ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
កីឡាជាតិ
ជាតិ
ព្រះខ័នរាជស្វាយរៀងលើកពានលីគកំពូលក្នុងទឹកដីខ្លួនឯង ជាមួយនឹងប្រាក់រង្វាន់៦០លានរៀល
28, Oct 2019 ,
5:05 pm
រូបភាព
×
ដោយ:
ក្រុមបាល់ទាត់ព្រះខ័នរាជស្វាយរៀងបានលើកពានក្របខណ្ឌមិត្តហ្វូនខេមបូឌានលីគជាផ្លូវការ កាលពីយប់ថ្ងៃទី២៧ ខែតុលា នាកីឡដ្ឋានខេត្តស្វាយរៀង។ ក្រៅពីមេដាយ និងពានព្រះខ័នរាជស្វាយរៀងទទួលបានប្រាក់រង្វាន់ចំនួន៦០លានរៀល ដែលបង្កឲ្យមានជាការរិះពីសំណាក់អ្នកគាំទ្រ។ ថ្នាក់ដឹកនាំ គណៈកម្មការប្រកួតបាល់ទាត់ជាតិកម្ពុជា(CNCC)បានអះអាងថា លោកនឹងព្យាយាមស្វែងរកដៃគូឧបត្ថម្ភនានា ដើម្បីបំប៉ោងកញ្ចប់ថវិកាលើកទឹកចិត្តសម្រាប់ក្រុមជ័យលាភី នារដូវកាលក្រោយៗទៀត។
គណៈកម្មការប្រកួតបាល់ទាត់ជាតិកម្ពុជា បានរៀបចំកម្មវិធីលើកពានក្របខណ្ឌមិត្តហ្វូនខេមបូឌានលីគរដូវកាលឆ្នាំ២០១៩ ដល់ក្លិបព្រះខ័នរាជស្វាយរៀងជាផ្លូវការ កាលពីយប់ថ្ងៃទី២៧ ខែតុលា ឆ្នាំ២០១៩ ក្រោយជំនួបព្រះខ័នរាជស្វាយរៀងយកឈ្នះអាស៊ីអឹរ៉ុប ៦-១ នៅកីឡដ្ឋានខេត្តស្វាយរៀង។ កម្មវិធីនេះធ្វើឡើងក្រោមវត្តមានលោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច, លោក សៅ សុខា ប្រធានសហព័ន្ធកីឡាបាល់ទាត់កម្ពុជា និងថ្នាក់ដឹកនាំជាច្រើនរូបទៀត។
តាមពិតក្រុមក្រោមការដឹកនាំរបស់គ្រូបង្វឹក Conor Nester មួយនេះ បានគ្រងជើងឯកពានរង្វាន់នេះ តាំងពី៥ថ្ងៃមុនមកម្ល៉េះ ពោលគឺបន្ទាប់ពីពួកគេយកឈ្នះក្រសួងការពារជាតិក្នុងលទ្ធផល ៤-២ នាជំនួបសប្តាហ៍ទី២៤នៅលើទឹកដីខ្លួន កាលពីថ្ងៃទី២០ ខែតុលា ឆ្នាំ២០១៩។ នេះជាការគ្រងជើងឯកលើកទី២ បន្ទាប់ពីក្រុមនេះបានគ្រងជើងឯកម្តងកាលពីឆ្នាំ២០១៣។ ការលើកពានទាំងមិនស្គាល់ចាញ់នេះ បានជួយឲ្យព្រះខ័នរាជស្វាយរៀង ជាប់កំណត់ត្រាជាក្រុមដំបូងគែក្នុងពានរង្វាន់លីគកំពូលកម្ពុជា។
ក្រៅពីពាននិងមេដាយ ព្រះខ័នរាជស្វាយរៀង ទទួលបានថវិកាលើកទឹកចិត្តចំនួន៦០លានរៀលផងដែរ ពីការគ្រងជើងឯកនេះ។ ការផ្តល់ប្រាក់រង្វាន់ ៦០លានរៀលនេះ បានបង្កឲ្យមានមតិរិះគន់យ៉ាងច្រើនពីសំណាក់អ្នកគាំទ្រទៅលើគណៈកម្មការប្រកួតបាល់ទាត់ជាតិកម្ពុជា ក៏ដូចជាសហព័ន្ធកីឡាបាល់ទាត់កម្ពុជា។
អ្នកគាំទ្រខ្លះបានលើកឡើងថា ថវិកាលើកទឹកចិត្តនេះ គឺមិនសាកសម នឹងកម្លាំងពលកម្មរបស់កីឡាករ ដែលបានខិតខំកន្លងមកនេះទេ ហើយអ្នកខ្លះបានចំអកឲ្យថា ប្រាក់រង្វាន់លើកទឹកចិត្តក្នុងលីគកំពូល ដែលចំណាយពេលប្រកួតជាង៨ខែ មិនស្មើនឹងថវិកាលើកទឹកចិត្តក្នុងពានរង្វាន់ ដែលរៀបចំដោយក្រុមឯកជន ដែលមានរយៈពេលពី២ទៅ៣ខែជាដើម។ មតិខ្លះទៀត បានយកថវិកាក្នុងពានលីគកំពូលកម្ពុជាទៅប្រៀបធៀបជាមួយបណ្តាប្រទេសក្នុងអាស៊ានជាដើម។
