អ្នកនាំពាក្យ៖ សមត្ថកិច្ចគ្រប់ថ្នាក់ កំពុងអនុវត្តច្បាប់យ៉ាងតឹងរ៉ឹងចំពោះអ្នកចូលរួមធ្វើរដ្ឋប្រហារ

ជាតិ

នយោបាយជាតិ

អ្នកនាំពាក្យ៖ សមត្ថកិច្ចគ្រប់ថ្នាក់ កំពុងអនុវត្តច្បាប់យ៉ាងតឹងរ៉ឹងចំពោះអ្នកចូលរួមធ្វើរដ្ឋប្រហារ

20, Oct 2019 , 5:59 pm

រូបភាព

លោក គឹម សន្តិភាព អ្នកនាំពាក្យក្រសួងយុត្តិធម៌

ដោយ: ថ្មីៗ

លោក គឹម សន្តិភាព អ្នកនាំពាក្យក្រសួងយុត្តិធម៌ បានយកវីដេអូឃ្លីបរបស់លោក សម រង្ស៊ី ដែលនិយាយក្នុងវិទ្យុអាស៊ីសេរីនាពេលថ្មីៗនេះ មកបង្ហោះលើទំព័រហ្វេសប៊ុករបស់លោក ដោយលោក ចាត់ទុកសម្តីរបស់លោក សម រង្ស៊ី ក្នុងវីដេអូឃ្លីបនោះ ថាជាផែនការមួយក្នុងចំណោមផែនការផ្សេងទៀត ដែលលោក សម រង្ស៊ី និង បក្សពួក ប៉ងធ្វើរដ្ឋប្រហារផ្តួលរំលំរដ្ឋាភិបាលកម្ពុជា។

តាមរយៈកិច្ចសម្ភាសជាមួយវិទ្យុអាស៊ីសេរី លោក សម រង្ស៊ី ព្យាយាមបំផុសឲ្យប្រជាពលរដ្ឋងើបឡើងជាមួយលោក ពេលលោក មកដល់កម្ពុជា នោថ្ងៃទី៩ ខែវិច្ឆិកា ឆ្នាំ២០១៩។ លោក ថ្លែងដូច្នេះថា៖«តាមភូមិនីមួយៗ ប្រជារាស្ត្រត្រូវតែងើបឈរ។ យើង ទៅព័ទ្ធផ្ទះមេភូមិ។ យើងទៅព័ទ្ធស្នងការប៉ូលិស កន្លែងប៉ូលិសប្រមូលផ្តុំ។ ខ្ញុំ ជឿថា អ្នកដែលនៅស្មោះត្រង់ជាមួយ ហ៊ុន សែន គឺពេលហ្នឹង រត់ចោលជួរ ឬមួយ ពួកគាត់ មករួមកម្លាំងជាមួយប្រជារាស្ត្រ...»។

លោក គឹម សន្តិភាព សរសេរលើទំព័រហ្វេសប៊ុក នៅថ្ងៃទី២០ ខែតុលា ឆ្នាំ២០១៩ តបនឹងការសម្តីរបស់លោក សម រង្ស៊ី ក្នុងន័យព្រមានបែបនេះថា៖«សមត្ថកិច្ចគ្រប់លំដាក់ថ្នាក់ គ្រប់ផ្នែកពាក់ព័ន្ធទាំងអស់ កំពុងអនុវត្តវិធានការច្បាប់យ៉ាងតឹងរ៉ឹង ចំពោះក្រុមឧក្រិដ្ឋជនទាំងនេះជាបន្តបន្ទាប់ ដើម្បីបង្ការ ទប់ស្កាត់ និង បំផ្លាញចោលរាល់សកម្មភាពទាំងនេះ»។ លោក ដាស់តឿនជាថ្មីថា៖«ការសារភាព មិនចូលរួមនឹងសកម្មភាពទាំងនេះ ជាជម្រើសតែមួយគត់ ដើម្បីការពារអ្នកឲ្យរួចផុតពីទោសទណ្ឌ»។

លោក សម រង្ស៊ី និង មនុស្ស៨នាក់សំខាន់២ទៀតរបស់លោក ត្រូវបានតុលាការចោទប្រកាន់ពីបទឧបឃាត ដែលសំដៅលើការរៀបចំគម្រោងធ្វើរដ្ឋប្រហារ។ ចំណែក អ្នកគាំទ្រមួយចំនួនរបស់លោក នៅក្នុងស្រុក រងការចោទពីបទរួមគំនិតក្បត់ជាតិ ដែលសំដៅលើការចូលរួមក្នុងគម្រោងធ្វើរដ្ឋប្រហាររបស់លោក សម រង្ស៊ី៕