ប៉ូលិសអង់គ្លេសរកឃើញសពមនុស្ស៣៩នាក់ក្នុងទូកុងតឺន័រមួយ

អន្តរជាតិ

ប៉ូលិសអង់គ្លេសរកឃើញសពមនុស្ស៣៩នាក់ក្នុងទូកុងតឺន័រមួយ

23, Oct 2019 , 10:59 pm

រូបភាព

ប្រភពរូប៖ SKYNEWS

ដោយ:

សាកសពមនុស្ស៣៩នាក់ ត្រូវបានប្រទះឃើញក្នុងទូកុងតឺន័រមួយ ដែលទុកចោលនៅអគារឧស្សាហកម្មមួយកន្លែងក្នុងភាគខាងកើតនៃទីក្រុងឡុងដ៍ ប្រទេសអង់គ្លេស។

ប៉ូលិសប្រចាំក្រុង Essex បានបញ្ជាក់ឲ្យដឹងថា រថយន្តកុងតឺន័រមួយ ដែលគេជឿថា បានធ្វើដំណើរចេញពីប្រទេសប៊ុលហ្គារី ហើយចូលទៅកាន់ចក្រភពអង់គ្លេស តាមរយៈក្រុង Holyhead ក្នុងប្រទេស Wales កាលពីថ្ងសៅរ៍ ទី១៩ តុលា កន្លងទៅ។ ប៉ូលិស អះអាងទៀតថា បុរសវ័យ២៥ឆ្នាំមកពីអៀរឡង់ខាងជើង ត្រូវបានឃាត់ខ្លួនក្រោមការសង្ស័យថាប្រព្រឹត្តអំពើឃាតកម្ម។

យោងតាមការចុះផ្សាយរបស់ទីភ្នាក់ងារព័ត៌មាន AFP ស្នងការប៉ូលិសប្រចាំក្រុង Essex លោក Andrew Mariner និយាយថា នេះជា គឺឧប្បត្តិហេតុដ៏ខ្លោចផ្សាមួយដែលមនុស្សមួយចំនួនបានបាត់បង់ជីវិត។ ហើយការសាកសួររបស់ប៉ូលិសកំពុងបន្តដើម្បីស្វែងរកការពិតនៃហេតុការណ៍ដែលបានកើតឡើង។ លោក បញ្ជាក់ដូច្នេះថា៖«ទោះយ៉ាងណាយើងកំពុងស្ថិតនៅក្នុងការកំណត់អត្តសញ្ញាណជនរងគ្រោះ ហើយខ្ញុំរំពឹងថា នេះអាចជាដំណើរការដ៏វែងមួយ»។

បើតាមការអះអាងរបស់ប៉ូលិស ក្រុមសង្គ្រោះអាសន្នរបស់អង់គ្លេស បានរកឃើញ កុងតឺន័រនៅឧទ្យាន Waterglade Industrial Park ក្នុងទីក្រុងហ្គ្រេសដែលមានទីតាំងនៅ River Thames ចម្ងាយប្រហែល ៣២ គីឡូម៉ែត្រពីកណ្តាលទីក្រុងឡុងដ៍ ហើយបានជូនដំណឹងដល់ប៉ូលីសនៅម៉ោងប្រហែល ១ និង៤០ នាទីព្រឹកម៉ោងក្នុងស្រុក។ ទាំង៣៩នាក់ដែលជាជនរងគ្រោះ ក្នុងនោះមានមនុស្សវ័យជំទង់ម្នាក់ និងមនុស្សធំ៣៨នាក់ ត្រូវបានប្រកាសថាស្លាប់ទាំងអស់នៅកន្លែងកើតហេតុ៕