ពាក់ព័ន្ធការរិះគន់នេះ លោក ឈី កុលបុត្រា អនុប្រធានលេខាធិការដ្ឋាននៃ CNCC បានបញ្ជាក់ថា លោកនឹងជួបពិគ្រោះជាមួយថ្នាក់ដឹកនាំ ដើម្បីស្វែងរកដំណោះស្រាយក្នុងន័យបំប៉ោងកញ្ចប់ថវិកាលើកទឹកចិត្តសម្រាប់ក្រុមជើងឯកនៅឆ្នាំក្រោយៗទៀត។ លោកបានបន្ថែមថា លោកតែងតែឃើញការរិះគន់របស់អ្នកគាំទ្រជុំវិញបញ្ហានេះ តែខាង CNCC មិនអាចធ្វើអ្វីតាមការចង់បានពីទស្សនិកជនភ្លាមៗនោះទេ។
«យើងនឹងមានកិច្ចប្រជុំជាមួយក្លិប និងថ្នាក់ដឹកនាំ CNCC ដើម្បីពិភាក្សាលើបញ្ហាប្រាក់រង្វាន់លើកទឹកចិត្តនៅរដូវកាលក្រោយៗ។ ព្រោះរឿងអ្វីមួយ យើងមិនអាចសម្រេចចិត្តភ្លាមៗនោះទេ គឺយើងត្រូវការប្រជុំ ពិគ្រោះយោបល់ និងពិនិត្យទាំងអស់គ្នា។ យើងចង់(ពង្រីកកញ្ចប់ថវិកា)ចេះតែចង់ហើយ តែយើងត្រូវធ្វើយ៉ាងម៉េចឲ្យមាននិរន្តរភាព ស្ថេរភាព និងចីរភាពក្នុងការដំណើរការ»។ នេះជាការលើកឡើងរបស់លោក ឈី កុលបុត្រា។
លោកបានបន្ថែមថា៖«យើងនឹងព្យាយាមធ្វើយ៉ាងម៉េចឲ្យមានលក្ខណៈល្អប្រសើរបន្តិចម្តងៗ ព្រោះបើយើងធ្វើយ៉ាងគំហុគតែម្តង គឺមិនអាចទៅរួចនោះទេ ព្រោះស្រុកយើងទើបតែមានសុខសន្តិភាព យើងមិនអាចឃើញស្រុកធ្វើអ៊ីចឹងយើងធ្វើដូចគេនោះទេ។
ប្រធានផ្នែកទីផ្សារប្រចាំ CNCC រូបនេះ បានលើកជាមតិបញ្ច្រាសពីការរិះគន់ថា កត្តាដែលធ្វើកញ្ចប់ថវិកាលើកទឹកចិត្តសម្រាប់ក្រុមជ័យលាភីនៅមានកម្រិត ដោយសារក្នុងមួយៗឆ្នាំ CNCC ត្រូវយកថវិកាមួយចំនួនផ្តល់ឲ្យក្លិបនីមួយៗ ដើម្បីរៀបចំការប្រកួតរបស់ខ្លួន។ លោកអះអាងថា បើបូកសរុបថវិកាលើកទឹកចិត្តជាមួយថវិកាផ្តល់ឲ្យក្លិបនីមួយៗប្រចាំឆ្នាំ គឺខាង CNCC ចំណាយមិនចាញ់បណ្តាប្រទេសក្នុងតំបន់ប៉ុន្មាននោះទេ។
ជាមួយគ្នានេះ លោក កុលបុត្រា អំពាវនាវឲ្យទស្សនិកជនចូលរួមទស្សនាការប្រកួតបាល់ទាត់លីគកំពូលឲ្យបានច្រើនកុះករ ដើម្បីបង្កភាពងាយស្រួល ដល់គណៈកម្មការប្រកួតបាល់ទាត់ជាតិកម្ពុជា ក្នុងការស្វែងរកដៃគូឧបត្ថម្ភ សម្រាប់បំប៉ោងកញ្ចប់ថវិកាលើកទឹកចិត្តឲ្យកាន់តែធំនៅឆ្នាំក្រោយៗទៀត។ គួរបញ្ជាក់ថា សុពលភាពកិច្ចសន្យារវាង CNCC ជាមួយក្រុមហ៊ុន Metfone នឹងផុតកំណត់នៅឆ្នាំ២០២១៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ព្រះខ័នរាជស្វាយរៀង
វិសាខា
Cambodian League 2019
© រក្សាសិទ្ធិដោយ thmeythmey.com
អត្ថបទពេញនិយម
ថ្ងៃ១៧ មេសា កាល៤៩ឆ្នាំមុន កងទ័ពខ្មែរក្រហមដណ្តើមបានទីក្រុងភ្នំពេញ
2 ថ្ងៃ
តើពាក្យ«បច្ច័យ»មានន័យច្បាស់លាស់ដូចម្តេច?
3 ថ្ងៃ
សមត្ថកិច្ចខេត្តកែប ធ្វើកិច្ចសន្យាអាជីវករ២រូប ឱ្យឈប់ទារលុយពីភ្ញៀវទេសចរដែលអង្គុយតាមឆ្នេរ
1 សប្តាហ៍
«បុរាណ»និង«បូរាណ» មានអត្ថន័យដូចគ្នា
1 សប្តាហ៍
«ភេរវកម្ម» មិនមែន «ភេវរកកម្ម» ឬ «ភារវកម្ម» ឡើយ
5 ថ្ងៃ
អត្ថបទពេញនិយមបន្ថែម