កីឡាអន្តរជាតិ
អន្តរជាតិ
Zidane ថា Bale មិនដែលសុំចេញពី Real ដូចកាសែតអេស្ប៉ាញផ្សាយឡើយ
× លោក Zinedine Zidane អ្នកចាត់ការទូទៅ Real Madrid បានចេញមុខអះអាងថា ខ្សែប្រយុទ្ធ Gareth Bale មិនដែលហាមាត់សុំលោកចាកចេញពីក្លិបម្តងណាឡើយ។ ការលើកឡើងរបស់គ្រូសញ្ជាតិបារាំងបែបនេះ បន្ទាប់ពីមានអ្នកកាសែតអេស្ប៉ាញមួយបានផ្សាយព័ត៌មានដែលថា ប្រធានក្រុមជម្រើសជាតិវេលស៍រូបនេះ ខឹងសម្បារ និងធុញទ្រាន់ក្នុងការស្នាក់នៅក្លិបស្តេចសរហូតចង់ចាកចេញ។
Bale អាយុ៣០ឆ្នាំ គ្រោងផ្លាស់ទៅចូលរួមក្រុម Jiangsu Suning នៃលីគកីឡាបាល់ទាត់កំពូលចិន (Chinese Super League) ទៅហើយអំឡុងទីផ្សារដោះដូរកីឡាករ នៅដើមរដូវកាលនេះជាមួយថ្លៃឈ្នួល ១.២ លានដុល្លារក្នុងមួយសប្តាហ៍។ យ៉ាងណា Real បដិសេធវិញ ដោយសារក្លិបចង់បានការផ្ទេរ ដែលមានតម្លៃសមរម្យមួយ។
អ្វីដែលគួរចាប់អារម្មណ៍ ខណៈការចរចាលើការផ្ទេ Bale កំពុងដំណើរការ លោក Zidane ធ្លាប់បានអះអាងថា លោកសង្ឃឹមថា អតីតកីសមាជិកក្រុម Tottenham Hotspur រូបនេះ នឹងចាកចេញពី Santiago Bernabéu ឆាប់ៗ។ ប៉ុន្តែផ្ទុយទៅវិញ ចាប់តាំងពីពេលនោះមក Bale បានលេងជាច្រើប្រកួត ក្រោមការដឹកនាំរបស់អ្នកចាត់ការសញ្ជាតិបារាំង ពោលគឺ ៧ លើកមកហើយ សម្រាប់រដូវកាល ២០១៩-២០ នេះ ដោយរកបាន ២គ្រាប់ផង។
«ប្រសិនបើគាត់ (Bale) អាចហ្វឹកហាត់ គាត់អាចហ្វឹកហាត់បាន ហើយប្រសិនបើគាត់អាចលេង គាត់នឹងលេង។ តាមពិតទៅ គាត់លេងបានជាច្រើនប្រកួត ហើយគាត់មិនដែលនិយាយអំពីការចាកចេញទេ។ Bale ជាកីឡាករម្នាក់ដែលខិតខំប្រឹងប្រែងនិងហ្វឹកហាត់បានល្អ។ គាត់សំខាន់សម្រាប់សមាជិកក្រុម និងក្លិប។ នេះជាការបញ្ជាក់របស់លោក Zidane។ អ្នកចាត់ការវ័យ៤៧ឆ្នាំថែមទាំងសរសើរ Bale ថាបានផ្តោតលើការលេងសម្រាប់ក្រុមបានល្អ ហើយរូបគេបានត្រៀមខ្លួនរួចស្រេច ១០០% ដើម្បីជួយក្រុម។
Real បានចំណាយប្រាក់ជាកំណត់ត្រាពិភពលោក ១១០ លានដុល្លារអាមេរិកដើម្បីនាំយក Bale ពី Tottenham Hotspur កាលពីខែកញ្ញា ឆ្នាំ ២០១៣។ នៅទឹកដី Bernabeu ៤រដូវកាល Bale បានជួយ Real ឈ្នះ Champions Leageu ៤ដង La Liga និង Copa del Rey ១លើក UEFA Super Cups ៣ ដង និង Club World Cups ៣ដង រួមទាំងរកគ្រាប់ស៊ុតបញ្ចូលទីលើសពី ១០០ គ្រាប់ផង៕
Tag:
Gareth Bale
Zinedine Zidane
Real Madrid
© រក្សាសិទ្ធិដោយ thmeythmey.com