កីឡាករមិនតិចជាង៨ប្រទេស នឹងចូលរួមប្រកួតប្រណាំងម៉ូតូអន្តរជាតិនៅកម្ពុជា

កីឡាជាតិ

កីឡាករមិនតិចជាង៨ប្រទេស នឹងចូលរួមប្រកួតប្រណាំងម៉ូតូអន្តរជាតិនៅកម្ពុជា

20, Oct 2019 , 10:59 am

រូបភាព

ដោយ:

កម្ពុជានឹងរៀបចំការប្រកួតប្រណាំងម៉ូតូអន្តរជាតិ Motorrad Angkor Festival លើកដំបូងនៅខេត្តសៀមរាបចាប់ពីថ្ងៃទី៦-៨ ខែធ្នូ ឆ្នាំ២០១៩។ អ្នកជំនាញជិះម៉ូតូមិនតិចជាង៨ប្រទេស នឹងចូលរួមប្រកួតប្រជែងក្នុងព្រឹត្តិការណ៍ ដែលធ្វើឡើងដើម្បីទាក់ទាញភ្ញៀវទេសចរ និងប្រមូលមូលនិធិសប្បុរសធម៌មួយនេះ។ វា ក៏ជាឱកាស ដើម្បីរឹតចំណងសាមគ្គីភាពរវាងកីឡាករកម្ពុជា ជាមួយបណ្តាប្រទេសដទៃ ឲ្យកាន់តែជិតស្និទ្ធផងដែរ។ ថ្នាក់ដឹកនាំសហព័ន្ធកីឡាយានយន្តកម្ពុជាជឿជាក់ថា ព្រឹត្តិការណ៍នេះនឹងជួយចូលរួមចំណែកអភិវឌ្ឍន៍វិស័យកីឡាយានយន្ត ឲ្យកាន់តែរីកចម្រើនថែមទៀត។

កីឡាករជាតិ និងអន្តរជាតិក្នុងតំបន់អាស៊ាននិងអាស៊ីមិនតិចជាង៨ប្រទេស នឹងមកជួបគ្នានៅខេត្តសៀមរាប ដើម្បីចូលរួមប្រកួតប្រជែងក្នុងព្រឹត្តិការណ៍ប្រណាំងអន្តរជាតិ Motorrad Angkor Festival 2019 ជាលើកដំបូង។ នេះបើយោងតាមការបញ្ជាក់របស់លោក អ៊ុំ ប៊ុនរ៉េត ប្រធានក្លិប BMW Motorcycle និងជាអ្នកផ្តួចផ្តើមបង្កើតឲ្យមានព្រឹត្តិការណ៍នេះ។ លោកបានបន្ថែមថា កីឡាករជាង១ពាន់នាក់មកពីកម្ពុជា វៀតណាម ឡាវ ថៃ សិង្ហបុរី ម៉ាឡេស៊ី ចិន និងប្រទេសដទៃបានចុះឈ្មោចូលរួមរួចហើយ។

ព្រឹត្តិការណ៍ដែលគ្រោងធ្វើឡើងលើផ្ទៃដី៨ហិកតាមួយនេះ រៀបចំឡើងក្នុងគោលបំណងជួយចូលរួមចំណែកអភិវឌ្ឍន៍វិស័យកីឡាយានយន្តនៅកម្ពុជា ក៏ដូចជាផ្សព្វផ្សាយ និងទាក់ទាញភ្ញៀវទេសចរឲ្យមកកម្សាន្តនៅខេត្តសៀមរាប។ ជាពិសេស ដើម្បីរៃអង្គាសថវិកាសម្រាប់ការងារមនុស្សធម៌ ហើយវាក៏ជាឱកាសរឹតចំណងសាមគ្គីភាពក្នុងរង្វង់គ្រួសារកីឡាយានយន្ត និងបណ្តាប្រទេសជិតខាងផងដែរ។

«គោលដៅនៃព្រឹត្តិការណ៍នេះ គឺដើម្បីលើកកម្ពស់វិស័យកីឡាយានយន្ត ជាពិសេសម៉ូតូគ្រប់ប្រភេទ ដែលបានបង្កើតជាក្រុម ទាំងបានចុះបញ្ជីនិងមិនបានចុះបញ្ជីជាមួយសហព័ន្ធ ដើម្បីផ្សព្វផ្សាយពីសុវត្ថិចរាចរណ៍ សីលធម៌ប្រើប្រាស់ផ្លូវថ្នល់ និងចែករំលែកបទពិសោធន៍បច្ចេកទេសរវាងអ្នកចូលចិត្តម៉ូតូធំជាដើម។ ខ្ញុំរំពឹងថា ព្រឹត្តិការណ៍នេះនឹងដើរតួនាទីយ៉ាងសំខាន់ក្នុងការលើកស្ទួយវិស័យទេសចរណ៍នៅកម្ពុជា ទៅកាន់ប្រទេសនានាក្នុងតំបន់ និងសកលលោក»។ លោក អ៊ុំ ប៊ុនរ៉េត លើកឡើងបែបនេះ ក្នុងសន្និសីទសារព័ត៌មាននៅថ្ងៃទី១៩ តុលា ឆ្នាំ២០១៩ នៅទីស្នាក់ការនៃគណៈកម្មាធិការជាតិអូឡាំពិកកម្ពុជា។

លោក សូឃុន វីរក្ស អនុប្រធានសហព័ន្ធកីឡាយានយន្តកម្ពុជា

អនុប្រធានសហព័ន្ធកីឡាយានយន្តកម្ពុជាលោក សូឃុន វីរក្ស គាំទ្រយ៉ាងពេញទំហឹង និងវាយតម្លៃខ្ពស់ចំពោះព្រឹត្តិការណ៍នេះក្នុងរួមចំណែកលើកកម្ពស់វិស័យយានយន្តនៅកម្ពុជា។ លោកសង្ឃឹមថា តាមរយៈព្រឹត្តិការណ៍នេះ នឹងជួយអភិវឌ្ឍន៍កីឡាយានយន្តឲ្យកាន់តែរីកចម្រើនថែមទៀត ជាពិសេសជួយទាក់ទាញយុវជន យុវនារី ឲ្យចូលរួមលេងកីឡានេះកាន់តែច្រើន។

ជាមួយគ្នានេះ លោក អ៊ុំ ប៊ុនរ៉េត ក៏រំពឹងកីឡាករកម្ពុជាទទួលបានបទពិសោធល្អៗពីកីឡាករអន្តរជាតិ ដើម្បីអភិវឌ្ឍន៍សមត្ថភាពឲ្យកាន់តែប្រសើរ ជាពិសេសជួយទាក់ទាញភ្ញៀវទេសចរអន្តរជាតិឲ្យមកកម្សាន្តកាន់តែច្រើន។ ប្រធានក្លិប BMW Motorcycle រូបនេះអះអាងថា កម្ពុជានឹងបន្តរៀបចំព្រឹត្តិការណ៍នេះឲ្យមានជារៀងរាល់ឆ្នាំ នៅតាមបណ្តាខេត្តផ្សេងៗទៀត។ ក្រៅពីការប្រកួត ក៏មានការតាំងពិព័រណ៍ម៉ូតូ និងផលិតផលផ្សេងៗពាក់ព័ន្ធនឹងយានយន្តជាង៣៥០ស្តង់ទៀតផង៕