អន្តរជាតិ
ថៃចង់ចរចាក្រោយអាមេរិកដកប្រព័ន្ធអនុគ្រោះពន្ធ GSP លើទំនិញ១,៣ពាន់លានដុល្លារ ប្រធានាធិបតីអាមេរិក ដូណាល់ ត្រា (ស្តាំ) ចាប់ដៃជាមួយនាយករដ្ឋមន្ត្រីថៃ ប្រាយុទ្ធ ចន្ទអូចា អំឡុងជំនួបនៅសេតវិមានអាមេរិក កាលពីថ្ងៃ២ តុលា ២០១៧ ក្នុងរដ្ឋធានីវ៉ាស៊ីនតោន សហរដ្ឋអាមេរិក (AFP)
× រដ្ឋាភិបាលថៃ រៀបចំផែនការចរចាជាមួយសហរដ្ឋអាមេរិកពាក់ព័ន្ធការសម្រេចចិត្តបញ្ចប់ប្រព័ន្ធអនុគ្រោះពន្ធលើទំនិញនាំចេញមួយចំនួនធំ ដែលក្នុងនោះក៏មាន គ្រឿងសមុទ្រ។ នេះបើតាមការបញ្ជាក់ឲ្យដឹងរបស់មន្ត្រីថៃ នៅថ្ងៃចន្ទ ២៨ តុលា ។ ការដកហូតពន្ធលើទំនិញនាំចេញថៃ ក្នុងទំហំទឹកប្រាក់១,៣ពាន់លានដុល្លារ គឺស្ថិតក្រោមប្រព័ន្ធអនុគ្រោះ (GSP) អាមេរិកឲ្យទៅប្រទេសកំពុងអភិវឌ្ឍ ។
អគ្គនាយកស្តីទីនៃនាយកដ្ឋានពាណិជ្ជកម្មបរទេសរបស់ក្រសួងពាណិជ្ជកម្មថៃ Keerati Rushchano លើកឡើងថា ការិយាល័យលោក បានជូនដំណឹងដល់ក្រុមហ៊ុននាំចេញថា សហរដ្ឋអាមេរិកប្រហែលដកហូតប្រព័ន្ធអនុគ្រោះសម្រាប់ផលិតផលខ្លះ ។ ទោះជាបែបនេះក្តី លោក Keerati បញ្ជាក់ទៀតថា ភាគីថៃ នឹងព្យាយាមចរចាជុំវិញបញ្ហានេះជាមួយក្រុងវ៉ាស៊ីនតោន មុនការសម្រេចចិត្តនេះចូលជាធរមាននាខែមេសា ឆ្នាំ២០១៩ ។ នេះតាមការចុះផ្សាយរបស់ទីភ្នាក់ងារព័ត៌មាន AP។
កាលពីថ្ងៃសុក្រ ២៥ តុលា ការិយាល័យតំណាងពាណិជ្ជកម្មសហរដ្ឋអាមេរិក បានប្រកាសផ្អាកការអនុគ្រោះពន្ធគិតជាទឹកប្រាក់ ១,៣ពាន់លានដុល្លារ សម្រាប់ប្រទេសថៃ ក្រោមប្រព័ន្ធអនុគ្រោះពន្ធទូទៅ ឬហៅកាត់ថា «GPS» ។ ហេតុផលនោះគឺថា ប្រទេសថៃ បរាជ័យការពារសិទ្ធិពលករ។ យ៉ាងណាមិញ ការប្រកាសដដែលនេះ សង្កត់ធ្ងន់ថា សិទ្ធិទទួលបានប្រព័ន្ធអនុគ្រោះពន្ធរបសថៃ គឺបើកចំហសម្រាប់ការពិនិត្យឡើងវិញជាទៀងទាត់។
«ទោះបីជាមានការចូលរួមអស់រយៈពេល ៦ ឆ្នាំមកហើយក្តី ប្រទេសថៃមិនទាន់ចាត់វិធានការដើម្បីផ្តល់សិទ្ធិការងារដល់ពលករដែលត្រូវបានទទួលស្គាល់ជាអន្តរជាតិ ក្នុងវិស័យសំខាន់ៗមួយចំនួនដែលត្រូវបានកំណត់នៅក្នុងញត្តិឆ្នាំ ២០១៥ ពីសហព័ន្ធការងារអាមេរិកនិងសភានៃអង្គការឧស្សាហកម្ម (AFL-CIO) ដូចជា កិច្ចការពារសិទ្ធិសេរីភាពក្នុងការបង្កើតសមាគមនិងការចរចាជាសមូហភាព»។ នេះបើតាមសេចក្តីប្រកាសរបស់ការិយាល័យតំណាងពាណិជ្ជកម្មសហរដ្ឋអាមេរិក។
ម្យ៉ាងទៀត តាមរយៈសេចក្តីប្រកាសដដែល សហរដ្ឋអាមេរិក បញ្ជាក់ថា បញ្ជីផលិតផលដែលត្រូវដកចេញពីប្រព័ន្ធអនុគ្រោះពន្ធ GSP ផ្តោតលើផលិតផលដែលថៃនាំចេញច្រើនទៅទីផ្សារអាមេរិក។ ដោយសារតែបញ្ហាសិទ្ធិកម្មករដែលមានជាយូរមកហើយក្នុងឧស្សាហកម្មអាហារសមុទ្រនិងការដឹកជញ្ជូនតាមនាវា សិទ្ធិទទួលបាន GSP នឹងត្រូវដកហូតវិញសម្រាប់ផលិតផលអាហារសមុទ្រទាំងអស់ពីប្រទេសថៃ។
សូមបញ្ជាក់ថា ចំណាត់ការរបស់សហរដ្ឋអាមេរិកនេះទទួលការចាប់អាម្មណ៍ខ្លាំង ព្រោះតែសកម្មភាពនេះ កើតឡើងភ្លាមៗក្រោយរដ្ឋាភិបាលថៃបានប្រកាសគម្រោងហាមឃាត់ការប្រើថ្នាំសម្លាប់ស្មៅគ្លីកូស៊ាត (Glyphosate) ដែលត្រូវបានលក់ក្រោមឈ្មោះ Roundup ដោយក្រុមហ៊ុនអាមេរិក Monsanto ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុនឱសថដ៏ធំរបស់អាល្លឺម៉ង់ Bayer ។
ក្នុងលិខិតបែកធ្លាយទៅកាន់រដ្ឋាភិបាលថៃ ពីក្រសួងកសិកម្មអាមេរិកនិងតំណាងរបស់ខ្លួននៅស្ថានទូតអាមេរិក ក្រុងវ៉ាស៊ីនតោន បានជំរុញឱ្យមានការពន្យាពេលលើការហាមឃាត់នេះ ។ ត្រង់ចំណុចនេះ ពួកគេ បកស្រាយថា គ្រោះថ្នាក់ដល់សុខភាពនៃសារធាតុគីមីកសិកម្មត្រូវបានគេបំផ្លើស ហើយការហាមឃាត់អាចប៉ះពាល់ដល់ការនាំចេញផលិតផលកសិកម្មមួយចំនួនពី អាមេរិកទៅថៃ៕
Tag:
ថៃ
សហរដ្ឋអាមេរិក
GPS
© រក្សាសិទ្ធិដោយ thmeythmey.com