ចិន ប្រកាសបន្តគាំទ្រការកសាងកងទ័ពកម្ពុជា

ជាតិ

នយោបាយជាតិ

ចិន ប្រកាសបន្តគាំទ្រការកសាងកងទ័ពកម្ពុជា

21, Oct 2019 , 3:51 pm

រូបភាព

រដ្ឋមន្រ្តីការពារជាតិកម្ពុជា និង រដ្ឋមន្រ្តីការពារជាតិចិន នាពិធីចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការ រវាងកងទ័ពប្រទេសទាំងពីរ នៅថ្ងៃទី២0 ខែតុលា ឆ្នាំ២០១៩ ក្នុងទីក្រុងប៉េកាំង (រូបពីក្រសួងការពារជាតិកម្ពុជា)

ដោយ: ថ្មីៗ

ក្រសួងការពារជាតិកម្ពុជា ចុះផ្សាយថា ចិន នៅតែបន្តផ្តល់ជំនួយនិងគាំទ្រ ដល់ការកសាងកងទ័ពនិងការអភិវឌ្ឍវិស័យការពារជាតិកម្ពុជា។ នាយឧត្តមសេនីយ៍ វ៉េ ហ្វ៊ុងហឺ រដ្ឋមន្ត្រីការពារជាតិចិន អះអាងដូច្នេះ ក្នុងជំនួបជាមួយសម្តេច ទៀ បាញ់ រដ្ឋមន្ត្រីការពារជាតិកម្ពុជា កាលពីថ្ងៃទី២០ ខែតុលា ឆ្នាំ២០១៩ នៅទីក្រុងប៉េកាំង។

ក្នុងជំនួបនោះ ភាគីកម្ពុជា-ចិន បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការ រវាងកងទ័ពនៃប្រទេសទាំងពីរ។ ក្រសួងការពារជាតិកម្ពុជា បានសរសេរពីសម្តីរបស់លោក វ៉េ ហ្វ៊ុងហឺ យ៉ាងដូច្នេះថា៖«កិច្ចសហប្រតិបត្តិការរវាងកងទ័ពនៃប្រទេសទាំងពីរ ជិតស្និទ្ធ និងទទួលបានសមិទ្ធផលធំធេងជាច្រើន ហើយកិច្ចសហប្រតិបត្តិការរវាងកងទ័ពនៃប្រទេសទាំងពីរ បានក្លាយទៅជាយន្តការមួយ ដែលបានជួយជំរុញដល់ការអភិវឌ្ឍទំនាក់ទំនងរវាងកម្ពុជា-ចិន»។

សម្តេច ទៀ បាញ់ ដែលកំពុងដឹកនាំគណៈប្រតិភូកម្ពុជា បំពេញទស្សនកិច្ចនៅប្រទេសចិន បានឆ្លើយតបថា មិត្តភាពរវាងប្រជាជននិងកងទ័ពនៃប្រទេសទាំងពីរ ត្រូវបានពង្រឹងថែមទៀត ក្រោមការដឹកនាំរបស់សម្តេចនាយករដ្ឋមន្ត្រី ហ៊ុន សែន។ សម្តេចរដ្ឋមន្ត្រី អរគុណចិន ដែលបានជួយជ្រោមជ្រែងនិងជួយឧបត្ថម្ភក្នុងការអនុវត្តកិច្ចសហប្រតិបត្តិការទ្វេភាគីរវាងកងទ័ពកម្ពុជា-ចិន និងការបង្កើនកម្រិតនៃការហ្វឹកហ្វឺន ការបណ្តុះបណ្តាលធនធានមនុស្ស រួមទាំងកិច្ចសហប្រតិបត្តិការកម្រិតតំបន់ និងអន្តរជាតិផងដែរ ដែលបានធ្វើឲ្យទំនាក់ទំនងកងទ័ពទាំងពីរកាន់តែរឹងមាំ៕