ជាតិ
ពីនេះ ពីនោះ
២៥ខេត្ត/រាជធានី
«ស្វាយចន្ទី»អាចដាំបានស្ទើរគ្រប់តំបន់ តែត្រូវដឹងលក្ខណៈជីវសាស្ត្ររបស់វា ទើបបានទិន្នផលខ្ពស់ រូបភាព Capture ពីសៀវភៅស្ដីពី«ដំណាំស្វាយចន្ទី» ដែលសហការរៀបចំដោយនាយកដ្ឋានផ្សព្វផ្សាយកសិកម្ម និងនាយកដ្ឋានដំណាំឧស្សាហកម្ម នៃអគ្គនាយកដ្ឋានកសិកម្ម, ២០១៦
×
ដោយ៖ ផាត ដាណេ
ភ្នំពេញ៖ គ្រាប់ស្វាយចន្ទី ឋិតនៅខាងក្រៅផ្លែ ហើយលក្ខណៈរបស់មានរូបរាងដូចគ្រាប់សណ្ដែក ឬរាងដូចតម្រង់នោម បែងចែកកូទីលេដុងជាពីរស្មើគ្នា។ ពេលក្ដិបមានពណ៌ស៊ីជម្ពូ បន្ទាប់មកមានពណ៌បៃតង នៅពេលលូតលាស់ធំធាត់ដល់កម្រិត វាប្រែជាពណ៌ប្រផះនិងពណ៌ត្នោតចាស់។ ដំណាំស្វាយចន្ទី អាចដាំបានស្ទើរគ្រប់ទីកន្លែងនៅក្នុងប្រទេសកម្ពុជាដែលពុំមែនជាកន្លែងលិចទឹក តែកសិករត្រូវដឹងពីលក្ខណៈជីវសាស្ត្ររបស់ស្វាយចន្ទី ទើបបានទទួលបានទិន្នផលច្រើន។
ស្វាយចន្ទីជាប្រភេទដំណាំយកផ្លែនិងគ្រាប់។ ដំណាំនេះ មិនមែនមានតែក្នុងប្រទេសកម្ពុជានោះទេ គឺមាននៅតំបន់ត្រូពិកជាច្រើនបានដាំដំណាំនេះ ហើយគេបានធ្វើការអភិវឌ្ឍដំណាំនេះផងដែរ ព្រោះបច្ចុប្បន្នសេចក្ដីត្រូវការលើផលិតផលនៃដំណាំស្វាយចន្ទី កំពុងតែកើនឡើងជាលំដាប់។ ហេតុដូច្នេះហើយ បានជាក្រសួងកសិកម្ម រុក្ខាប្រមាញ់ និងនេសាទ មានផែនការជំរុញឲ្យកសិករខិតខំដាំដំណាំនេះ ឲ្យបានច្រើនជាអតិបរមា ដើម្បីបម្រើសេចក្ដីត្រូវការហូបចុកនៅក្នុងប្រទេស និងធ្វើការនាំចេញទៅក្រៅប្រទេសថែមទៀត ស្របតាមយុទ្ធសាស្ត្រចតុកោណរបស់រាជរដ្ឋាភិបាល។
ប្រភេទដំណាំស្វាយចន្ទី គេដាំតាមតំបន់ខ្ពង់រាបនិងវាលទំនាប ដែលពុំលិចទឹកស្ទើរគ្រប់ខេត្តក្រុងក្នុងប្រទេសកម្ពុជា ដែលមានផ្ទៃដីដាំដុះចំនួន ៦៦.៥១៣ហិចតា (ស្ថិតិកសិកម្មឆ្នាំ២០០៩)។ ស្វាយចន្ទីត្រូវការសីតុណ្ហភាពថេរ គឺមិនត្រជាក់ពេក មិនក្ដៅពេក។ សីតុណ្ហភាពខ្ពស់បំផុត ៣៤អង្សាសេ និងសីតុណ្ហភាពទាបបំផុត ១៨អង្សាសេ ប៉ុន្តែសីតុណ្ហភាពល្អបំផុតចន្លោះពី ២៤-២៨អង្សាសេ។ ប្រសិនបើ សីតុណ្ហភាពមិនខ្ពស់ជាង ២០អង្សាសេទេ ស្វាយចន្ទីពិបាកលូតលាស់ ហេតុដូច្នេះ សីតុណ្ហភាពល្អបំផុតប្រចាំឆ្នាំគឺ ២៧អង្សាសេ។
