អន្តរជាតិ
កន្ទុយបារីក៏ជាអ្នកបំពុលបរិស្ថានមួយខ្លាំងដែរ តែមនុស្សភាគច្រើនមិនចាប់អារម្មណ៍
× ទោះបីជាពួកវាមានទំហំតូច និងមើលទៅហាក់បីដូចជាមិនអាចបង្កផលប៉ះពាល់ធំធេងមែនក្តី តែកន្ទុយបារីដែលសល់ពីអ្នកពិសាបារីទាំងនោះ មានសមត្ថភាពក្នុងការបំផ្លាញបរិស្ថានដែលសត្វនានា និងមនុស្សកំពុងរស់នៅ។ អង្គការក្រៅរដ្ឋាភិបាលមួយរបស់សហរដ្ឋអាមេរិកក្រោមឈ្មោះថា Keep America Clean ឬ KAB បានបង្ហាញពីបញ្ហាចំនួនពីរដែលបានកើតឡើង។ ទីមួយ គឺការមិនយកចិត្តទុកដាក់ពីអ្នកពិសាបារី ក្នុងការចោលកន្ទុយបារីឲ្យបានល្អ និងទីពីរ គឺការមិនផ្តល់កន្លែងចោលបារីត្រឹមត្រូវនៅតាមទីសាធារណៈនានា។ នេះជាការចុះផ្សាយដោយគេហទំព័រ Very Well Mind ។ ទិន្នន័យនៃការស្ទង់មតិរបស់ KAB បានបង្ហាញថា ប្រជាជនជាង៧៧ភាគរយ មិនបានដឹងថាកន្ទុយបារីអាចមានសមត្ថភាពក្នុងការបំផ្លាញបរិស្ថាននោះទេ។
កន្ទុយបារីដែលអ្នកមើលទៅហាក់បីដូចជាកំណាត់កប្បាស គឺជាបណ្តុំនៃប្លាស្ទិចទៅវិញទេ។ គេហៅប្រភេទនៃប្លាស្ទិចនេះថា Cellulose Acetate ។ ដោយអាស្រ័យទៅលើតំបន់នីមួយៗ កន្ទុយបារីត្រូវការពេលប្រមាណពី១៨ខែ ទៅ១០ឆ្នាំក្នុងការរំលាយទៅក្នុងធម្មជាតិវិញ។ ក្រៅពីនេះ កន្ទុយបារីក៏សម្បូរទៅដោយសារធាតុពុលនានាផងដែរ ដែលចេញពីផ្សែងបារីទាំងនោះ ដូចជា នីកូទីន។ វាមានជ្រាបចូលទៅក្នុងប្រភពទឹកលើដី និងក្រោមដី នៅពេលដែលវាមិនបានបោះចោលដោយត្រឹមត្រូវ។ នេះគឺដោយសារតែកន្ទុយបារីមាននាទីក្នុងការស្រង់យកសារធាតុមិនល្អពីផ្សែងបារី នៅពេលដែលមនុស្សពិសា។ កន្ទុយបារីមួយអាចមានកម្ទេចនៃខ្សែប្លាស្ទិចទាំងនេះរហូតទៅដល់ជាង១២ពាន់ខ្សែ តូចជាងសរសៃអំបោះទៅទៀត។ កន្ទុយបារីអាចទៅបំពុលសត្វល្អិតមានប្រយោជន៍តូចៗនៅក្នុងទឹក ឬអាចចូលទៅក្នុងប្រព័ន្ធរំលាយអាហាររបស់សត្វធំៗមួយចំនួនទៀត។
កន្ទុយបារីក៏ជាហេតុផលចម្បងមួយនៅក្នុងការបង្កឲ្យមានភ្លើងឆេះព្រៃផងដែរ។ នៅក្នុងសហរដ្ឋអាមេរិក តាមការបកស្រាយដោយ ភ្នាក់ងារជាតិការពារភ្លើងឆេះ (National Fire Protection Agency) ភ្លើងឆេះប្រមាណជា៩ម៉ឺនករណីក្នុងមួយឆ្នាំៗនៅក្នុងសហរដ្ឋអាមេរិក កើតឡើងដោយសារកន្ទុយបារីនានាដែលត្រូវបានចោលដោយគ្មានសណ្តាប់ធ្នាប់។
នៅក្នុងពិភពលោក មនុស្សជាង១ពាន់លាននាក់ពិសាបារីជារៀងរាល់ថ្ងៃ។ ប្រទេសចិន មានអ្នកពិសារបារីប្រមាណជា៣០០លាននាក់ មួយភាគបីនៃអ្នកពិសាបារីសរុប ដោយក្នុងមួយឆ្នាំៗពួកគេពិសាបារីប្រមាណ ២៣០០ពាន់លានដើម (2.3 trillion) ។ ក្នុងមួយនាទី បារីចំនួន១០លានដើមត្រូវបានគេទិញមកប្រើប្រាស់។ បារី៥០០០ពាន់លានដើម មានទម្ងន់ប្រមាណជាង៩០០០លានគីឡូក្រាម៕
© រក្សាសិទ្ធិដោយ thmeythmey.com