អន្តរជាតិ
រដ្ឋសភាអាមេរិក អនុម័តសំណើច្បាប់ «ប្រជាធិបតេយ្យហុងកុង» តែចិនថា នឹងប៉ះពាល់ទំនាក់ទំនងទ្វេភាគី ប្រភពរូប៖ AFP
× រដ្ឋសភាអាមេរិក បានអនុម័តសេចក្ដីច្បាប់គាំទ្រប្រជាធិបតេយ្យក្នុងក្រុងហុងកុង។ ស្ថាប័ននីតិបញ្ញត្តិនេះ ក៏សម្រេចអនុម័តសំណើច្បាប់ដែលហាមឃាត់ការនាំចេញសម្ភារបង្ក្រាបបាតុកម្ម ដូចជា ឧស្ម័នបង្ហូរទឹកភ្នែកឲ្យអាជ្ញាធរហុងកុងផងដែរ។ មិនយូរប៉ុន្មានក្រោយការអនុម័តនៅរដ្ឋសភាអាមេរិក ក្រុងប៉េកាំងព្រមានចាត់វិធានការវាយបកខ្លាំងៗប្រឆាំងអាមេរិក ប្រសិនបើវាក្លាយជាច្បាប់។
នៅថ្ងៃអង្គារ ទី១៥ ខែតុលា រដ្ឋសភាអាមេរិក បានអនុម័តសំណើច្បាប់ប្រជាធិបតេយ្យ និងសិទ្ធិមនុស្សហុងកុងឆ្នាំ២០១៩។ សំណើច្បាប់ដែលក្រុងប៉េកាំងចាត់ទុកជាការប៉ុនប៉ងជ្រៀតជ្រែកកិច្ចការផ្ទៃក្នុងរបស់ចិន និងរាំងខ្ទប់ការងើបឡើងរបស់ប្រទេសអាស៊ីមួយនេះ។ សេចក្តីព្រាងច្បាប់នេះ បានអនុម័តដោយសំឡេងជាឯកច្ឆ័ន្ទ។
ប្រធានរដ្ឋសភាអាមេរិក លោកស្រី ណាន់ស៊ី ផេឡូស៊ី បញ្ជាក់ថា ទាំងសមាជិកបក្សប្រជាធិបតេយ្យ និងសាធារណរដ្ឋក្នុងរដ្ឋសភា និងក្នុងព្រឹទ្ធសភា ឈរប្រកៀកស្មាគ្នាជាមួយប្រជាជនហុងកុង។ ត្រង់នេះ លោកស្រី សង្កត់ធ្ងន់ថា ប្រសិនបើ សហរដ្ឋអាមេរិក មិនហ៊ាននិយាយពីបញ្ហាសិទ្ធិមនុស្សជាមួយចិនព្រោះតែប្រយោជន៍ពាណិជ្ជកម្មនោះ ដូច្នេះក្រុងវ៉ាស៊ីនតោនបាត់បង់អំណាចផ្នែកសីលធម៌ទាំងអស់ដើម្បីនិយាយពីបញ្ហាសិទ្ធិមនុស្សគ្រប់ទីកន្លែងទាំងអស់ក្នុងពិភពលោក។ នេះបើតាមការចុះផ្សាយរបស់ទូរទស្សន៍អាមេរិក CNN ។
ប្រសិនបើចូលជាធរមានមែននោះ ច្បាប់គាំទ្រប្រជាធិបតេយ្យហុងកុងនេះ នឹងតម្រូវឲ្យរដ្ឋាភិបាលអាមេរិកវាយតម្លៃជាប្រចាំឆ្នាំលើការអភិវឌ្ឍនយោបាយក្នុងទីក្រុងនេះ។ នោះគឺមើលថា ហុងកុង នៅតែអាចរក្សាលក្ខខណ្ឌស្វ័យភាពគ្រប់គ្រាន់ ដាច់ដោយឡែកពីចិនដីគោក ក្នុងគោលដៅរក្សាការផ្តល់ឲ្យពិសេសពីសហរដ្ឋអាមេរិក។ ទន្ទឹមនេះ សំណើច្បាប់នេះ ក៏នឹងបើកផ្លូវឲ្យរដ្ឋបាលលោកត្រាំដាក់ទណ្ឌកម្មលើមន្ត្រីចិនដែលទទួលខុសត្រូវចំពោះការបំផ្លិចបំផ្លាញសិទ្ធិមនុស្ស និងស្វ័យភាពរបស់ទីក្រុងហុងកុង។
