អតីតបក្សប្រឆាំង ចោទរដ្ឋាភិបាលថា «ចង់បំបាត់កិច្ចព្រមព្រៀងក្រុងប៉ារីស»

ជាតិ

នយោបាយជាតិ

អតីតបក្សប្រឆាំង ចោទរដ្ឋាភិបាលថា «ចង់បំបាត់កិច្ចព្រមព្រៀងក្រុងប៉ារីស»

23, Oct 2019 , 6:59 pm

រូបភាព

សម្តេចនាយករដ្ឋមន្រ្តី ហ៊ុន សែន ចុះហត្ថលេខាលើកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ១៩៩១

ដោយ: ថ្មីៗ

«...រដ្ឋាភិបាលកម្ពុជា មានចេតនាបំបាត់ចោលទាំងស្រុងនូវកិច្ចព្រមព្រៀងសន្តិភាពទីក្រុងប៉ារីស ដោយបានសម្រេចលុបចោលនូវទិវារម្លឹកខួបនៃកិច្ចព្រមព្រៀងសន្តិភាពទីក្រុងប៉ារីស២៣ តុលា»។ អតីតគណបក្សសង្គ្រោះជាតិ បានចោទប្រកាន់ដូច្នេះ មកលើរដ្ឋាភិបាលកម្ពុជា តាមរយៈសេចក្តីថ្លែងការណ៍ ដែលចេញពីក្រៅប្រទេសមក នៅថ្ងៃទី២៣ ខែតុលា ឆ្នាំ២០១៩នេះ ចំថ្ងៃរម្លឹកខួប២៨ឆ្នាំនៃការបង្កើតកិច្ចព្រមព្រៀងសន្តិភាពទីក្រុងប៉ារីស។

ថ្ងៃទី២៣ ខែតុលា ឆ្នាំ២០១៩នេះ គឺជាថ្ងៃចុងក្រោយហើយ ដែលរដ្ឋាភិបាលកម្ពុជា អនុញ្ញាតឲ្យឈប់សម្រាក ដើម្បីអបអរសាទរនិងរម្លឹកដល់ថ្ងៃបង្កើតកិច្ចព្រមព្រៀងសន្តិភាពទីក្រុងប៉ារីស កាលពីថ្ងៃទី២៣ ខែតុលា ឆ្នាំ១៩៩១។ ចាប់ពីឆ្នាំ២០២០ទៅ នឹងមិនមានថ្ងៃឈប់សម្រាក សម្រាប់ទិវារម្លឹកខួបនៃការបង្កើតកិច្ចព្រមព្រៀងសន្តិភាពទីក្រុងប៉ារីស ទៀតទេ។

លោក ឈឹម ផលវរុណ អ្នកនាំពាក្យគណបក្សប្រជាជនកម្ពុជា បកស្រាយថា កិច្ចព្រមព្រៀងសន្តិភាពទីក្រុងប៉ារីស មានតម្លៃនិងអាចយកមកអនុវត្តបាន តែនៅក្នុងសម័យអន្តរកាល ដែលអាជ្ញាធរបណ្តោះអាសន្ននៃអង្គការសហប្រជាជាតិប្រចាំកម្ពុជា (អ៊ុនតាក់) ចូលមកជួយរៀបចំការបោះឆ្នោតប៉ុណ្ណោះ។ លោក បញ្ជាក់ថា ក្រោយអ៊ុនតាក់រៀបចំការបោះឆ្នោតនៅកម្ពុជា ឲ្យមានរដ្ឋធម្មនុញ្ញនិងរដ្ឋាភិបាល តាំងពីឆ្នាំ១៩៩៣ រួចមក កិច្ចព្រមព្រៀងសន្តិភាពទីក្រុងប៉ារីស ក៏ត្រូវអស់សុពលភាពពីពេលនោះមក។

ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទនៅរសៀលថ្ងៃទី២៣ ខែតុលា អ្នកនាំពាក្យគណបក្សកាន់អំណាចរូបនេះ ពន្យល់ថាថា៖«ច្បាប់កំពូលរបស់ប្រទេស គឺរដ្ឋធម្មនុញ្ញ ឯកិច្ចព្រមព្រៀងសន្តិភាពទីក្រុងប៉ារីស គឺយើងអស់តម្លៃអនុវត្តហើយ។ វា គ្រាន់តែជាស្មារតី ដែលយើងយកវាទៅរក្សាទុក ក្នុងន័យធៀប គឺរក្សាទុកក្នុងសារមន្ទីរឯកសារ អត់មានសម្រាប់យកមកអនុវត្តទេ...។ កិច្ចព្រមព្រៀងសន្តិភាពទីក្រុងប៉ារីស បានបញ្ចប់ដោយខ្លួនវា មិនមានអ្នកណាបញ្ចប់វាទេ។ វា ចប់តាំងពីអ៊ុនតាក់ ចេញពីកម្ពុជា ចាប់តាំងពីកម្ពុជា មានរដ្ឋធម្មនុញ្ញថ្មី...»។

សម្តេចនាយករដ្ឋមន្ត្រី ហ៊ុន សែន ដែលជាតួអង្គចូលរួមបង្កើតកិច្ចព្រមព្រៀងសន្តិភាពទីក្រុងប៉ារីស ឲ្យតម្លៃរដ្ឋធម្មនុញ្ញកម្ពុជាបច្ចុប្បន្ន ខ្ពស់ជាងកិច្ចព្រមព្រៀងសន្តិភាពទីក្រុងប៉ារីស។ ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យបៀលប្រាយ កាលពីព្រឹកថ្ងៃទី២២ ខែតុលា សម្តេចនាយករដ្ឋមន្ត្រី មានប្រសាសន៍ថា៖«...តម្លៃកិច្ចព្រមព្រៀងសន្តិភាពទីក្រុងប៉ារីសស្អីៗ ចុះរដ្ឋធម្មនុញ្ញខ្មែរ វាទៅណាបាត់វា។ ពេលវេលានេះ ត្រូវអនុវត្តតាមក្របខ័ណ្ឌនៃរដ្ឋធម្មនុញ្ញ...»។

ប្រមុខរដ្ឋាភិបាល អះអាងថា បើអនុវត្តកិច្ចព្រមព្រៀងសន្តិភាពទីក្រុងប៉ារីស គឺត្រូវដោះលែងលោក ខៀវ សំផន និង ត្រូវរំលាយតុលាការខ្មែរក្រហមចោល ពីព្រោះកិច្ចព្រមព្រៀងសន្តិភាពទីក្រុងប៉ារីស ពុំបានតម្រូវឲ្យកាត់ទោសមេដឹកនាំខ្មែរក្រហមនោះទេ ហើយក៏មិនបានចែងពីការបង្កើតតុលាការខ្មែរក្រហមដែរ។

អតីតគណបក្សប្រឆាំង នៅរិះគន់រដ្ឋាភិបាលជាច្រើនទៀត ពីរឿងអនុវត្តកិច្ចព្រមព្រៀងសន្តិភាពទីក្រុងប៉ារីស។ អតីតគណបក្ស សរសេរក្នុងសេចក្តីថ្លែងការណ៍ថា៖«ស្មារតីនៃកិច្ចព្រមព្រៀងសន្តិភាពទីក្រុងប៉ារីស ត្រូវបានរំលាយចោលទាំងស្រុង ក្រោយការរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកា ឆ្នាំ២០១៧ និង ការបោះឆ្នោតក្លែងក្លាយ នៅថ្ងៃទី២៩ ខែកក្កដា ឆ្នាំ២០១៨...»។

សេចក្តីថ្លែងការណ៍ បន្តថា ការរំលាយអតីតគណបក្សប្រឆាំងនិងការបោះឆ្នោតឆ្នាំ២០១៨ បានសន្សល់ទុកនូវការបែកបាក់ជាតិ ការរំលោភបំពានសិទ្ធិមនុស្សយ៉ាងធ្ងន់ធ្ងរ ការបំបិទសិទ្ធិសេរីភាពប្រជាពលរដ្ឋគ្រប់បែបយ៉ាង ហើយនាំកម្ពុជាទៅរករបបដឹកនាំឯកបក្សជាថ្មីម្តងទៀត ដូចអតីតកាល ដែលផ្ទុយនឹងរដ្ឋធម្មនុញ្ញកម្ពុជា។

