អន្តរជាតិ
ក្រុមហ៊ុនចិន ជួលកោះនៅប្រជុំកោះសូលូម៉ុន ក្រោយការភ្ជាប់ចំណងការទូតបានមួយថ្ងៃ ប្រមុខការទូតចិន និងសមភាគីប្រទេសកោះសូលូម៉ុន។ រូបភាព AFP
×
ដោយ៖ ឈួន ឈីវអ៊ីង
ក្រុមហ៊ុនមួយរបស់ចិន បានចុះហត្ថលេខាលើកិច្ចព្រមព្រៀងមួយដើម្បីជួលដីកោះមួយរបស់ប្រជុំកោះសូលូម៉ុន ដែលជាសម្ព័ន្ធមិត្តថ្មីថ្មោង។ ការចុះហត្ថលេខានេះ កើតឡើងតែមួយថ្ងៃបន្ទាប់ចិន និងកោះសូលូម៉ុនភ្ជាប់ទំនាក់ទំនងការទូតជាមួយគ្នា។ នេះបើតាមរបាយការណ៍ដែលផ្សាយដោយទីភ្នាក់ងារព័ត៌មាន AFP នៅថ្ងៃទី១៧ តុលា។
បើតាមឯកសារ កោះសូលូម៉ុនបានធ្វើកិច្ចព្រមព្រៀងសហប្រតិបត្តិការយុទ្ធសាស្ត្រនៅលើកោះ Tulagi ជាកន្លែងមានកំពង់ផែទឹកជ្រៅដែលខាងយោធាចង់បាន ជាមួយក្រុមហ៊ុនរដ្ឋរបស់ China Sam Group កាលពីថ្ងៃទី២២ កញ្ញា។ ពោល គឺមួយថ្ងៃក្រោយចិន និងកោះសូលូម៉ុនប្រកាសបង្កើតទំនាក់ទំនងផ្លូវការនៅថ្ងៃទី២១ ខែកញ្ញា។
Tulagi គឺជាកូនកោះដែលមានផ្ទៃដីប្រហែល ២គីឡូម៉ែត្រការ៉េ ជាមួយចំនួនប្រជាជនមួយពាន់ពីររយនាក់។ ជាទីតាំងនៃអតីតមូលដ្ឋានកងទ័ពជើងទឹកជប៉ុន និងជាកន្លែងនៃការប្រយុទ្ធគ្នាយ៉ាងសាហាវក្នុងសង្គ្រាមលោកលើកទី ២ កោះមួយនេះ អាចអភិវឌ្ឍទៅជាទីតាំងយុទ្ធសាស្ត្រមួយល្អ ពិសេសវិស័យយោធាតែម្ដង។
យ៉ាងណាមិញ បើតាមកិច្ចព្រមព្រៀង គោលដៅនៃការជួលនេះ គឺសម្រាប់ការអភិវឌ្ឍតំបន់សេដ្ឋកិច្ចពិសេស។ កិច្ចព្រមព្រៀងនេះក៏បានរាប់បញ្ជូលអំពីការបង្កើតឧស្សាហកម្មផ្សេងទៀតដែលសមស្របនឹងការអភិវឌ្ឍ ដែលរួមទាំងការអភិវឌ្ឍឧស្សាហកម្មប្រេង និងឧស្ម័នផងដែរ។
ក្រុមហ៊ុន China Sam បានលើកឡើងក្នុងសេចក្តីថ្លែងការណ៍នៅថ្ងៃទី១៧ ខែតុលា ថា ខ្លួនប្តេជ្ញាសហការជាមួយកោះសូលូម៉ុនក្នុងវិស័យមួយចំនួនរួមមាន ពាណិជ្ជកម្ម ហេដ្ឋារចនាសម្ព័ន្ធ ជលផល និងទេសចរណ៍។
លោក Jonathan Pryke នាយកកម្មវិធីអ្នកវិភាគគោលនយោបាយការបរទេសដែលមានមូលដ្ឋាននៅទីក្រុងស៊ីដនី បាននិយាយថា វាមិនមែនជារឿងចម្លែកទេសម្រាប់ប្រទេសចិនក្នុងការសន្យាបង្កើតតំបន់សេដ្ឋកិច្ចពិសេសបែបនេះក្នុងប្រទេសកំពុងអភិវឌ្ឍដែលកំពុងចង់បានការវិនិយោគ។ សម្រាប់អ្នកជំនាញរូបនេះ ការភ័យខ្លាច គឺថាតំបន់ទាំងនេះអាចបង្កើតជាប្រតិបត្តិការព័ទ្ធជុំវិញរបស់ចិនដែលបន្ទាប់មកអាចរីកចម្រើនទៅជាប្រភេទនៃកន្លែងយុទ្ធសាស្ត្រអចិន្ត្រៃយ៍មួយ៕
© រក្សាសិទ្ធិដោយ thmeythmey.com