ជាតិ
រវល់តែខំរៀនជំនាញ និងភាសាបរទេស អត់សូវតាមដានប្រវត្តិសាស្ត្រឡើយ! ទិដ្ឋភាពទូទៅនាជំនួបកិច្ចព្រមព្រៀងសន្តិភាពក្រុងប៉ារីស កាលពីថ្ងៃទី២៣ ខែតុលា ឆ្នាំ១៩៩១។ រូបថត AFP
× ការបកស្រាយប្រវត្តិសាស្ត្រ និងការផ្តល់តម្លៃខុសៗគ្នា បានធ្វើឲ្យយុវជនមួយចំនួន មិនយកចិត្តទុកដាក់សិក្សាឲ្យបានស៊ីជម្រៅលើរឿងរ៉ាវប្រវត្តិសាស្ត្រ។ យុវជនដែលមិនសូវចាប់អារម្មណ៍រឿងរ៉ាវប្រវត្តិសាស្ត្រ បានពន្យល់ហេតុផលប្រហាក់ប្រហែលគ្នា មកកាន់សារព័ត៌មានថ្មីៗ ជាពិសេសការយល់ឃើញរបស់ពួកគេទាក់ទងនឹងសន្ធិសញ្ញាសន្តិភាពក្រុងប៉ារីស។
«តើសន្ធិសញ្ញាសន្តិភាពក្រុងប៉ារីស មានន័យបែបណា?»។ សុពេជ្រ ដែលរៀនជំនាញគ្រប់គ្រងពាណិជ្ជកម្ម បានឆ្លើយទាំងញញឹម ប៉ុន្តែមិនអាចពន្យល់បានក្បោះក្បាយឡើយ។ «ខ្ញុំមិនបានដឹងច្បាស់នោះទេ ព្រោះកាលពេលរៀន ខ្ញុំអានមិនយល់ពីភាសាការទូត ហើយក៏មិនបានព្យាយាមស្វែងយល់បន្តទៀត»។
យុវជនវ័យជាង២០ឆ្នាំរូបនេះ បានបញ្ជាក់ថា បច្ចុប្បន្ន គេមមាញឹករៀនជំនាញ និងភាសាបរទេស ហេតុដូច្នេះទើបមិនសូវដឹងរឿងប្រវត្តិសាស្ត្រកាលពីមុន។ ទោះបីជាយ៉ាងណាក៏ដោយ សុពេជ្រ បានដឹងថា សន្ធិសញ្ញាសន្តិភាពក្រុងប៉ារីស គឺជាការរំលឹកនៃជំនួបរវាងអតីតព្រះមហាក្សត្រ ព្រះបាទ នរោត្តម សីហនុ និងសម្តេច ហ៊ុន សែន។
មិនខុសគ្នានោះឡើយ យុវជន មេសា ដែលទើបចូលរួមជំនាញផ្នែកច្បាប់ អះអាងថាខ្លួនដឹងមិនច្បាស់នោះទេ ប៉ុន្តែទិវា២៣តុលានេះ គឺរំលឹកដល់ការជួបគ្នាដើម្បីបញ្ចប់សង្គ្រាមនៅកម្ពុជា។ និស្សិត សុខហេង, វងសិទ្ធិ, វីរៈ ក៏បានត្រឹមតែបន្ទរផងដែរថា កិច្ចព្រមព្រៀងនោះ ត្រូវបានរៀបចំឡើងនៅក្រុងប៉ារីស។
ទោះបីជាយ៉ាងណាក៏ដោយ និស្សិតឆ្នាំទី៣ឈ្មោះ ប៊ុនហេង បានផ្តល់ចម្លើយក្បោះក្បាយបន្ថិច មកកាន់សារព័ត៌មានថ្មីៗ ។ សុខហេង ថា ជំនួបកាលពី២៨ឆ្នាំមុន ជាដើមចមដែលនាំឲ្យមានការបញ្ចប់ជម្លោះជាបន្តបន្ទាប់នៅកម្ពុជា ប៉ុន្តែមិនទាន់ពេញលេញនោះឡើយ។
«កិច្ចព្រមព្រៀមសន្តិភាពនេះ ហើយដែលនាំឲ្យមានការបោះឆ្នោតលើកដំបូងនៅឆ្នាំ១៩៩៣។ បារាំង និងឥណ្ឌូណេស៊ី ដើរតួសំខាន់ខ្លាំងណាស់ក្នុងប្រទេសដែលហត្ថលេខី»។ នេះជាការលើកឡើងរបស់ លោក ប៊ុនហេង និស្សិតផ្នែកទំនាក់ទំនងអន្តរជាតិឆ្នាំទី៣ ហើយប្រាប់ថា លោក បានដឹងពីសន្ធិសញ្ញានេះ ដោយសារមើលព័ត៌មានតាមប្រព័ន្ធផ្សព្វផ្សាយ៕
Tag:
កិច្ចព្រមព្រៀមសន្តិភាពទីក្រុងប៉ារីស
យុវជន
© រក្សាសិទ្ធិដោយ thmeythmey.com