ម៉ូតូធំដែលស្រួលចំណាំ ជួយឲ្យលោក ជឿក ផល្លា លក់នំបុ័ងប៉ាតេកាន់តែដាច់

ជាតិ

ម៉ូតូធំដែលស្រួលចំណាំ ជួយឲ្យលោក ជឿក ផល្លា លក់នំបុ័ងប៉ាតេកាន់តែដាច់

30, Oct 2019 , 8:59 am

រូបភាព

ដោយ: នាយយ៉ាន

លោក ជឿក ផល្លា ជាអ្នកលក់នំប៉័ងសាច់ប៉ាតេតាមដងផ្លូវ។ ខុសពីអ្នកដូរដទៃទៀត ដែលគេប្រើប្រាស់ម៉ូតូស៊េរីចាស់ៗ ឬម៉ូតូដែលមានតម្លៃល្មមៗ សម្រាប់សណ្តោងទូដាក់អីវ៉ាន់លក់ដូរ លោកផល្លា បែរជាជ្រើសរើសប្រើ ម៉ូតូជប៉ុនម៉ាក យ៉ាម៉ាហា ដែលខ្លួនស្រឡាញ់ខ្លាំង សម្រាប់សណ្តោងរ៉ឺម៉កដាក់សម្ភារលក់ដូររបស់ខ្លួន។

តាមរយៈម៉ូតូធុនធំដែលមានកម្លាំង 250CC ដ៏ក្លាំងខ្លានេះ បានបង្កើនប្រជាប្រិយភាព នំបុ័ងប៉ាតេរបស់លោក ផល្លា បានមួយកម្រិង ដោយវាឲ្យអតិថិជនសម្គាល់អ្នកលក់បាន។ លោក ជឿក ផល្លា រៀបរាប់ដូច្នេះថា៖ «តាំងពីខ្ញុំប្រើម៉ូតូនេះមក លក់ដាច់ច្រើនជាងមុនឆ្ងាយ។ ដោយសារម៉ូតូនេះ គេស្គាល់ខ្ញុំច្រើន។ គេចំណាំមុខមិនបាន តែតាមម៉ូតូធំនេះ គេដឹងថានំ ប៉័ងឆ្ងាញ់។ គេគិតថា ដោយសារម៉ូតូខ្ញុំថ្លៃ នំប៉័ងនេះមានអនាម័យ ហើយរសជាតិវាឆ្ងាញ់ខុសគេ»។

ក្នុងមួយថ្ងៃ លោក ផល្លា អាចលក់ដូរបានប្រាក់ប្រមាណ៨ ម៉ឺនរៀល និងត្រូវចំណាយសម្រាប់ចាក់សាំង និងទូទាត់ថ្លៃដើមទំនិញខ្លះ ដែលអាចឲ្យលោកនៅសល់ប្រាក់ចំណេញសមល្មមដែរ។ ទោះចំណេញមិនច្រើន តែលោក ជឿក ផល្លា រីករាយចំពោះការលក់ដូរដាច់ និងមានអ្នកគាំទ្រច្រើនទៀត ដោយសារតែម៉ូតូធំរបស់ខ្លួន៕