ជប៉ុន៖ ក្រុមជួយសង្គ្រោះ បន្តស្វែងរកអ្នកនៅមានជីវិត ខណៈអ្នកស្លាប់កើនដល់ ៧៤នាក់

អន្តរជាតិ

ជប៉ុន៖ ក្រុមជួយសង្គ្រោះ បន្តស្វែងរកអ្នកនៅមានជីវិត ខណៈអ្នកស្លាប់កើនដល់ ៧៤នាក់

16, Oct 2019 , 10:13 am

រូបភាព

ដោយ: ធៀន ភារិន្ទ

ក្រុមអ្នកជួយសង្គ្រោះនៅក្នុងប្រទេសជប៉ុន នាថ្ងៃទី១៥ ខែតុលា បានខិតខំយ៉ាងសស្រាក់សស្រាំ ក្នុងការស្វែងរកមនុស្សដែលអាចនៅរស់រានមានជីវិត បន្ទាប់ពីមានការវាយប្រហារដោយព្យុះ Hagibis នៅថ្ងៃទី១២ និង១៣ ខែតុលា។ ការណ៍នេះ បង្កឲ្យអ្នកជួយសង្គ្រោះមានភាពអស់សង្ឃឹមជាខ្លាំងក្នុងការស្វែងរកមនុស្សមានជីវិត បន្ទាប់ពីចំនួនមនុស្សស្លាប់ បានកើនឡើងជាង៧០នាក់ ។

ព្យុះ Hagibis ដែលមានន័យថាល្បឿន បានវាយប្រហារមកលើប្រទេសជប៉ុន តាំងពីថ្ងៃ១២ ខែតុលា បានបង្កឲ្យមានខ្យល់បក់យ៉ាងខ្លាំង ទឹកជំនន់ ការបាក់ដី នៅតាមបណ្តាខេត្ត៣៦របស់ជប៉ុន។ ប្រព័ន្ធផ្សព្វផ្សាយសាធារណៈជប៉ុន NHK បានអះអាងថា ចំនួនមនុស្សស្លាប់ បានកើនឡើងដល់ ៧៤នាក់ហើយ បើគិតមកដល់ថ្ងៃ១៥ ខែតុលា។

«កិច្ចការជួយសង្គ្រោះ និងរុករកអ្នកបាត់ខ្លួន គឺកំពុងធ្វើការលើសពី ២៤ម៉ោង»។ នេះជាសម្តីរបស់នាយករដ្ឋមន្ត្រី ស៊ិនហ្សូ អាបេ នាកិច្ចប្រជុំសភា។ នាយករដ្ឋមន្ត្រីជប៉ុន បានលើកឡើងថា ដើម្បីជួយសង្គ្រោះមនុស្សឲ្យបានកាន់តែមានប្រសិទ្ធភាព ជប៉ុនមិនមានគម្រោងកាត់បន្ថយប្រតិបត្តិការជួយសង្គ្រោះមនុស្សឡើង។ ប៉ូលិស កងយាមល្បាតសមុទ្រ ក្រុមពន្លត់អគ្គិភ័យ និងយោធាប្រមាណជា ១១ម៉ឺននាក់ កំពុងធ្វើប្រតិបត្តិការរុរកនេះ ហើយមនុស្ស ៣០០០នាក់ត្រូវបានជួយសង្គ្រោះពីគ្រោះមហន្តរាយ។ នេះបើ តាមការចុះផ្សាយរបស់ទីភ្នាក់ងារព័ត៌មាន AFP។

មកទល់ពេលនេះ ឥទ្ធិពលព្យុះ Hagibis បានបង្កឲ្យ ប្រជាជនជប៉ុនប្រមាណជា ២៤០០០ នាក់គ្មានអគ្គិសនីប្រើប្រាស់ ហើយជាង ១២ម៉ឺនគ្រួសារ គ្មានទឹកប្រើប្រាស់។ លើសពីនេះទៅទៀត មនុស្សជាង ១ម៉ឺននាក់កំពុងស្នាក់នៅក្នុងជម្រករបស់រដ្ឋាភិបាល ហើយមិនទាន់មានព័ត៌មានច្បាស់លាស់ឡើយថា ពេលណាពួកគេអាចត្រលប់មកផ្ទះវិញ។
ដោយសារតែគ្រោះមហន្តរាយនេះ រដ្ឋាភិបាលបានសន្យាថា នឹងផ្តល់ហិរញ្ញវត្ថុដល់តំបន់ ដែលទទួលរងនូវផលប៉ះពាល់ ប៉ុន្តែទីក្រុងតូក្យូ មិនបានបញ្ជាក់ពីចំនួនថវិការជាក់លាក់ឡើយ។

សូមបញ្ជាក់ថា ព្យុះ Hagibis ដែលមានន័យថាល្បឿនក្នុងភាសាហ្វីលីពីន បានវាយប្រហារមកលើជប៉ុនជាមួយនឹងសន្ទុះខ្យល់ ២១៦គីឡូម៉ែត្រក្នុងមួយម៉ោង។ បញ្ហានេះ បណ្តាលឲ្យមានការបផ្លិចបំផ្លាញយ៉ាងខ្លាំងនៅក្នុងប្រទេសជប៉ុនតែម្ដង៕