ការដាំដុះស្វាយចន្ទី ទទួលបានជោគជ័យអាស្រ័យលើការទទួលបានទឹកភ្លៀង៥ខែ និងលទ្ធភាពនៃការស្រូបទឹកទុករបស់ដីបានល្អ។ ស្វាយចន្ទីអាចដាំបាននៅតំបន់ដែលមានភ្លៀងធ្លាក់ពី ៥០០-៤.០០០ម.ម ក្នុងមួយឆ្នាំ។ តំបន់ដែលមានភ្លៀងធ្លាក់តិច ៥០០ម.ម និងតំបន់ដែលមានទឹកភ្លៀងច្រើនជាង ៣.០០០-៤.០០០ម.ម ពេញមួយឆ្នាំ មិនអាចដាំស្វាយចន្ទីបានទេ។ សា្វយចន្ទីមិនសូវត្រូវការទឹក៤-៥ខែ គឺនៅដំណាក់កាលចេញត្រួយ និងចេញផ្លែ។
ស្វាយចន្ទីធន់ទ្រាំនឹងតំបន់ ដែលមានសំណើមបរិយាកាសទាប ហើយមានរយៈពេលវែងផងដែរ។ បើមានសំណើមខ្ពស់ជាង ៨០ភាគរយ ក្នុងកំឡុងពេលចេញផ្កា និងចាប់ផ្ដើមចេញផ្លែ គឹជះឥទ្ធិពលមិនល្អដល់បរិមាណ និងគុណភាពទិន្នផលស្វាយចន្ទី។ ម្យ៉ាងវិញទៀត ខ្យល់ខ្លាំងក៏ធ្វើឲ្យមានផលប៉ះពាល់យ៉ាងខ្លាំងដល់ផ្កា និងផ្លែ តែខ្យល់ក៏ជាអ្នកដើរតួក្នុងការនាំលំអងផ្កាផងដែរ។ ដូចនេះ ខ្យល់ដែលល្អបំផុតដល់ស្វាយចន្ទីគឺពី ២-៧ម៉ែត្រក្នុងមួយវិនាទី ឬ២០គីឡូម៉ែត្រក្នុងមួយម៉ោង។ បន្ថែមទៀតនោះ ស្វាយចន្ទីជាដំណាំត្រូវការពន្លឺព្រះអាទិត្យ និងមិនត្រូវការម្លប់ច្រើនទេ។ តម្រូវការពន្លឺទាបបំផុតពី ២.០០០-២.៤០០ម៉ោងក្នុង១ឆ្នាំ តែក្នុងដំណាំកាលចេញផ្កា និងផ្លែស្វាយចន្ទីត្រូវការពន្លឺ ១.២៨៥ម៉ោង (ខែវិច្ឆិកា-មិនា)។
(សារព័ត៌មានថ្មីៗ ដកស្រង់ពីសៀវភៅស្ដីពី«ដំណាំស្វាយចន្ទី» ដែលសហការរៀបចំដោយនាយកដ្ឋានផ្សព្វផ្សាយកសិកម្ម និងនាយកដ្ឋានដំណាំឧស្សាហកម្ម នៃអគ្គនាយកដ្ឋានកសិកម្ម បោះពុម្ពផ្សាយដោយ ក្រសួងកសិកម្ម រុក្ខាប្រមាញ់ និងនេសាទ, ២០១៦)
© រក្សាសិទ្ធិដោយ thmeythmey.com