ជាតិ
នយោបាយជាតិ
លោក ខេង សុមេធ និយាយទៅកាន់នគរបាលនៅនៅអង្គភាពនគរបាលអន្តរាគមន៍
×![]()
ដោយ: ថ្មីៗ
១០ថ្ងៃទៀតប៉ុណ្ណោះ ផែនការនៃការវិលត្រឡប់មកកម្ពុជារបស់ក្រុមប្រឆាំង ដែលដឹកនាំដោយលោក សម រង្ស៊ី នឹងមកដល់ ខណៈកងកម្លាំងប្រដាប់អាវុធ ត្រៀមលក្ខណៈចាំបង្ក្រាបពួកគេ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ បានអំពាវនាវឲ្យនគរបាលគ្រប់លំដាប់ថ្នាក់ កម្ចាត់ក្រុមអ្នកប្រឆាំង ដែលត្រូវបានរដ្ឋាភិបាល ហៅថា ជាក្រុមឧទ្ទាម និងមានបំណងចូលមកកម្ពុជានៅថ្ងៃទី៩ ខែវិច្ឆិកា ឆ្នាំ២០១៩ ដើម្បីផ្តួលរំលំរដ្ឋាភិបាល។ ការអំពាវនាវនេះ ធ្វើឡើងក្នុងពិធីផ្តល់រថយន្ត១៦គ្រឿង ដល់កងកម្លាំងនគរបាលការពារព្រំដែនគោក នៅអង្គភាពនគរបាលអន្តរាគមន៍ ស្ថិតនៅសង្តាត់ព្រែកឯង ខណ្ឌច្បារអំពៅ រាជធានីភ្នំពេញ នាថ្ងៃទី៣០ ខែតុលា ឆ្នាំ២០១៩។
គេហទំព័រអគ្គស្នងការដ្ឋាននគរបាលជាតិ បានស្រង់សម្តីរបស់លោក ខេង សុមេធ ទៅចុះផ្សាយថា៖«ក្នុងនាមកងកម្លាំងប្រដាប់អាវុធ... ត្រូវត្រៀមខ្លួនគ្រប់ពេលវេលា ដើម្បីទទួលបទបញ្ជារបស់ថ្នាក់ដឹកនាំដែលដាក់ជូន ខណៈក្រុមឧទ្ទាមក្រៅច្បាប់ព្យាយាមធ្វើសកម្មភាពណាមួយដែលនាំឲ្យប្រទេសជាតិមានភាពវឹកវរ»។
គេ ឃើញស្នងការនគរបាលខេត្តមួយចំនួន ចាប់ផ្តើមពង្រឹងកងកម្លាំងរបស់ខ្លួន ដើម្បីត្រៀមលក្ខណៈការពារសន្តិសុខនៅថ្ងៃបុណ្យអុំទូក ដោយភ្ជាប់ជាមួយនឹងការដាស់តឿន ឲ្យប្រុងប្រយ័ត្នខ្ពស់ ចំពោះក្រុមប្រឆាំង ពីព្រោះថា ពួកគេ បានយកថ្ងៃបុណ្យអុំទូក អំពាវនាវឲ្យប្រជាពលរដ្ឋ ងើបប្រឆាំងនឹងរដ្ឋាភិបាល។ ក្រុមប្រឆាំង ប្រកាសថា ៩វិច្ឆិកា ជាថ្ងៃផ្លាស់ប្តូរ ឯរដ្ឋាភិបាល ប្រកាសវិញថា ៩វិច្ឆិកា ជាថ្ងៃហូបអំបុកទូទាំងប្រទេស ដើម្បីការពារជាតិ សាសនា ព្រះមហាក្សត្រ។
មិនមែនតែកម្លាំងគនរបាលទេ កងរាជអាវុធហត្ថនិងយោធា ក៏ត្រៀមខ្លួនដែរ ដើម្បីទប់ទល់នឹងដំណើរធ្វើមាតុភូមិនិវត្តរបស់ក្រុមប្រឆាំង។ សម្តេចនាយករដ្ឋមន្ត្រី ហ៊ុន សែន និយាយយ៉ាងខ្លីថា៖«កម្លាំងគ្រប់ប្រភេទ ទទួលបទបញ្ជារួចជាស្រេចទៅហើយ»។
លោក សម រង្ស៊ី លើកឡើងថា ដំណាក់កាលនេះ លោក គ្មានជម្រើសអ្វីផ្សេងនោះទេ ក្រៅតែពីការវិលមកកម្ពុជាវិញ ដើម្បីទាមទារឲ្យមានលទ្ធិប្រជាធិបតេយ្យនិងសេរីភាពនៅកម្ពុជា។ លោក ថា លោក នឹងមិនរាថយឡើយ ទោះរងការព្រមានចាប់ខ្លួនពីសំណាក់រដ្ឋាភិបាលក៏ដោយ៕
Tag:
សម រង្ស៊ី
មាតុភូមិនិវត្ត
ខេង សុមេធ
© រក្សាសិទ្ធិដោយ thmeythmey.com
