វិទ្យាសាស្រ្ត និង បច្ចេកវិទ្យា
អន្តរជាតិ
តើឈ្មោះព្រៃ«អាម៉ាហ្សូន»មានន័យដូចម្តេច?
× ការសន្មតជាច្រើនបានលើកឡើងថា ព្រៃអាម៉ាហ្សូនមានឈ្មោះល្បីល្បាញសព្វថ្ងៃនេះដោយសារតែជម្លោះរវាងជនជាតិអេស្ប៉ាញ និងជនជាតិភាគតិចដែលរស់នៅក្នុងព្រៃនោះ។ គេហទំព័រ The Culture Trip បានបកស្រាយថា ជនជាតិអេស្ប៉ាញម្នាក់ឈ្មោះថា Francisco de Orellana ជាបុគ្គលដំបូងគេដែលបានធ្វើដំណើរតាមដងទន្លេអាម៉ាហ្សូនពីចុងម្ខាងទៅចុងម្ខាងទៀត ក្នុងឆ្នាំ១៥៤០។ លោកក៏ជាអ្នកបង្កើតទីក្រុង Guayaquil ដែលសព្វថ្ងៃជាទីក្រុងនៃប្រទេសអេក្វាដ័រ។
ប្រវត្តិវិទូមួយចំនួនបាននិយាយថា លោក Orellana និងក្រុមជនជាតិដែលរស់នៅក្នុងតំបន់នោះ មានឈ្មោះថា Tupuyas បានបង្កឲ្យមានជម្លោះនឹងគ្នា។ ជនជាតិដែលរស់នៅទីនោះ មានទាំងភេទស្រី និងភេទប្រុសដែលបានមកបង្កជម្លោះជាមួយនឹងលោក។
ប៉ុន្តែដោយសារតែសក់របស់ជនជាតិទាំងនោះមានលក្ខណៈវែង ហើយពួកគេប្រើប្រាស់ដើមរុក្ខជាតិជាសំលៀកបំពាក់ (ស្រដៀងសំពត់) លោក Orellana បានភាន់ច្រឡំថាពួកគេទាំងនោះជាមនុស្សស្រី។ ដូច្នេះទើបលោកហៅក្រុមជនជាតិទាំងនោះថា«Amazon»ក្រោយពីតួអង្គនៅក្នុងប្រទេសក្រិក ដែលបកស្រាយពីក្រុមស្ត្រីមួយក្រុមដែលមានភាពក្លាហានខ្លាំងក្នុងការប្រយុទ្ធ។
មតិផ្សេងទៀតបាននិយាយថា ឈ្មោះទន្លេអាម៉ាហ្សូនគួរតែបានគេហៅជា Rio Santa Maria de La Mar Dulce ដោយជនជាតិអេស្បាញក្នុងអំឡុង១៥០០។ Mar Dulce បានន័យថា«ទឹកសាប» និងធំធេងហាក់បីដូចជាសមុទ្រ។
មួយវិញទៀត ឈ្មោះអាម៉ាហ្សូនបានដើមកំណើតមកពីភាសាដើមនៅទីនោះ ដែលបកទៅជាភាសាអេស្បាញថា Amassona ឬមានន័យថា«Boat Breaker» ឬ «អ្នកកម្ទេចទូក» ដោយសារតែរុក្ខជាតិធំៗដែលដុះនៅខាងក្រោមផ្ទៃទឹកនៃទន្លេ៕
Tag:
ចំណេះដឹងទូទៅ
អាម៉ាហ្សូន
© រក្សាសិទ្ធិដោយ thmeythmey.com