ក្រៅពីសំណើច្បាប់នេះ រដ្ឋសភាអាមេរិក នៅថ្ងៃអង្គារដដែល ក៏បានអនុម័តវិធានការពាក់ព័ន្ធបញ្ហាហុងកុងពីរផ្សេងទៀត រួមមាន សេចក្តីសម្រេចគាំទ្រក្រុមបាតុករហុងកុង និងសំណើច្បាប់ការពារហុងកុង។ សម្រាប់សេចក្ដីស្នើច្បាប់នេះ អាមេរិកនឹងហាមឃាត់ការនាំចេញសម្ភាៈយោធានានា ដែលប៉ូលិសហុងកុងអាចប្រើប្រឆាំងនឹងក្រុមអ្នកតវ៉ា។
ក្រោយត្រូវបានអនុម័តរួចរាល់ដោយរដ្ឋសភាអាមេរិក សំណើច្បាប់នេះ នឹងរង់ចាំការបោះឆ្នោតមួយវគ្គទៀតក្នុងព្រឹទ្ធសភាអាមេរិត មុននឹងបញ្ជូនទៅសេតវិមានអាមេរិកសម្រាប់ឲ្យលោកប្រធានាធិបតីអាមេរិក ដូណាល់ ត្រាំ ចុះហត្ថលេខាក្លាយជាច្បាប់ ឬក៏វ៉េតូវិញ។ សម្រាប់ពេលវេលានៃការបោះឆ្នោត ព្រឹទ្ធសភានៅតែមិនទាន់កំណត់នៅឡើយ។
ទាក់ទិននឹងការអនុម័តសំណើច្បាប់គាំទ្រប្រធានាធិបតេយ្យហុងកុងនេះ ក្រុងប៉េកាំង តាមរយៈក្រសួងការបរទេសខ្លួន បានប្រតិកម្មខ្លាំងៗលើជំហរនេះ។ ក្នុងសន្និសីទព័ត៌មាន ថ្ងៃ១៦ តុលា អ្នកនាំពាក្យក្រសួងការបរទេសចិន លោក Geng Shuang បញ្ជាក់ឲ្យដឹងថា ប្រសិនបើសំណើច្បាប់ទាំងនេះ ក្លាយជាច្បាប់នោះ វានឹងមិនត្រឹមតែប៉ះពាល់ដល់ប្រយោជន៍ចិននិងទំនាក់ទំនងអាមេរិក-ចិន ប៉ុណ្ណោះទេ ប៉ុន្តែវាក៏នឹងបំផ្លាញធ្ងន់ធ្ងរដល់ប្រយោជន៍អាមេរិកទៀតផង។ ត្រង់នេះ លោក សង្កត់ធ្ងន់ថា រដ្ឋាភិបាលចិន នឹងចាត់វិធានការវាយបកខ្លាំងៗ ដើម្បីឆ្លើយតបនឹងការសម្រេចចិត្តខុសរបស់ភាគីអាមេរិក ក្នុងគោលដៅការពារប្រយោជន៍អភិវឌ្ឍន៍ សន្តិសុខ និងអធិបតេយ្យភាពខ្លួន។
មន្ត្រីនាំពាក្យក្រសួងការបរទេសចិនរូបនេះ លើកឡើងជាថ្មីថា ហុងកុងជាផ្នែករបស់ចិន ហើយកិច្ចការហុងកុងជាកិច្ចការផ្ទៃក្នុងទាំងស្រុងរបស់ចិន ដែលមិនត្រូវការការជ្រៀតជ្រែកពីបរទេសឡើយ។ ម្យ៉ាងវិញទៀត លោក Geng ក៏ទទូចឲ្យក្រុងវ៉ាស៊ីនតោនបញ្ឈប់ភ្លាមៗការជំរុញសំណើច្បាប់ពាក់ព័ន្ធបញ្ហាហុងកុង និងឈប់លូកដៃក្នុងកិច្ចការផ្ទៃក្នុងហុងកុងនិងចិនផងដែរ៕
Tag:
សហរដ្ឋអាមេរិក
រដ្ឋសភា
ហុងកុង
ប្រជាធិបតេយ្យ
© រក្សាសិទ្ធិដោយ thmeythmey.com