អាជីវ​ករលក់​ទូរសព្ទ​ស៊េរី​ចាស់ៗ​ថា Nokia​ជំនាន់​មុន នៅតែ​លក់ដាច់​ច្រើន​
ជាតិ
បទយកការណ៍ / បទសម្ភាសន៍
បទសម្ភាសន៍
អាជីវ​ករលក់​ទូរសព្ទ​ស៊េរី​ចាស់ៗ​ថា Nokia​ជំនាន់​មុន នៅតែ​លក់ដាច់​ច្រើន​
27, Oct 2019 , 12:24 pm        
រូបភាព
​ភ្នំពេញ​៖ កំពុង​មមាញឹក​លក់​ទូរសព្ទ​ស៊េរី​ចាស់ៗ​នៅលើ​វិថី​ទេព​ផន អ្នកស្រី ម៉ី ស្រី​ម៉ុ​ច បាន​អះអាងថា បច្ចុប្បន្ន ទូរសព្ទ​ម៉ាក​Nokia ស៊េរី​ចាស់ ដែលជា​ទូរសព្ទ​ដ៏​ល្បីល្បាញ​កាលពី​មួយ​ទសវត្សរ៍​កន្លងទៅ នៅតែ​លក់ដាច់​គ្រាន់បើ​ដែរ​។ បើតាម​ស្ត្រី​វ័យ​២៥​ឆ្នាំ​រូបនេះ នៅក្នុង​មួយថ្ងៃ អ្នកស្រី​អាច​លក់​ទូរសព្ទ​ស៊េរី​ចាស់ៗ​ទាំងនេះ​បាន​ជាង​១០​គ្រឿង ដោយមាន​អតិថិជន​ជា​អ្នករត់ម៉ូតូឌុប រត់​កង់​បី ចាស់ៗ​នៅ​ជនបទ និង​ម្ចាស់​ក្រុមហ៊ុន​នានា​ផងដែរ​។


​ជា​បន្ត​សូម​អញ្ជើញ​ស្តាប់​បទ​សម្ភាស​រវាង លោក រ៉ឹ​ម ភា​រី អ្នកសារព័ត៌មាន​នៃ​គេហទំព័រ​ថ្មីៗ និង​អ្នកស្រី ម៉ី ស្រី​ម៉ុ​ច ដូចតទៅ​៖ 




​បើទោះបី​ទូរសព្ទ​ស៊េរី​ទំនើប បាន​នឹង​កំពុង​ពេញនិយម​ខ្លាំង​នៅ​កម្ពុជា និង​លើ​ពិភពលោក​ក៏ដោយ ប៉ុន្តែ ទូរស័ព្ទ​ម៉ាក Nokia ស៊េរី​ចាស់ៗ នៅតែ​ដណ្តើមបាន​ចំណែក​ទីផ្សារ​ខ្លះ​នៅក្នុង​ប្រទេស​កម្ពុជា​។ អ្នកស្រី ម៉ី ស្រី​ម៉ុ​ច អាជីវ​ករលក់​ទូរស័ព្ទ​ស៊េរី​ចាស់ៗ​នៅ​ផ្លូវ​ទេព​ផន​ក្នុង​ក្រុងភ្នំពេញ បាន​ប្រាប់​សារព័ត៌មាន​ថ្មីៗ​ថា បច្ចុប្បន្ន ទូរស័ព្ទ Nokia ស៊េរី​ចាស់​ទាំង​មួយ​ទឹក និង​ថ្មី នៅតែមាន​អតិថិជន​ជាច្រើន​បន្ត​គាំទ្រ និង​ទិញយក​ទៅប្រើ​ជា​បន្តបន្ទាប់​។ 

  
 
​បើតាម​ស្ត្រី​វ័យ​២៥​ឆ្នាំ​រូបនេះ នៅក្នុង​មួយថ្ងៃ អ្នកស្រី​បាន​លក់ដាច់​នូវ​ទូរស័ព្ទ Nokia​ស៊េរី​ចាស់ៗ ចន្លោះ​ពី​១០​ទៅ​ជាង​១០​គ្រឿង​។ អ្នកស្រី​រៀបរាប់ថា សម្រាប់​ទូរស័ព្ទ​មួយ​ទឹក​ស៊ីម​មួយ មានតម្លៃ​ចន្លោះ​ពី​២៥០០០​ដល់​៤៥០០០​រៀល​។ ចំណែក​ទូរស័ព្ទ​មួយ​ទឹក​ស៊ីម​២​វិញ មានតម្លៃ​ចន្លោះ​ពី​៥៥០០០​ទៅ​៧០០០០​រៀល​។ ចំណែក​ទូរស័ព្ទ​ស៊េរី​ទំនើប​សម្រាប់​ប្រើ​ជាមួយ​អ៊ិន​ធឺ​ណេ​ត​វិញ​មានតម្លៃ​ចាប់ពី​២៥​ដុល្លារ​ទៅ​១០០​ដុល្លារ​។  
 
