ជាតិ
ព្រះមហាក្សត្រ
ព្រះមហាក្សត្រយាងទៅចូលរួមពិធីរាជាភិសេកព្រះចៅអធិរាជជប៉ុន Naruhiro
× ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី នាព្រឹកថ្ងៃចន្ទ ទី២១ ខែតុលា នេះ ស្តេចយាងទៅកាន់ប្រទេសជប៉ុន ដើម្បីចូលរួមពិធីរាជាភិសេក ព្រោះចៅអធិរាជថ្មីរបស់ជប៉ុន គឺព្រះចៅណារ៉ូហ៊ីតុ (Naruhito)។ ព្រះរាជពិធី នឹងប្រព្រឹត្តទៅនៅថ្ងៃទី២២ ខែតុលា។
កាលពីថ្ងៃទី៣០ ខែមេសា អធិរាជជប៉ុន អាគីហ៊ីតុ បានដាក់រាជ្យជាផ្លូវការហើយ។ ព្រះអង្គក្លាយជាអធិរាជជប៉ុនទីមួយក្នុងរយៈពេលជាងពីររយឆ្នាំដែលដាក់រាជ្យបែបនេះ ខណៈច្បាប់ជប៉ុនចែងថា អធិរាជត្រូវសោយរាជ្យអស់មួយព្រះជន្ម។ ណារ៉ូហ៊ីតុ ឡើងគ្រងរាជ្យបន្តពីបិតាក្នុងពិធីដែលធ្វើនៅថ្ងៃទី១ ខែឧសភា មុនឈានរាជាភិសេកផ្លូវការនាថ្ងៃទី២២ ខែតុលា។
អធិរាជ អាគីហ៊ីតុ ដែលជាអធិរាជជំនាន់ទី១២៥ របស់ជប៉ុន ឡើងគ្រងរាជ្យផ្លូវការកាលពីថ្ងៃទី១ ខែមករា ឆ្នាំ១៩៨៩ បន្តពីបិតាអធិរាជ ហ៊ីរ៉ូហ៊ីតុ ដែលដឹកនាំជប៉ុនប្រយុទ្ធក្នុងសម័យសង្គ្រាមលោក។ រជ្ជកាល Heisei ដែលមានរយៈពេល៣០ឆ្នាំ ៤ខែ របស់អធិរាជ អាគីហ៊ីតុ ក៏ត្រូវបានបញ្ចប់ផងដែរកាលពីថ្ងៃទី៣០ ខែមេសា។
នេះជាលើកដំបូងក្នុងរយៈពេលជាងពីររយឆ្នាំដែលអធិរាជជប៉ុនដាក់រាជ្យ នៅពេលដែលច្បាប់ប្រទេសមួយនេះកំណត់ឲ្យអធិរាជប្រថាប់លើបល្ល័ង្ក Chrysanthemum មួយព្រះជន្ម។ ព័ត៌មាននៃការដាក់រាជ្យ ត្រូវបានបញ្ចេញដោយអធិរាជ អាគីហ៊ីតុ ផ្ទាល់ក្នុងឆ្នាំ២០១៦ ដោយទ្រង់បានលើកហេតុផលនៃការចុះខ្សោយព្រះសុខភាព។ មានព្រះជន្ម៨៥វស្សា ប្រមុខរដ្ឋជប៉ុនអង្គនេះ ធ្លាប់ទទួលបានការព្យាបាលមហារីកក្រពេញប្រូស្តាត និងឆ្លងការវះកាត់ជំងឺបេះដូងផង។
រាជបុត្ររបស់ទ្រង់ គឺរជ្ជទាយាទ ណារ៉ូហ៊ីតុ ដែលមានព្រះជន្ម៥៩វស្សា បានឡើងគ្រងបន្តជាអធិរាជទី១២៦ របស់ជប៉ុនក្នុងកម្មវិធីតាមប្រពៃណីមួយក្នុងទីក្រុងតូក្យូនៅថ្ងៃទី១ ខែឧសភា។ រជ្ជកាលថ្មី មានឈ្មោះថា Reiwa ដែលមានន័យថា សុខដុម។
កម្មវិធីគ្រងរាជ្យផ្លូវការដែលចូលរួមភ្ញៀវអន្តរជាតិធំៗដែលក្នុងនោះមានព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនីផងដែរនោះ ធ្វើឡើងនៅថ្ងៃទី២២ ខែតុលា៕
Tag:
អធិរាជជប៉ុន
Naruhito
© រក្សាសិទ្ធិដោយ thmeythmey.com