អត្ថបទពាណិជ្ជកម្ម
រាត្រីជួបជុំអ្នកសរសេរកូដកម្ពុជាឆ្នាំ២០១៩
× នៅក្នុងរយៈពេលតែ១សប្ដាហ៍ទៀតប៉ុណ្ណោះ កម្ពុជានឹងមានកម្មវិធី ជួបជុំអ្នកសរសេរកូដកម្ពុជាឆ្នាំ២០១៩ ក្រោមប្រធានបទ «យុវជននាយុគសម័យបដិវត្តន៍ឧស្សាហកម្ម ៤.០ ដែលជាកម្មវិធីដ៏ធំមួយ និងពុំធ្លាប់មានពីមុនមក។ នេះជាវេទិកាប្រមូលផ្ដុំអ្នកសរសេរកូដជាង៨០០នាក់ ដែលសុទ្ធសឹងជាយុវជន ជាមួយនឹងបណ្ដាក្រុមហ៊ុនជាតិ និងអន្តរជាតិនានា ដើម្បីជួបពិភាក្សា ចែករំលែកចំណេះដឹង បទពិសោធន៍ និងការផ្ដល់នូវ ឱកាសសិក្សានៅបរទេស ក៏ដូចជាឱកាសការងារជាច្រើន។
កម្មវិធីជួបជុំអ្នកសរសេរកូដកម្ពុជាឆ្នាំ២០១៩ ក្រោមប្រធានបទ «យុវជននាយុគសម័យបដិវត្តន៍ ឧស្សាហកម្ម ៤.០ » ដែលរៀបចំដោយសហភាពសហព័ន្ធយុវជនកម្ពុជារាជធានីភ្នំពេញ សហការជាមួយគេហទំព័របង្រៀនតាមអនឡាញ E-School Cambodia និងក្រុមហ៊ុន True Money នឹងប្រារព្ធធ្វើឡើងនាថ្ងៃសៅរ៍ ទី២៦ ខែតុលា ឆ្នាំ២០១៩ វេលាម៉ោង៥ល្ងាច នៅសណ្ឋាគាណាហ្គាវើល៍។
លោក ឈន ឈុនឡេង ប្រធានគណៈកម្មការរៀបចំកម្មវិធី បានពន្យល់ថា រាជរដ្ឋាភិបាលកម្ពុជា បាន និងកំពុងសិក្សាសម្រេចទទួលយក បដិវត្តន៍ឧស្សាហកម្មទី៤ ក្នុងការអភិវឌ្ឍសេដ្ឋកិច្ចបច្ចេកវិទ្យាឌីជីថល និងការរៀបចំឯកសារសម្រាប់រដ្ឋាភិបាលឌីជីថល កិច្ចការទាំងនេះចាំបាច់ត្រូវមានការចូលរួមពីសំណាក់វិស័យឯកជន ជាពិសេស គឺយុវជនកម្ពុជា ដែលទាមទារឲ្យមានការត្រៀមខ្លួនតាមដំណាក់កាល ការរៀបចំយុទ្ធសាស្ត្រ ដែលឆ្លើយតបលើបម្រែបម្រួលបច្ច័យនៃបដិវត្តន៍ឧស្សាហកម្មដំណាក់កាលទី៤ លើសេដ្ឋកិច្ច និងសង្គម។ លោកបន្តថា ៖«យុវជនកម្ពុជាបច្ចុប្បន្ន ពុំទាន់បានស្វែងយល់ ឬត្រៀមខ្លួនរួចរាល់ ដើម្បីសម្របខ្លួនជាមួយបដិវត្តន៍៤.០ នេះនៅឡើយ ដោយសារតែកង្វះប្រភពឯកសារ ការស្រាវជ្រាវ ការអនុវត្តសាកល្បងជាក់ស្ដែង និងអ្នកជំនាញ។ ដូច្នេះ កម្មវិធីជួបជុំអ្នកសរសេរកូដកម្ពុជាឆ្នាំ២០១៩ ក្រោមប្រធាន «យុវជននាយុគសម័យបដិវត្តន៍ ឧស្សាហកម្ម ៤.០» នឹងផ្ដល់នូវចម្លើយជាច្រើនដើម្បីឆ្លើយតប និងដោះស្រាយនូវរាល់បញ្ហាប្រឈម របស់យុវជន និងអ្នកចូលរួម»។
លោកបន្ថែម «គណៈកម្មការរៀបចំកម្មវិធី មានសង្ឃឹមយ៉ាងមុតមាំថា តាមរយៈកិច្ចសហប្រតិបត្តិការបែបនេះ យើងអាចបង្កើតនូវ លក្ខខណ្ឌចាំបាច់ធ្វើឲ្យមានការផ្លាស់ប្តូរជាវិជ្ជមាន និងផ្ដល់លទ្ធភាពឲ្យមានការសម្របខ្លួន ដើម្បីឈានទៅសម្រេច លទ្ធផលជាវិជ្ជមានសម្រាប់សេដ្ឋកិច្ច និងសង្គមជាតិកម្ពុជារបស់យើង ដើម្បីបន្តអនុវត្តន៍លើសមិទ្ធិផលរបស់ រាជរដ្ឋាភិបាលដែលសម្រេចបានកន្លងមក និងជំរុញការអនុវត្តយុទ្ធសាស្ត្រចតុកោណដំណាក់កាលទី៤ ព្រមទាំង បណ្តុះវប្បធម៌ដឹកនាំផ្នែកលើ Transformative Leadership ដើម្បីអភិវឌ្ឍមូលធនមនុស្ស គុណភាព ប្រសិទ្ធភាព និងប្រសិទ្ធផលខ្ពស់ ប្រកបដោយឧត្តមភាពប្រកួតប្រជែងផងដែរ។»
ចុចតំណរភ្ចាប់ដើម្បីចុះឈ្មោះ http://bit.ly/CSAP_PreReg
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com