អន្តរជាតិ
លោក មហាធៀ៖ ប្រទេសមានអំណាចកាប់ឈើអស់ រួចហាមប្រទេសតូចៗកាប់ឈើដើម្បីរស់ទៅវិញ
×
ដោយ៖ ងួន សុភាវត្តី
នាយករដ្ឋមន្ត្រីម៉ាឡេស៊ីលោក មហាធៀ មហាម៉ាត់ នៅថ្ងៃទី២១ ខែតុលា បានលើកឡើងពីការមិនពេញចិត្តចំពោះយុទ្ធនាការប្រឆាំងនឹងការដាំដូងប្រេងរបស់ម៉ាឡេស៊ីពីសំណាក់សហភាពអឺរ៉ុប។ នាយករដ្ឋមន្ត្រីរូបនេះបានមើលឃើញថា សកម្មភាពបែបនេះនេះជាការគាបសង្កត់ដោយប្រទេសដែលទទួលបានប្រយោជន៍ពីសក្តានុពលរបស់ម៉ាឡេស៊ី។
ទំនាស់លើបញ្ហាដូងប្រេងរវាងម៉ាឡេស៊ី និងសហភាពអឺរ៉ុបកើតឡើង បន្ទាប់ពីសហភាពអឺរ៉ុបបាននិយាយថា ម៉ាឡេស៊ីបានកាប់ព្រៃឈើដើម្បីយកដីសំរាប់ដាំដើមដូងយកប្រេង ដែលសកម្មភាពនេះ ជាការបំផ្លាញបរិស្ថាន។ អឺរ៉ុប ក៏មានគម្រោងកាត់បន្ថយការនាំចូលដូងប្រេងពីម៉ាឡេស៊ីក្នុងយុទ្ធនាការការពារបរិស្ថានរបស់ខ្លួន។
នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ចាត់ទុកទង្វើរបស់អឺរ៉ុបជាការមើ់លងាយពីសំណាក់ប្រទេសមានអំណាច។ ក្នុងសន្និសីទនៅទីក្រុងគួឡាឡាំពួ លោក មហាធៀ និយាយថា៖ « ពួកគេបានកាប់ព្រៃឈើស្ទើរទាំងអស់ និងបានបដិសេធការកាត់បន្ថយការបញ្ចេញជាតិពុលដែលប៉ះពាល់បរិស្ថាន ឥឡូវពួកគេបែរជាមកគាបសង្កត់ប្រទេសក្រីក្រដែលកាប់ព្រៃដើម្បីយកដីសំរាប់រស់នៅនិងប្រកបរបបសំរាប់ចិញ្ចឹមជីវិតទៅវិញ»។
គួររំលឹកថា ៤.៥ភាគរយនៃការនាំចេញសរុបនៅឆ្នាំ២០១៨របស់ម៉ាឡេស៊ីគឺប្រេងដូង។ ការបាត់បង់ការនាំចេញផលិតផលនេះ អាចធ្វើឲ្យម៉ាឡេស៊ីជួបប្រទះបញ្ហាសេដ្ឋកិច្ចធ្ងន់ធ្ងរផងដែរ។ មិនមែនតែម៉ាឡេស៊ី សូម្បីតែឥណ្ឌូណេស៊ី ក៏ជួបបញ្ហាប្រឈមដូចគ្នាដែរ។ អ្វីដែលអឺរ៉ុបបារម្ភនោះ គឺវិធីសាស្ត្រក្នុងការរានដី បានប៉ះពាល់ខ្លាំងដល់បរិស្ថាន ពិសេសការដុតព្រៃតែម្ដង ដែលធ្វើឲ្យបញ្ហាអព្ទខ្លាំង បន្ថែមពីលើបញ្ហានានដូចជា ការសឹករេចរិលដី និងការបាត់បង់ព្រៃឈើនោះ។
ក្រៅតែពីរឿងប្រេងដូងនេះ លោកមហាធៀក៏បានលើកឡើងពីសម្ពាធដែលអាចកើតមានពីសង្គ្រាមពាណិជ្ជកម្មរវាងអាមេរិកនិងចិនផងដែរ។ លោកបាននិយាយថា ប្រទេសម៉ាឡេស៊ីគឺនៅចំកណ្តាល។ ក្នុងផ្នែកសេដ្ឋកិច្ចម៉ាឡេស៊ីមានទំនាក់ទំនងជាមួយប្រទេសទាំងពីរ ចំណែកឯទីតាំងភូមិសាស្ត្រវិញ ប្រទេសនេះក៏សិ្ថតនៅកណ្តាលប្រទេសទាំងពីរ។ កត្តាទាំងនេះបានបង្ហាញថាម៉ាឡេស៊ីអាចជាគោលដៅនៃការដាក់ទណ្ឌកម្មរបស់ចិននិងអាមេរិក។
ចិននិងអាមេរិកសុទ្ធសឹងតែដៃគូរពាណិជ្ជកម្មដ៏ធំរបស់ម៉ាឡេស៊ី។ ក្នុងការបាត់បង់ដៃគូរណាមួយ ច្បាស់ណាស់ថា សេដ្ឋកិច្ចម៉ាឡេស៊ីអាចនឹងធ្លាក់ចុះ។ បើតាមទីភ្នាក់ងារព័ត៌មាន Reuters លោក មហាធៀ លើកឡើងថា ដើម្បីកុំអោយទទួលរងការប៉ះពាល់ខ្លាំងពីមហាអំណាចទាំងពីរ ម៉ាឡេស៊ីនឹងងាកមកសហការជាមួយប្រទេសក្នុងតំបន់អោយបានច្រើនជាងមុន៕
© រក្សាសិទ្ធិដោយ thmeythmey.com