ជម្លោះពាណិជ្ជកម្ម៖ អាមេរិក និងចិនឈានដល់កិច្ចព្រមព្រៀងដំណាក់កាលទីមួយ

អន្តរជាតិ

ជម្លោះពាណិជ្ជកម្ម៖ អាមេរិក និងចិនឈានដល់កិច្ចព្រមព្រៀងដំណាក់កាលទីមួយ

12, Oct 2019 , 9:19 pm

រូបភាព

ប្រធានាធិបតីអាមេរិក ដូណាល់ ត្រាំ ចាប់ដៃប្រេសិតពិសេស និងជាឧបនាយករដ្ឋមន្រ្តីចិន លីវ ហឺ នៅសេតវិមាន។ រូបភាព AFP

ដោយ: តន ចាន់រិទ្ធារ៉ា

ការចរចាដើម្បីបញ្ចប់ជម្លោះពាណិជ្ជកម្មរវាងអាមេរិក និងចិនជុំទី១៣ ទទួលបានផ្លែផ្កាគួរឲ្យកត់សម្គាល់ ដោយភាគីទាំងពីរបានឯកភាពគ្នាជាពាក្យសម្ដីលើចំណុចជាច្រើន។ ប្រធានាធិបតីអាមេរិក ដូណាល់ ត្រាំ បានប្រកាសពីលទ្ធផលមួយផ្នែកនៃកិច្ចព្រមព្រៀងបញ្ចប់ជម្លោះអំឡុងជំនួបជាមួយប្រតិភូចិនដឹកនាំដោយឧបនាយករដ្ឋមន្ត្រី លីវ ហឺ ។ ការចុះហត្ថលេខាផ្លូវការ អាចនឹងកើតមាននៅ៥សប្ដាហ៍ខាងមុខទៀត។

ពន្លឺនៃដំណោះស្រាយសង្គ្រាមពាណិជ្ជកម្មរវាងអាមេរិក និងចិន បានលេចចេញបណ្ដើរហើយ ខណៈសង្គ្រាមដ៏រំជើបរំជួលមួយនេះ ឈានចូលខែទី១៥ ទៅហើយ។ តំណាងចរចារវាងអាមេរិក និងចិន បានបញ្ចប់ការចរចាជុំទី១៣ ដែលធ្វើនៅរដ្ឋធានីវ៉ាស៊ីនតោនជាមួយនឹងលទ្ធផលគួរឲ្យកត់សម្គាល់ជាច្រើន។ ជាមួយអ្វីដែលទទួលបាន ទីក្រុងប៉េកាំងហាក់ថយក្រោយមួយជំហាន និងបានផ្ដល់សម្បទានដើម្បីសម្រួលចិត្តក្រុងវ៉ាស៊ីនតោន។

បើតាមទីភ្នាក់ងារព័ត៌មាន AFP ចិនបានយល់ព្រមបង្កើនការនាំចូលផលិតផលកសិកម្មពីអាមេរិកចឲ្យបានពី៤០ពាន់លានដុល្លារទៅ៥០ពាន់លានដុល្លារក្នុងមួយឆ្នាំ។ នេះជាការសន្យាដ៏ធំសម្រាប់កសិករអាមេរិក ព្រោះកាលពីឆ្នាំ២០១៧ ចិននាំចូលផលិតផលកសិកម្មអាមេរិកចំនួន១៩,៥ពាន់លានដុល្លារ និងធ្លាក់មកត្រឹម៩ពាន់លានដុល្លារក្នុងឆ្នាំ២០១៨ ។ ជាមួយគ្នានោះ ភាគីទាំងពីរក៏យល់ព្រមពីតម្លាភាពនៃប្រព័ន្ធប្ដូរប្រាក់របស់ចិនផងដែរ។

ចិន និងអាមេរិកក៏បានមូលមតិគ្នាលើបញ្ហាផ្ទេរបច្ចេកវិទ្យា ដែលជាបញ្ហាចម្រូងចម្រាសមួយ។ នាជំនួបជាមួយឧបនាយករដ្ឋមន្ត្រីចិន លីវ ហឺ នៅថ្ងៃទី១១ ខែតុលាក្រោយចរចា ប្រធានាធិបតីអាមេរិក ដូណាល់ ត្រាំ អះអាងថា ការចរចាលើបញ្ហានេះ ធ្វើឡើងដោយរលូន ដោយក្រុមហ៊ុនអាមេរិកនឹងបន្តផ្ទេបច្ចេកវិទ្យារបស់ខ្លួនទៅឲ្យចិន ហើយចិននឹងបើកចំហទីផ្សាររបស់ខ្លួនឲ្យកាន់តែធំសម្រាប់អាមេរិក។ ដោយមិនផ្ដល់ព័ត៌មានជាក់លាក់ លោកបន្តថា បញ្ហាកម្មសិទ្ធិបញ្ញា ក៏ឈានដល់កិច្ចព្រមព្រៀងដែរ។

ដើម្បីដោះស្រាយជម្លោះទៅថ្ងៃក្រោយ ភាគីទាំងពីរក៏ឯកភាពគ្នាលើការបង្កើតយន្តការដោះស្រាយជម្លោះ។ តំណាងចរចាពាណិជ្ជកម្មអាមេរិក Robert Lighthizer បញ្ជាក់ថា យន្តការនេះកំពុងស្ថិតក្នុងដំណាក់បញ្ចប់ ដែលនឹងបើកផ្លូវដល់ការធានាការអនុវត្តកិច្ចព្រមព្រៀង។ ចំណែកឯការដំឡើងពន្ធដែលគ្រោងអនុវត្តនៅថ្ងៃទី១៥ ខែធ្នូនោះ ត្រូវលុបចោលវិញហើយ។

យ៉ាងណាមិញ ការឯកភាពគ្នានេះ មិនទាន់សរសេរលើក្រដាស្នាមអ្វីនៅឡើយទេ។ ពោល គឺភាគីទាំងពីរឯកភាពគ្នាជាសម្ដីប៉ុណ្ណោះ។ រដ្ឋមន្ត្រីរតនាគារអាមេរិក Steven Mnuchin និយាយថា ភាគីទាំងពីរមានការយល់ឃើញលើបញ្ហារួមជាច្រើន ប៉ុន្តែនៅមានការងារសេសសល់ជាច្រើនទៀត។ លោកបន្តថា នឹងមិនមានការចុះហត្ថលេខាឡើយ ប្រសិនបើមិនទាន់មានកិច្ចព្រមព្រៀងជាលាយលក្ខណ៍អក្សរសម្រាប់ប្រធានាធិបតីនោះ។

ភាគីទាំងពីរ អាចចំណាយពេលបីទៅប្រាំសប្ដាហ៍ដើម្បីយកអ្វីដែលព្រមព្រៀងគ្នាពេលនេះ សរសេរលើលិខិតផ្លូវការ។ នេះបើតាមការលើកឡើងរបស់ប្រធានាធិបតីអាមេរិក ដូណាល់ ត្រាំ ដោយរំពឹងថា លោកនឹងចុះកិច្ចព្រមព្រៀងជាមួយសមភាគីចិន ស៊ី ជិនភីង នៅពេលខ្លីខាងមុខ។ កិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិកនៅស៊ីលីពាក់កណ្ដាលខែវិច្ឆិកាខាងមុខ អាចជាពេលដែលភាគីទាំងពីរចុះហត្ថលេខាតែម្ដង៕