អន្តរជាតិ
រដ្ឋាភិបាលថៃ គម្រោងយកពន្ធលើអាហារកែច្នៃមានជាតិប្រៃ រូបភាព Grain
×
ដោយ៖ ឈួន ឈីវអ៊ីង
រដ្ឋាភិបាលថៃ កំពុងរៀបចំសេចក្ដីស្នើមួយដើម្បីយកពន្ធលើអាហារកែច្នៃ និងអាហាមានជាតិប្រៃ។ ប៉ុន្តែករណីលើកលែងនឹងត្រូវបានអនុវត្តចំពោះពពួកគ្រឿងទេស ដូចជាទឹកត្រី ទឹកស៊ីអ៊ីវ និងអំបិលជាដើម។ នេះបើតាមសម្តីរបស់នាយកដ្ឋានគយថៃ នៅថ្ងៃទី១៧ ខែតុលា។
អាហារកែច្នៃមានជាតិប្រៃដោយប្រើសមាសធាតុសូដ្យូមដូចជា ផលិតផលកក អាហារកំប៉ុង និងមីកំប៉ុងជាដើម ស្ថិតក្នុងបញ្ជីអាហារដែលនឹងត្រូវពិចារណាយកពន្ធ។ អគ្គនាយកគយថៃ លោក Patchara Anuntasilpa បាននិយាយថា ភ្នាក់ងាររបស់លោកកំពុងតែធ្វើការយ៉ាងស្វិតស្វាញជាមួយក្រសួងសុខាភិបាល ដើម្បីសិក្សាពីការដំឡើងពន្ធថ្មីដែលជាផ្នែកមួយនៃកិច្ចខិតខំប្រឹងប្រែងលើកកម្ពស់ការប្រើប្រាស់អាហារសុខភាព។
អត្រាយកពន្ធ នឹងត្រូវប្រែប្រួលទៅតាមបរិមាណអំបិលដែលមាននៅក្នុងអាហារ។ សមាសធាតុសូដ្យូមមានកាន់តែច្រើន អត្រាពន្ធក៏ដំឡើងកាន់តែខ្ពស់ទៅតាមនោះ។ នេះជាបើតាមការបញ្ជាក់របស់លោក Patchara ដែលបានបន្ថែមទៀតថា ព័ត៌មានលំអិតនឹងត្រូវបញ្ចប់ឆាប់ៗ ហើយបញ្ជូនទៅរដ្ឋមន្ត្រីហិរញ្ញវត្ថុ Uttama Savanayana នៅចុងឆ្នាំនេះ។
សំណើដើម្បីដាក់ពន្ធលើចំណីអាហារដែលផ្សំពីសមាសធាតសូដ្យូមក្នុងកម្រិតខ្ពស់ គឺមិនធ្លាប់មានពីមុនមកនោះទេក្នុងប្រទេសថៃ។ ប៉ុន្តែគម្រោងនេះ បានយកគម្រូតាមពន្ធដែលដាក់លើភេសជ្ជៈមានជាតិស្ករ។ បើតាមកាសែតបាងកកប៉ុស្តិ៍ ក្នុងរយៈពេលពីមួយឆ្នាំទៅពីរឆ្នាំដំបូង ការយកពន្ធនឹងត្រូវកាត់បន្ថយសម្រាប់ក្រុមហ៊ុនក្នុងស្រុក ដើម្បីលើកទឹកចិត្តឲ្យអ្នកផលិតកាត់បន្ថយអំបិលក្នុងផលិតផលរបស់ពួកគេ។
មន្ត្រីខាងលើបន្តថា ផលិតផលមានជាតិប្រៃដំបូងដែលត្រូវបង់ពន្ធរួមមានអាហារកក អាហារកំប៉ុង និងមី តែមិនយកពន្ធលើអាហារសម្រន់របស់កុមារព្រោះវាមិនមែនជាអាហារប្រចាំថ្ងៃទេ។ គ្រឿងទេស និងគ្រឿងផ្សំផ្សេងទៀតក៏ត្រូវបានលើកលែងផងដែរ។
នាយកដ្ឋានរដ្ឋករបានលើកឡើងពីគំនិតនេះតាំងពីឆ្នាំមុន ប៉ុន្តែរដ្ឋមន្ត្រីក្រសួងហិរញ្ញវត្ថុជំនាន់នោះ លោក Apisak Tantivorawong ប្រឆាំងនឹងគម្រោងនេះ ដោយបាននិយាយថា ពន្ធលើអាហារមានជាតិប្រៃនិងទាមទារឲ្យមានកិច្ចខិតខំប្រឹងប្រែងច្រើន និងរួមចំណែកក្នុងការរកប្រាក់ចំណូលតិចបំផុត៕
ផែនការនៃការដាក់ពន្ធនេះជាផ្នែកមួយនៃគម្រោងរបស់រដ្ឋាភិបាលក្នុងការកាត់បន្ថយការបរិភោគអំបិល ៣០ភាគរយក្នុងប្រទេសថៃទាំងមូល ក្នុងបំណងកាត់បន្ថយអាត្រាជំងឺលើសឈាមឲ្យបាន ២៥ភាគរយនៅឆ្នាំ២០២៥។
យោងតាមអង្គការសុខភាពពិភពលោក ការប្រើប្រាស់អំបិលហួសប្រមាណអាចសម្លាប់មនុស្ស ២.៥លាននាក់ជារៀងរាល់ឆ្នាំទូទាំងសលកលោក។ ជាដំបូន្មានល្អ គឺគួរតែប្រើប្រាស់អំបិលតិចជាង៥ក្រាមក្នុងមួយថ្ងៃ៕
© រក្សាសិទ្ធិដោយ thmeythmey.com