អន្តរជាតិ
ត្រាំ៖ ការវាយប្រហាររបស់តួកគីក្នុងទឹកដីស៊ីរី មិនមែនជាបញ្ហាអាមេរិកឡើយ ប្រធានាធិបតីអាមេរិក ដូណាល់ ត្រាំ (AFP)
× ប្រធានាធិបតីអាមេរិក ដូណាល់ ត្រាំ ប្រកាសក្តែងៗថា ការបើកប្រតិបត្តិការយោធាក្នុងទឹកដីស៊ីរីភាគខាងជើងពីសំណាក់តួកគី ពុំមែនជារឿងព្រំដែនរបស់អាមេរិកនោះឡើយ ។ ក្រៅពីមិនជួយហើយ មេដឹកនាំរូបនេះ ក៏បានហៅអតីតសម្ព័ន្ធមិត្តអាមេរិក សកម្មប្រយុទ្ធឃើដ «មិនមែនជាទេវតា» ទៀតផង។
ប្រាប់អ្នកសារព័ត៌មាននៅសេតវិមានអាមេរិក នៅថ្ងៃពុធ ១៦តុលា លោក ដូណាល់ ត្រាំ គូសបញ្ជាក់ថា សហរដ្ឋអាមេរិក ពុំមែនភ្នាក់ងារប៉ូលិសឡើយ ហើយវាដល់ពេលហើយសម្រាប់កងទ័ពអាមេរិកត្រឡប់មកផ្ទះវិញ។ លោក និយាយបែបនេះ៖«ពួកគេ មានបញ្ហានៅព្រំដែន។ វាមិនមែនជាព្រំដែនយើង។ យើងមិនគួរលះបង់ជីវិតដោយសាររឿងនេះនោះទេ»។
សម្រាប់លោក ត្រាំ លោក មើលឃើញស្ថានការណ៍ជុំវិញព្រំដែនស៊ីរី-តួកគីថាជា «យុទ្ធសាស្ត្រដ៏អស្ចារ្យ» សម្រាប់សហរដ្ឋអាមេរិក។ លោក និយាយថា កងទ័ពអាមេរិក បានចាកចេញពីទីនោះ ហើយពួកគេមានសុវត្ថិភាព។ ដោយអះអាងថា បញ្ហានេះអាចដោះស្រាយបានដោយមិនចាំបាច់មានការប្រយុទ្ធគ្នានោះ លោក ត្រាំ បញ្ជាក់បែបនេះ៖«យើងកំពុងតាមដាន, យើងកំពុងចរចា ហើយយើងកំពុងព្យាយាមប្រាប់ឲ្យតួកគីធ្វើរឿងត្រឹមត្រូវ ព្រោះតែយើងចង់បញ្ឈប់សង្គ្រាមដោយមិនខ្វល់ពីអ្វីទាំងអស់»។
លោកប្រធានាធិបតី ត្រាំ ក៏បានពន្លះពួកឃើដថា «មិនមែនជាទេវតា» ឡើយ។ លោក លើកឡើងថា សកម្មប្រយុទ្ធឃើដនិងអាមេរិក បានប្រកៀកស្មាប្រយុទ្ធជាមួយគ្នា ដោយអាមេរិកបានផ្តល់លុយយ៉ាងច្រើនសន្ធឹកសម្រាប់ពួកគេ។ ពួកគេ វាយប្រយុទ្ធបានល្អនៅពេលមានយើងនៅក្បែរ។ ក៏ប៉ុន្តែ នៅពេលគ្មានវត្តមានអាមេរិក ពួកគេចុះទន់ខ្សោយ។
តាមការចុះផ្សាយរបស់សារព័ត៌មាន BBC លោក ត្រាំ បញ្ជាក់ទៀតថា លោកមិនបានផ្តល់ភ្លើងបៃតងដល់លោកប្រធានាធិបតីតួកគី លោក រ៉េស៊ីប តៃយីប អ៊ែរដូហ្កាន់ (Recep Tayyip Erdogan) សម្រាប់ប្រតិបត្តិការយោធានៅភាគខាងជើងស៊ីរីឡើយ។ លោកអះអាងថា លោកបានសរសេរសំបុត្រមួយច្បាប់ទៅកាន់លោក អ៊ែរដូហ្កាន់ ក្រោយបញ្ចប់ការកិច្ចសន្ទនាតាមទូរសព្ទពីរឿងវាយប្រហារនេះ។
ក្នុងសំបុត្រមួយច្បាប់ដែលបានចុះថ្ងៃទី៩ តុលា ពោលគឺចំថ្ងៃដែលតួកគីបានបើកប្រតិបត្តិការយោធា ប៉ុន្តែទើបតែចុះផ្សាយនៅថ្ងៃពុធ ១៦ តុលា លោក ត្រាំ សរសេរទៅកាន់លោកប្រធានាធិបតី អ៊ែរដូហ្កាន ដោយប្រើពាក្យរិះគន់ខ្លាំងៗ។ លោក ត្រាំ បានប្រាប់ឲ្យមេដឹកនាំតួកគី៖«កុំធ្វើជាមនុស្សតឹងរ៉ឹងពេក ហើយកុំធ្វើជាមនុស្សភ្លីភ្លើឲ្យសោះ»។ លោក បន្ត៖«អ្នកមិនចង់ក្លាយជាអ្នកទទួលស្គាល់ខុសត្រូវចំពោះការកាប់សម្លាប់មនុស្សរាប់ពាន់នាក់ ហើយខ្ញុំក៏មិនចង់ក្លាយជាអ្នកទទួលខុសត្រូវចំពោះការបំផ្លាញសេដ្ឋកិច្ចប្រទេសតួកគីដែរ ហើយខ្ញុំនឹងធ្វើវា»។
សូមបញ្ជាក់ថា ក្រោយពីអាមេរិក កាលពីដើមសប្តាហ៍នេះ បានប្រកាសដាក់ទណ្ឌកម្មប្រឆាំងតួកគី អ្នកនាំពាក្យម្នាក់របស់ប្រធានាធិបតី អ៊ែរដូហ្កាន់ បាននិយាយថា ក្រសួងការបរទេសតួកគី កំពុងរៀបចំដាក់ទណ្ឌកម្មវាយបកប្រឆាំងសហរដ្ឋអាមេរិក។ ម្យ៉ាងទៀត ក្រុងអាង់ការ៉ា បានប្តេជ្ញាបន្តសកម្មភាពវាយប្រហារនៅព្រំដែនស៊ីរីភាគខាងជើងនេះ ហើយក៏បានទាត់ចោលការចរចាជាមួយសកម្មប្រយុទ្ធឃើដផងដែរ៕
Tag:
សហរដ្ឋអាមេរិក
តួកគី
ស៊ីរី
ឃើដ
ដូណាល់ត្រាំ
© រក្សាសិទ្ធិដោយ thmeythmey.com