឺជាពង្រឹងការការពារខ្លួនប៉ុណ្ណោះ និងបានចោទប្រកាន់អាមេរិកថាជាអ្នកនៅពីក្រោយការប្រជុំបន្ទាន់នេះ។ នេះបើតាមការផ្សាយរបស់ទីភ្នាក់ងារព័ត៌មាន AP ។
លើសពីនេះទៅទៀត សេចក្តីថ្លែងការនោះ ក៏បានបង្ហាញពីភាពមិនសប្បាយចិត្តរបស់ក្រុងព្យុងយ៉ាង ដោយថាការប្រជុំរបស់ក្រុមប្រឹក្សាសន្តិសុខនេះជាការរករឿងមកលើខ្លួន។ ជាបង្ករឿងធ្ងន់ធ្ងរ ព្រោះក្រុមប្រឹក្សាសន្តិសុខ មិនបានបញ្ចេញប្រតិកម្មអ្វីទេ នៅពេលអាមេរិកបាញ់សាកល្បងមីស៊ីលរបស់ខ្លួននៅថ្ងៃទី២ ខែតុលា។
មន្ត្រីកូរ៉េខាងជើងដដែលព្រមានថា ការអត់ធ្មត់របស់របបដឹកនាំក្រុងព្យុងយ៉ាងគឺមានកំណត់ ហើយសកម្មភាពរបស់អឺរ៉ុបបាននឹងកំពុងរុញច្រានឲ្យកូរ៉េខាងជើងគិតឡើងវិញពីការបញ្ចប់កិច្ចជំនួបជាមួយសហរដ្ឋអាមេរិកទាំងស្រុង។
គួររំលឹកផងដែរថា កិច្ចជំនួបរវាងអាមមេរិក និងកូរ៉េខាងជើងពីរឿងអាវុធនុយក្លេអ៊ែរត្រូវបានជាប់គាំងបន្ទាប់ពីកិច្ចជំនួបលើកទីពីររវាង លោក ដូណាល់ ត្រាំ និងលោក គីម ជុងអ៊ុន នៅវៀតណាមបានបញ្ចប់ដោយគ្មានផ្លែផ្កា។ យ៉ាងណាមិញ ភាគីទាំងពីរ នៅមិនទាន់ទ្វារចរចាឡើយ ប៉ុន្តែក្រុងព្យុងយ៉ាងដាក់លក្ខខណ្ឌឲ្យក្រុងវ៉ាស៊ីតោន ខណៈព្រមានទៀតថា កូរ៉េខាងជើងអាចផ្លាស់ប្ដូរជំហរនៅឆ្នាំក្រោយ៕
© រក្សាសិទ្ធិដោយ thmeythmey.com
