យុវជនខ្មែររៀបព្រឹត្តិការណ៍សិល្បៈ មុនទៅចូលរួមកម្មវិធីនាវាយុវជនរយៈពេល៥២ថ្ងៃ

ជាតិ

យុវជនខ្មែររៀបព្រឹត្តិការណ៍សិល្បៈ មុនទៅចូលរួមកម្មវិធីនាវាយុវជនរយៈពេល៥២ថ្ងៃ

13, Oct 2019 , 11:33 am

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ប្រតិភូយុវជនកម្ពុជាចំនួន២៩នាក់ បានសម្តែងសិល្បៈរួមគ្នា ដើម្បីបង្កើតរាត្រីនៃការចងចាំ (Night of Memories) មុននឹងធ្វើដំណើរទស្សនកិច្ចសិក្សានៅប្រទេសចំនួន៥ ក្នុងតំបន់អាស៊ីអាគ្នេយ៍តាមនាវា។ ប្រតិភូយុវជនកម្ពុជាទាំងនេះ នឹងទៅចូលរួមកម្មវិធីនាវាយុវជនអាស៊ីអាគ្នេយ៍ និងជប៉ុន (SSEAYP International) លើកទី៤៦ ក្នុងរយៈពេល៥២ថ្ងៃ ពោលចាប់ពីថ្ងៃទី២៣តុលាដល់ថ្ងៃទី១៣ធ្នូ ឆ្នាំ២០១៩។

ក្នុងពិធីបិទវគ្គបណ្តុះបណ្តាលដល់ប្រតិភូយុវជនកម្ពុជាកាលពីយប់ថ្ងៃទី១២តុលា នៅសាលសន្និសីទចតុមុខ រាជធានីភ្នំពេញ កញ្ញា សុគុណ សុភ័ក្ត្ររាសី ប្រធានក្រុមប្រតិភូនាវាយុវជនអាស៊ីអាគ្នេយ៍លើកទី៤៦នេះ បាននិយាយដូច្នេះ សម្រាប់នាវាយុវជនអាស៊ីអាគ្នេយ៍និងជប៉ុនលើកទី៤៦នេះ ប្រភិភូយុវជននាបណ្តាប្រទេសនៃសមាជិកអាស៊ាន នឹងធ្វើដំណើរជួបជុំគ្នានៅប្រទេសជប៉ុន ដើម្បីធ្វើពិធីបើកជាផ្លូវការនៅថ្ងៃទី២៤តុលា។

សិល្បៈដែលក្រុមយុវជនទាំងនោះសម្តែងរួមគ្នា គឺសាច់រឿងចៅសព្វប្រសិទ្ធ ដែលមានបញ្ចូលនូវ របាំក្ងោក របាំគោះអង្រែ, ការសម្តែងក្បាច់គុនបុរាណ, របាំបែបសហសម័យ និងលេងហ្គីតា ជាដើម។

កញ្ញា សុភ័ក្ត្ររាសី បានបញ្ជាក់ថា បន្ទាប់ពីប្រារព្ធពិធីបើកផ្លូវការនេះរួច ក្រុមនាវាចរទាំងនោះ នឹងបែកចែកគ្នាជាក្រុមទៅទស្សនកិច្ចសិក្សានៅតំបន់មួយចំនួនក្នុងប្រទេសជប៉ុនតាមនាវា ដើម្បីធ្វើតាមផ្លូវទឹកពីប្រទេសជប៉ុន ទៅកាន់ប្រទេសវៀតណាម សិង្ហបុរី មីយ៉ាន់ម៉ា និងម៉ាឡេស៊ី ហើយចុងក្រោយនឹងត្រលប់ទៅកាន់ប្រទេសជប៉ុនវិញ ដើម្បីប្រារព្ធពិធីបិទ និងវិលទៅកកាន់ប្រទេសរៀងៗខ្លួនវិញ៕

សូមទស្សនារូបភាពនៃការសម្តែងសិល្បៈរបស់ប្រតិភូយុវជនកម្ពុជា ដូចតទៅ៖