ជាតិ
ផ្លូវការ៖ រដ្ឋដកហូតសិទ្ធិស៊ីនទ្រីលើការប្រមូលសំរាមក្រោយប្រតិបត្តិការ១៧ឆ្នាំនៅភ្នំពេញ សម្តេចនាយករដ្ឋមន្ត្រី ហ៊ុន សែន ថ្លែងពីបញ្ហាសំរាមនាកិច្ចប្រជុំគណៈរដ្ឋមន្ត្រីនៅថ្ងៃសុក្រនេះ។ រូបថត SPM
× សម្តេចនាយករដ្ឋមន្ត្រី ហ៊ុន សែន នាកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រនេះ បានប្រកាសពីការដកហូតសិទ្ធិផ្លូវការរបស់ក្រុមហ៊ុនស៊ីនទ្រី លើការប្រមូលសំរាមក្នុងរាជធានីភ្នំពេញ។ ការសម្រេចនេះ បានធ្វើឡើងកាលពីល្ងាចថ្ងៃទី២២ ខែតុលា កន្លងមក។
សម្តេចបានលើកឡើងថា ក្រុមហ៊ុនស៊ីនទ្រីដែលទទួលបានសិទ្ធិប្រមូលសំរាមនៅរាជធានីភ្នំពេញ តាំងពីថ្ងៃទី២៥ ខែមីនា ឆ្នាំ២០០២ មកនោះ មិនបានបំពេញកាតាព្វកិច្ចបម្រើប្រជាពលរដ្ឋឲ្យត្រឹមត្រូវតាមការរីកចម្រើនរបស់រាជធានីភ្នំពេញនោះឡើយ។
ទោះបីជាយ៉ាងណាក៏ដោយ សម្តេច ហ៊ុន សែន បានអះអាងថា ក្រុមហ៊ុនស៊ីនទ្រី ទទួលបានការប៉ះប៉ូវយ៉ាងសមស្រប និងយុត្តិធម៌ ទាំងធនធានរូបវន្ត និងបុគ្គលិក ដោយអ្វីៗទាំងអស់នឹងដាក់ក្រោមការគ្រប់គ្រងរបស់អង្គភាពស្វ័យតមួយរបស់រដ្ឋ ជាបណ្តោះអាសន្ន។
សម្តេចបានអះអាងថា រដ្ឋាភិបាលនឹងរៀបចំការដេញថ្លៃប្រកបដោយតម្លាភាព ដោយរកក្រុមហ៊ុនយ៉ាងតិចចំនួន៤ដើម្បីដេញថ្លៃប្រមូលសំរាមតាមតំបន់ក្នុងរាជធានីភ្នំពេញ រួមទាំងក្រុមហ៊ុនស៊ីនទ្រីផងដែរ។
ទាក់ទងនឹងការដកថ្លៃសំរាមចេញពីវិក្កយបត្រអគ្គិសនី សម្តេចបានបញ្ជាក់ថា ជាការសម្រេចដើម្បីផ្តល់យុត្តិធម៌សម្រាប់ពលរដ្ឋក្រីក្រ ហើយសម្តេចស្នើឲ្យបណ្តាខេត្តទាំងអស់ដែលប្រើប្រាស់ប្រព័ន្ធបែបនេះ ឲ្យចាប់អនុវត្តចាប់ពីថ្ងៃទី១ ខែមករា ឆ្នាំ២០២០ ទៅ៕
© រក្សាសិទ្ធិដោយ thmeythmey.com