ជាតិ
ដាំ «ស្ពៃក្តោប» ចន្លោះពីខែតុលា ទៅខែកុម្ភៈ នៅឆ្នាំបន្ទាប់ បានទិន្នផលច្រើន
× ភ្នំពេញ៖ ស្ពៃក្តោបជាប្រភេទបន្លែ ដែលមានរាងមូលផ្តុំឡើងដោយស្លឹកជាច្រើនស្រទាប់។ ស្ពៃកោ្តបមានបីប្រភេទគឺ ប្រភេទពូជពណ៌ស ពណ៌ស្វាយ និងពណ៌ក្រហម។ ប៉ុន្តែសម្រាប់ប្រជាកសិករកម្ពុជា គឺនិយមដាំស្ពៃកោ្តបពណ៌ស។ ដើម្បីដាំស្ពៃកោ្តប ដែលមានគុណភាពល្អនិងទិន្នផលច្រើនពី២៥ទៅ៣០តោនក្នុងមួយហិកតា ប្រជាកសិករគ្រប់រូបខ្មែរគួរណាស់ដាំបន្លែប្រភេទនេះ នៅរដូវត្រជាក់ក្នុងចន្លោះខែតុលាដល់ខែកុម្ភៈ។
បើយោងតាមសៀវភៅបច្ចេកទេសនៃការដាំបន្លែនិងឈើហូបផ្លែរបស់អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ ការដាំដុះស្ពៃក្តោបក្នុងចន្លោះខែតុលា ដល់ខែកុម្ភៈឆ្នាំបន្ទាប់នេះ ព្រោះមានសីតុណ្ហភាពត្រជាក់ ពន្លឺថ្ងៃ និងចំណាំងរបស់ពន្លឺថ្ងៃសមស្រប។ ដោយឡែក ការរំខានឬរាតត្បាតពីសត្វល្អិត និងជំងឺផ្សេងៗក៏ច្រើនផងដែរ។ ជាទូទៅបន្លែប្រភេទនេះ មានរយៈពេលដាំដុះពី៨០-៩០ថ្ងៃ ទើបអាចប្រមូលផលបាន។
ខ្លឹមសារក្នុងសៀវភៅបច្ចេកទេសដាំបន្លែនេះបានបញ្ជាក់ថា ដើម្បីដាំដុះស្ពៃក្តោបបានកាន់តែល្អក្នុងរដូវត្រជាក់នេះ ដំបូងកសិករត្រូវលើករងបន្លែជាមុនសិន ក្នុងកម្ពស់ពី១៥-២០សង់ទីម៉ែត្រ ទទឹង១០០សង់ទីម៉ែត្រ និងបណ្តាយ១០-១៥សង់ទីម៉ែត្រ។
ករណីដីមានជំរាល ត្រូវលើករងបន្លែទទឹងជំរាលរបស់ដី បន្ទាប់មកត្រូវកសិករត្រូវរាស់ដីដោយរនាស់ដៃ ដើម្បីយកស្មៅចេញ និងពង្រាបរងឱ្យស្មើល្អ ទើបកសិករអាចកាប់រណ្តៅនៅលើរងជាពីរជួរចន្លោះ៧០សង់ទីម៉ែត្រ ជាមួយនឹងរណ្តៅពី៥០-៦០សង់ទីម៉ែត្រ ហើយយកជីគីមី ជីលាមកសត្វឬជីកំប៉ុស្តិ៍លាយចូលគ្នាដាក់ក្នុងរណ្តៅដាំបន្លែនោះ។
សម្រាប់ផ្ទៃដីដាំបន្លែមួយហិកតា កសិករអាចយកជីគីមីប្រភេទ១៥.១៥.១៥ឬ១៨.៤៦.០ ចំនួន២០០គីឡូក្រាម លាមកសត្វ(អាចម៍គោ អាចម៍មាន់) ឬជីកំប៉ុស្តិ៍ពី១៥-២០តោន និងរោយថ្នាំប្រភេទ Furadan ១០គីឡូក្រាមលាយបញ្ជូលគ្នាបាច់លើផ្ទៃដីដាំដុះ ទើបយកកូនស្ពៃកោ្តបមកដាំ។ ក្នុងរយៈពេលដាំដុះបន្លែនេះដីត្រូវមានសំណើមជាមធ្យមពី៨០-៨៥ភាគរយ និងស្រោចទឹកក្នុងមួយថ្ងៃពីរដង គឺពេលព្រឹក និងពេលល្ងាច៕
Tag:
ស្ពៃកោ្តប
ចំណេះដឹង
© រក្សាសិទ្ធិដោយ thmeythmey.com