អន្តរជាតិ
លោក ត្រាំ រងការរិះគន់ចាស់ដៃ ក្រោយគ្រោងរៀបចំជំនួប G7 នៅទីលានវាយកូនហ្គោលរបស់ខ្លួន កន្លែងកម្សាន្តវាយកូនហ្គោល Trump National Doral របស់ប្រធានាធិបតី ដូណាល់ ត្រាំ នៅរដ្ឋ Florida, រូបភាព៖ Reuters
× ប្រធានាធិបតីអាមេរិក ដូណាល់ ត្រាំ គ្រោងនឹងទទួលក្រុមប្រទេសសេដ្ឋកិច្ចជឿនលឿនទាំង ៧ ឬG7 នៅកន្លែងកម្សាន្តវាយកូនហ្គោរបស់ខ្លួន នៅក្នុងរដ្ឋ Florida នាឆ្នាំក្រោយ។ ការបង្ហើបពីព័ត៌មាននេះ ត្រូវបានបក្សប្រជាធិបតេយ្យរិះគន់យ៉ាងចាស់ដៃថា ជាការបម្រើផលប្រយោជន៍ផ្ទាល់ខ្លួន។
តាមការរំពឹងទុក កន្លែងកម្សាន្តវាយកូនហ្គោ Trump National Doral របស់ប្រធានាធិបតី ដូណាល់ ត្រាំ នៅរដ្ឋ Florida នឹងបើកទ្វារចាំទទួលក្រុមប្រទេសជឿនឡើងទាំង ៧ ឬ G7 ចាប់ពីថ្ងៃទី១០ ដល់ថ្ងៃទី ១២ ខែមិថុនា ឆ្នាំ២០២០ខាងមុខ។ នេះបើតាមការអះអាងរបស់របស់ នាយកស្តីទីខុទ្ទកាល័យរបស់ប្រធានាធិបតីអាមេរិក លោក Mick Mulvaney។
មិនទាន់ចប់បញ្ហាមួយផង ឥឡូវចូលដល់បញ្ហាមួយទៀត។ ពិតណាស់ សំណុំរឿងលោកប្រធានាធិបតីអាមេរិក ដូណាល់ ត្រាំ ពាក់ព័ន្ធនឹងការស៊ើបអង្កេតលោកចូ បៃដិន មិនទាន់ចប់ផង ស្រាប់តែពេលនេះ វាចូលដល់រឿងលោក ត្រាំ ប្រើប្រាស់ទ្រព្យសម្បត្តិផ្ទាល់ខ្លួនទៀត។ គម្រោងយកទីលានវាយកូនហ្គោលដើម្បីរៀបចំជំនួប G7 ពិតជានាំឲ្យជម្លោះផលប្រយោជន៍មិនខាន។
រដ្ឋធម្មនុញ្ញអាមេរិកហាមឃាត់មន្ត្រីរដ្ឋាភិបាលទាំងឡាយណាពីការទទួលលុយពីរដ្ឋាភិបាលបរទេស ឬរដ្ឋាភិបាលក្នុងស្រុក ដោយគ្មានការយល់ព្រមពីសភា។ ដូចនេះទង្វើលោក ត្រាំ ពិតជារឿងមិនអាចទទួលបានឡើយ។ ពាក់ព័ន្ធទៅនឹងបញ្ហានេះ គណបក្សប្រជាធិបតេយ្យ អះអាងថា ខ្លួននឹងបើកការស៊ើបអង្កេតមួយ។ ប្រធានរដ្ឋសភាមកពីបក្សប្រជាធិបតេយ្យ លោកស្រី ណាន់ស៊ី ផេឡូស៊ី បានសរសេរនៅលើ Twitter ថា៖ «រដ្ឋធម្មនុញ្ញអាមេរិកចែងច្បាស់ណាស់ថា ប្រធានាធិបតីអាមេរិក មិនអាចទទួលអំណោយ ឬប្រាក់ពីរដ្ឋាភិបាលបរទេសណាទេ។ គ្មាននរណាម្នាក់នៅពីលើច្បាប់ឡើយ»។
តាមការចុះផ្សាយរបស់ទីភ្នាក់ងារព័ត៌មានReuters មិនត្រឹមតែប្រធានរដ្ឋសភាទេ ដែលមិនពេញចិត្តទៅនឹងការសម្រេចចិត្តរបស់លោក ត្រាំ ឡើយ សូម្បីតែសមាជិកគណបក្សសាធារណរដ្ឋ ក៏រិះគន់ប្រធានាធិបតីអាមេរិកវ័យ៧៣ឆ្នាំនេះដែរ។ សមាជិកព្រឹទ្ធសភា និងជាអតីតបេក្ខជនប្រធានាធិបតីលោក Mitt Romney លើកឡោះងថា ការជ្រើសរើសទីតាំងខុសប្រក្រតីខ្លាំងណាស់។
អស់ពីសមាជិកបក្សសាធារណរដ្ឋ ដល់វេនរដ្ឋមន្ត្រីហិរញ្ញវត្ថុរបស់ប្រទេសហ្គាណាវិញ។ នាកិច្ចប្រជុំក្រៅផ្លូវការនៅមូលនិធិហិរញ្ញវត្ថុអន្តរជាតិ (IMF) និងធនាគាពិភពលោក (WB) លោក Kenneth Ofori-Atta បាននិយាយថា៖ «ប្រសិនបើប្រធានាធិបតីហ្គាណាធ្វើរឿងទាំងនេះ តើវានឹងមានអ្វីកើតឡើង? យ៉ាងណាក៏ដោយ ហ្គាណា មិនមានប្រធានាធិបតីជាអ្នកមានឡើយ។»
បន្ទាប់ពីមានការរិះគន់ផ្ទួនៗគ្នាទៅលើសេចក្តីសម្រេចរបស់ប្រធានាធិបតី នាយខុទ្ទកាល័យស្តីទីរបស់ប្រធានាធិបតីអាមេរិក បានចេញមុខការពារអ្វីដែលជាការសម្រេចចិត្តរបស់លោកត្រាំ។ ទាក់ទិននឹងបញ្ហានេះ លោក Mulvaney និយាយថា ការប្រើប្រាស់ Trump National Doral ទុកសម្រាប់ទទួលប្រមុខរដ្ឋាភិបាល និងប្រមុខរដ្ឋរបស់ប្រទេសសេដ្ឋកិច្ចជឿនលឿនទាំង៧ គឺលោក ត្រាំ មិនទទួលបានប្រាក់ចំណេញឡើយ។ ម្យ៉ាងទៀត ប្រសិនបើអាមេរិកជ្រើស Trump National Doral គឹអាចសន្សំលុយ បានរាប់លានដុល្លារ ឬអាចនិយាយបានថា អាចសន្សំបានប្រមាណជា ៥០ភាគរយ បើធៀបជាមួយនឹងមជ្ឈមណ្ឌលផ្សេងទៀត៕
Tag:
អាមេរិក
G7
ដូណាល់ ត្រាំ
© រក្សាសិទ្ធិដោយ thmeythmey.com