​អ្នកស្រី​រៀបរាប់​យ៉ាង​ដូច្នេះ​ថា​៖ «​នៅលើ​តុ​នេះ មាន​ទូរស័ព្ទ​មួយ​ទឹក និង​ថ្មី ដូចជា ស៊េរី Nokia1200, 6300, 1202, 105, 107​។ ទូរស័ព្ទ​ទាំងអស់នេះ ខ្ញុំ​យកមក​ពី​ប្រទេស​ថៃ មួយ​ទឹក​ប្រទេស​ថៃ តែ​ម៉ាស៊ីន​ហ្ស៊ី​ន​រប​ស់វា​។ ធម្មតា​ស៊េរី​ចាស់​មែន ប៉ុន្តែ​ម៉ាស៊ីន​វា​នៅ​ល្អ​។ ភាគច្រើន​ជា​អ្នក​ដឹក​អីវ៉ាន់​អន​ឡាញ ព្រោះ​គេ​ប្រើ​ទូរស័ព្ទ​ទំនើប​មួយគ្រឿង តែ​គេ​ត្រូវការ​ថែម​ទូរស័ព្ទ​មួយគ្រឿង​ទៀត ដើម្បី​ប្រើ​ស៊ីម​ច្រើន​ប្រព័ន្ធ​។ ក្រុមហ៊ុន តែងតែ​ទិញ​ឲ្យ​បុគ្គលិក​ប្រើ ព្រោះ​សម្រាប់​បុគ្គលិក​ក្រុមហ៊ុន ពួកគេ​គ្រាន់តែ​Call​ទាក់ទង​អតិថិជន ហើយ​វា​មាន​សំឡេង​ច្បាស់​ល្អ និង​កាន់​ថ្ម​។ ក្រៅពី​ហ្នឹង មាន​អតិថិជន​ជា​អ្នករត់ម៉ូតូឌុប តៃកុង​ឡាន និង​អ្នកធ្វើការ​នៅ​កន្លែង​Call Center»​។   

  
 
​អ្នកស្រី​បន្ថែមថា ភាគច្រើន​អតិថិជន​មាន​ទូរស័ព្ទ​ទំនើប​មួយ​ហើយ តែ​ពួកគេ​ចង់បាន​ទូរស័ព្ទ​Nokia​មួយទៀត ព្រោះ​ពួកគេ​ចង់​ប្រើ​ស៊ីម​ច្រើន​ប្រព័ន្ធ​។ ម្យ៉ាង​ទូរស័ព្ទ​ម៉ាក Nokia ស៊េរី​ចាស់​កាន់​ថ្ម សំឡេង​ច្បាស់​ល្អ និង​ធន់​ប្រើ​បានយូរ​។​
 
​សម្រាប់​អាជីវករ​រូបនេះ បើទោះបី​អ្នកស្រី​លក់​ទូរស័ព្ទ​តាម​ចិញ្ចើមផ្លូវ​មែន តែ​អ្នកស្រី​មានការ​ធានា​ចំពោះ​ថ្ម និង​ម៉ាស៊ីន​ទូរស័ព្ទ​រយៈពេល​មួយ​សប្តាហ៍​ទៅ​១០​ថ្ងៃ ដោយ​អ្នកស្រី​មាន​តែម​បញ្ជាក់ថា​បាន​ទិញ​ពី​អ្នកស្រី​ផ្ទាល់​ទៀតផង​។ 
 
​គេ​សង្កេតឃើញថា ទូរស័ព្ទ Nokia ស៊េរី​ចាស់ ក្រៅពី​មាន​លក់​នៅ​ផ្លូវ​ទេព​ផន ក៏មាន​ដាក់លក់​ជា​ហូរហែ​នៅ​ផ្សារ​ទួល​សង្កែ និង​ជាប់​របង​វត្ត​ទួល​សង្កែ​ផងដែរ​។ ហើយ​បើតាម​អាជីវករ​ខាងលើនេះ មិន​ត្រឹមតែ​ដាក់លក់​តាមផ្លូវ និង​ទីប្រជុំជន​នោះទេ ទូរស័ព្ទ​មួយ​ទឹក​ស៊េរី​ចាស់​នេះ ក៏ត្រូវ​បាន​គេ​ដឹក​លក់​តាម​ម៉ូតូ​កង់​បី ឬ​ឡាន ទៅ​លក់​នៅ​តំបន់​រោងចក្រ​កាត់ដេរ​ជាដើម​៕      
 
 

 

 

Tag:
 ទូរសព្ទ​ស៊េរី​ចាស់​
  Nokia
© រក្សាសិទ្ធិដោយ thmeythmey.com