អតីតគណបក្សប្រឆាំង បន្ថែមថា ២៨ឆ្នាំមកនេះ ស្មារតីនៃកិច្ចព្រមព្រៀងសន្តិភាពទីក្រុងប៉ារីស មិនត្រូវបានគោរពនិងអនុវត្តបានពេញលេញឡើយ ហើយគោលការណ៍គ្រឹះក្នុងកិច្ចព្រមព្រៀងសន្តិភាពទីក្រុងប៉ារីស ដូចជា សិទ្ធិមនុស្ស ជាដើម ត្រូវបានជាន់ឈ្លីនិងរំលោភបំពានដោយរដ្ឋាភិបាលកម្ពុជា។

អ្នកនាំពាក្យគណបក្សកាន់អំណាចម្នាក់ទៀត គឺលោក សុខ ឥសាន ឆ្លើយតបថា តាំងពីទំព័រទីមួយ រហូតដល់ទំព័រចុងក្រោយនៃកិច្ចព្រមព្រៀងសន្តិភាពទីក្រុងប៉ារីស មិនបានហាមឃាត់មិនឲ្យរំលាយអតីតគណបក្សប្រឆាំង ដែលល្មើសច្បាប់នោះទេ។ លោក ប្រាប់សារព័ត៌មានថ្មីៗថា៖«ការលើកឡើងរបស់គាត់ អត់ត្រឹមត្រូវ។ វា អត់មានចែងក្នុងខ្លឹមសារនៃកិច្ចព្រមព្រៀងសន្តិភាពទីក្រុងប៉ារីសទេ»។

លោក ទទួលស្គាល់ថា កិច្ចព្រមព្រៀងសន្តិភាពទីក្រុងប៉ារីស តម្រូវឲ្យអនុវត្តឲ្យអនុវត្តតាមគន្លងលទ្ធិប្រជាធិបតេយ្យនិងនីតិរដ្ឋ។ លោក និយាយថា៖«បើនីតិរដ្ឋ អ្នកប្រព្រឹត្តខុសច្បាប់ ត្រូវទទួលទោសតាច្បាប់»។ លោក បន្ថែមថា៖«អតីតគណបក្សប្រឆាំង មិនមែនតំណាងឲ្យពហុបក្សទេ។ អត់ពីគាត់មួយ ឃើញបាន១៩បក្សមកទៀត។ មិនអាចដូចគាត់និយាយថា អត់ពីគាត់ទៅ គឺថាអ្នណា ក៏ងាប់អស់ដែរទេ...»។

តាមរយៈសេចក្តីថ្លែងការណ៍ដដែល អតីតគណបក្សប្រឆាំង អំពាវនាវឲ្យប្រទេសជាហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ពិភាក្សាគ្នាជាបន្ទាន់ ដើម្បីរកដំណោះស្រាយចំពោះវិបត្តិនយោបាយនៅកម្ពុជាបច្ចុប្បន្ន និង ដើម្បីនាំកម្ពុជាវិលមករកគន្លងប្រជាធិបតេយ្យសេរីពហុបក្សវិញ។

លោក សុខ ឥសាន ចំអកឲ្យដូច្នេះថា៖«ជាតិក្រោយក៏វាអត់មានអាហ្នឹងដែរ...។ នៅពេលណាមានការឈ្លានពានធ្ងន់ធ្ងរដល់ឯករាជ្យភាពនិងអធិបតេយ្យភាពកម្ពុជា គឺបណ្តាប្រទេសហត្ថលេខីហ្នឹង អាចកោះប្រជុំ...។ ឥឡុវនេះ មានអ្នកណាមកឈ្លានពានកម្ពុជា? វាអត់មានទេ អ៊ីចឹង កុំសង្ឃឹមថា មានការកោះប្រជុំ...»។

ប្រទេសទាំង១៨ ដែលចូលរួមធ្វើជាហត្ថលេខីជាមួយភាគីកម្ពុជា ក្នុងការបង្កើតកិច្ចព្រមព្រៀងសន្តិភាពទីក្រុងប៉ារីស គឺ អូស្ត្រាលី ព្រុយណេ កាណាដា ចិន បារាំង ឥណ្ឌា ឥណ្ឌូនេស៊ី ជប៉ុន ឡាវ ម៉ាឡេស៊ី ហ្វីលីពីន សិង្ហបុរី ថៃ សហភាពសូវៀត អង់គ្លេស អាមេរិក វៀតណាម និង យូហ្គោស្លាវី៕