អន្តរជាតិ
ព្យុះ Hagibis ៖ ជប៉ុនខំទាំងយប់ទាំងថ្ងៃដើម្បីស្វែងរកអ្នកបាត់ខ្លួន ខណៈអ្នកស្លាប់កើនដល់៦៧នាក់
×
ដោយ៖ ឈួន ឈីវអ៊ីង
ភ្លៀងធ្លាក់យ៉ាងជោកជាំ បានគំរាមគំហែង និងរំខានដល់ការខិតខំប្រឹងប្រែងរបស់ក្រុមអ្នកជួយសង្គ្រោះរបស់ជប៉ុនរាប់ម៉ឺននាក់ដែលកំពុងស្វែងរកជនរងគ្រោះ បន្ទាប់ពីឥទ្ធិពលរបស់ខ្យល់ព្យុះទីហ្វុង Hagibis។ មកដល់ពេលនេះយ៉ាងហោចណាស់មនុស្ស ៦៧នាក់ត្រូវបានបាត់បង់ជិវិត។ បើតាមការចុះផ្សាយរបស់សារព័ត៌មាន AFP នៅថ្ងៃទី១៥ តុលា។
ព្យុះ Hagibis បានវាយប្រហារប្រទេសជប៉ុនតាំងពីយប់ថ្ងៃទី១២ ខែតុលា ដែលបណ្តាលឲ្យមានខ្យល់បោកបក់ខ្លាំង ករណីបាក់ដី និងគ្រោះទឹកជំនន់ដោយសារមានភ្លៀងធ្លាក់ជោកជាំនៅតាមបណ្តាខេត្ត៣៦ នៃខេត្តទាំង៤៧របស់ប្រទេសនេះ។
នាយករដ្ឋមន្ត្រីជប៉ុន លោក ស៊ិនហ្សូ អាបេ បានថ្លែងក្នុងកិច្ចប្រជុំស្តីពីគ្រោះមហន្តរាយនៅថ្ងៃទី១៤ ខែតុលាថា មកដល់ពេលនេះមានជនរងគ្រោះជាច្រើននៅមិនទាន់បានរកឃើញ ហើយក្រុមអ្នកជំនាញកំពុងព្យាយាមរុករក និងជួយសង្គ្រោះពួកគេទាំងយប់ទាំងថ្ងៃ។
លោកបានសន្យាថា នឹងធ្វើគ្រប់យ៉ាងតាមដែលអាចធ្វើបានដើម្បីសង្គ្រោះជនរងគ្រោះនិងអ្នកដែលនៅមានជីវិត ព្រមទាំងបានដាក់បញ្ជាទៅក្រសួងការពារជាតិឲ្យបញ្ជូនទ័ពបម្រុងមួយពាន់នាក់ទៅចូលរួមប្រតិបត្តិការស្វែងរកនោះផងដែរ។ នេះបើតាមការផ្សាយរបស់ទីភ្នាក់ងារព័ត៌មាន AFP ។ ចំនួនអ្នកស្លាប់ក៏កើនឡើងបន្តបន្ទាប់ ដោយគិតត្រឹមថ្ងៃទី១៥ ខែតុលា មានដល់ទៅ៦៧នាក់ទៅហើយ ខណៈជាច្រើនាក់បន្តបាត់ខ្លួន។
អ្នកនាំពាក្យរបស់ឆ្មាំសមុទ្រជប៉ុននិយាយថា អ្នកស្លាប់និងរបួសរួមមានកម្មករម្នាក់ដែលរថយន្តត្រូវបានហូរតាមទឹកជំនន់។ យ៉ាងហោចណាស់ មាននាវិក ៧នាក់នៅក្នុងនាវាដឹកទំនិញមួយដែលបានលិចនៅឈូងសមុទ្រតូក្យូក្នុងយប់ថ្ងៃសៅរ៍។ នាវិក ៤នាក់ផ្សេងទៀត មកពីប្រទេសចិន មីយ៉ាន់ម៉ា និងវៀតណាម ត្រូវបានជួយសង្គ្រោះទាន់ពេលនៅពេលនាវាលិច ខណៈកងឆ្មាំសមុទ្រកំពុងស្វែងរកនាវិកម្នាក់ដែលបាត់ខ្លួននៅឡើយ។
បើតាមសារព័ត៌មានក្នុងស្រុកនិយាយថា ខ្យល់ព្យុះ Hagibis មានល្បឿនដល់ទៅ ២១៦គីឡូម៉ែត្រក្នុងមួយម៉ោង។ ភ្លៀងធ្លាក់ខ្លាំងជោកជាំ បណ្តាលឲ្យមានការខូចខាតធ្ងន់ធ្ងរ និងមានទីកជំនន់ខ្លាំងនៅភាគខាងកើត និងខាងជើងប្រទេស។
គិតត្រឹមរសៀលថ្ងៃទី១៤ ខែតុលា គ្រួសារជាង ៧ម៉ឺនគ្រួសារនៅតែគ្មានអគ្គិសនីប្រើប្រាស់ ហើយប្រព័ន្ធទឹកត្រូវបានកាត់ផ្តាច់។ គ្រោះមហន្តរាយនេះបានធ្វើឱ្យមនុស្សរាប់ម៉ឺននាក់រស់នៅក្នុងជំរំភៀសខ្លួន ហើយពួកគេមិនប្រាកដថាពេលណានឹងអាចវិលត្រឡប់ទៅផ្ទះវិញឡើយ៕
© រក្សាសិទ្ធិដោយ thmeythmey.com